2 Samweli 9 - KITABU KITAKATIFU

Daudi na Mefiboshezi

¹ Lidiku lilala Daudi yateva, “Aveeye ho nu mulala uwatigala ku vandu avinyumba ya Saolo? Niiva aveeye ho, ndakayanzi kumumanyia zimbavasi kigira Jonazani.”

² Yaali ho mutumikiri wa vandu avinyumba ya Saolo uwalangwa Ziba. Mwami yamuteeva, “Ivi niyie Ziba?” Naye yativura, “Mbeeye hano mutumikiri woovo.”

³ Mwami yamuteeva, “Aveeye ho numulala munyumba ya Saolo uwatigala uwanyala kokolera zimbavasi, kuli ndasuuviriza Nyasaye ndi ndakora?” Ziba yativura, “Akikiri yo mulala ku avayaayi va Jonazani. Aveeye mulema.”

⁴ Mwami yateeva, “Aveeye hayi?” Ziba yamutivulira, “Aveeye hango ha Makiri muyaayi wa Amieli mu lidaala lia Lodebari.”

⁵ Kunangwa Mwami Daudi yalaga aleetwe.

⁶ Lwa Mefiboshezi, muyaayi wa Jonazani na mwisukulu wa Saolo, yaduuka, yinamira Daudi kumuha uluyali. Daudi yavoola, “Mefiboshezi.” Naye yativura, “Mbeeye hano, mutumikiri woovo.”

⁷ Daudi yamuvolera, “Utatia mba. Ndakoveera zimbavasi kigira baba woovo Jonazani. Ndakwiranyira mulimi gwosi gwaali gwa guuga woovo Saolo, na ivi ulingirizwa kulia chukulia komesa yange kazozo.”

⁸ Mefiboshezi yaamwinamira kandi navoora, “Inzi simbeeye mulahi kuvita imbwa yakuza mba! Kigira ki ove mulahi ku inzi kuli ndio?”

⁹ Maku, mwami yalanga Ziba, mutumikiri wa Saolo, navoora, “Inzi mbana ku Mefiboshezi, mwisukulu wu munene woovo, vindu viosi sa kilala, iviali via Saolo na vandu avinyumba yeeye.

¹⁰ Ivi, harara na avayaayi vovo, mulayinzilira Mefiboshezi, mulalima mulimi gwigwe, na mumuleetere via mugesa, kunangwa vandu vinyumba ya Saolo harara na vatumikiri veve vaduuki konyoora viukulia. Navuzwa Mefiboshezi alalia harara ninzi komesa yange kazozo.” Ziba yaali na vayaayi komi natano kandi na avatumikiri sirini.

¹¹ Ziba yativura, “Inzi ndakora vindu viosi viu Mwami Wuvunyali wange alaga.” Kunangwa Mefiboshezi yaalia komesa kwu mwami munene kuli mulala ku avana vu mwami.

¹² Mefiboshezi yaali numuyaayi musoleri uwalangwa Mika. Avandu avinyumba vosi va ziba vaagwa avatumikiri va Mefiboshezi.

¹³ Kunangwa Mefiboshezi uwaali mulema virenge viombi, yamenya mu Jerusalemi, nalizaa viukulia viosi harara nu mwami.