2 Vakorintho 1 - KITABU KITAKATIFU

¹ Inzi Paolo, mutumwa wa Kristo Yeso mu vulaliri vwa Nyasaye, na amiitu wiitu Timateo, kong'oderaa munyi likanisa lia Nyasaye mu Korinzo, kandi ku Vakrisitayo vosi avaveeye mu kivala choosi cha Akaya.

² Nyasaye Baba wiitu kandi Mwami Yeso Kristo amuhe zimbavasi kandi mirembe.

Paolo yahaana Lisandiza ku Nyasaye

³ Gendi kuhaane lizominywa ku Nyasaye Baba wu Mwami wiitu Yeso Kristo, Baba wi zimbavasi kandi Nyasaye wo vokonyi vwosi.

⁴ Oyo niyie okonyaa kunyi mu vudinyu vwitu vwosi, kunangwa na kunyi kuduuki kuva avanyala kokoonya avandi vaveeye nu vudinyu vwi zing'ano ziosi ni kutumikiraa vokonyi vulala vwere vwa kunyi kumali konyoora kutura ku Nyasaye.

⁵ Yee, kuli kusangaa muvusaliri vunyingi vwa Kristo, kandi ndio, kuvitira mu Kristo, kusangaa mu vokonyi vonene vwa Nyasaye.

⁶ Niiva kusalirizwa, gaveeye kigira vokonyi kandi ovohonyi vwinyu. Niiva kunyi kokoonywa, munyi kandi mulakoonywa kandi mulahevwa zingulu ziu kwikuzira ku vusaliri vwa kunyi kandi kwikuziraa ku.

⁷ Kunangwa lisuuvirizwa lietu mu munyi silinyala kodengeyizwa mba; kumanya ligali kuli musangaa mu vusaliri vwitu, kandi mulasanga ndio mu vokonyi vwa kunyi konyoora.

⁸ Avaamitu, kwenyaa kumwizuliza uvudinyu vwa kwanyoora mu kivala cha Asia. Vudinyu yivwo vwakumiina kuvita kegero kali nikogeha lisuuvira liu kuva mwoyo.

⁹ Kunyi kwalola mu mioyo jietu kuli koveeye avandu vakalagiywi likuza. Navuzwa yaga gekoleka kunangwa kunyi kuvuli koyeeka ku zing'anagani zie liiva lietu, navuzwa kweleede ku Nyasaye yenyine usimugukizaa vakuzu.

¹⁰ Nyasaye yakohonyia kutura mu vuhimwa vonene ligali vwi likuza, kandi alakohonyia; kunyi kumali kuviika lisuuvirizwa lietu muye ndi alahonyia kunyi kandi,

¹¹ kuli munyi mukokonyaa kandi munzira ya masaala ginyu kigira kunyi. Galava ndi, amasaala manyingi kigira kunyi galanyoola mativuli, kandi Nyasaye alagasiza kunyi; kandi vanyingi vizominyaa Nyasaye mu lisandiza kigira kunyi.

Ligirung'ana mu lilohiza lia Paolo

¹² Kwekonya kigira ziganagani zie mioyo jietu zikusuuvirizaa ndi ilimenya lietu mu lirova yili, mbitilira uvuhambani vwitu ni munyi, vumali kwamiifwa nu vutakatifu, uvusuuvirifu ni zimbavasi zia Nyasaye, na sigaveeye kigira vogeri vwa vandu mba.

¹³ Kunyi kumung'oderaa vindu via munyala kosooma kandi kumanyiriza; mbeeye ni lisuuvira ndi mulamanyiriza ivindu yivi vulahi ligali

¹⁴ kuli mumali kumanyiriza kunyi hakekeke vuzwa, ndi munyala kwekonya kigira kunyi kuli kunyi kunyala kwekonya kigira munyi, ku Lidiku lie liza liu Mwami wiitu Yeso.

¹⁵ Mu agiligali yaga, ndegomba kuuza ku munyi kutanga, kunangwa munyi muduuki kugasizwa haali kaviri.

¹⁶ Ndaalohiza kumuluuta mu logendo lwange lwu kuzia Makedonia, na lwanzirana nduuki konyoora limanulwa kutura ku munyi kigira logendo lwange lwu kuzia Ivuyuda.

¹⁷ Lwa ndalohiza yaga, ndaaloleka kuli mundu utamanyi ichakolaa? Muganaganaa ndalohiza kuli mundu wikivala, wetegeki kovora “Yee” kandi “Awa” ku ing'inga ndala nzere?

¹⁸ Nzisuha mu giligali ga Nyasaye ndi, gambolaa ku munyi sigaveeye “Yee” anoho “Awa” mba.

¹⁹ Yeso Kristo, Mwana wa Nyasaye, wilwaazwa na Sila, Timateo, harara ninzi, hagati hinyu siaveeye wa “Yee” anoho wa “Awa” mba; navuzwa gaali kazozo “Yee”;

²⁰ niyie oveeye “Yee” ku lisuuvirizwa liosi lia Nyasaye. Yiki nicho kigira kuvitira mu Kristo Yeso, livoora “Amini” lietu liveeye ku lwu vukumi vwa Nyasaye.

²¹ Ni Nyasaye mwene okolaa kunyi harara ni munyi kusingira vudinyu mu lihambanywa harara na Kristo; ni Nyasaye mwene wakuviika halovega ukuvakaa maguta;

²² uyu niyie umali kuviika kimanyiru chiche ku kunyi kandi okoheeye Roho Mutakatifu kuli kihambiliru chi vindu viosi via yakuviikira.

²³ Inzi nangaa Nyasaye kuva muloli wange, yamanya mwoyo gwange! Ndaatovora mburi kuuza Korinzo kunangwa mburi kumuletera vudinyu.

²⁴ Sikogerizaa kutumikira zingulu kumuvolera cha muduukana musuuviri mba, munyi musingiraa vudinyu mu lisuuvira lienyu. Muvogono yivwo kuyinziraa harara ni munyi muduuki kuva nu vusangali.