2 Samweli 8 - KITABU KITAKATIFU

Uvuguuti vwa Daudi mu vulwani

¹ Inyima wa yaga, Daudi yingilira nukulwana avandu va Filisitia kandi, navaguuta kandi navugura lidaala lia Mezegi Ama kutura ku vandu va Filisitia.

² Maku yaguuta vandu va Moabu kandi. Yahaana lilago avahambe vagone hasi kandi niyiita vaviri ku vuli vavaga kuvo. Kunangwa vandu va Moabu vaagwa avatumikiri veve kandi vatuunga uvusuru kuye.

³ Maku Daudi yalwana nukuguuta mwami Hadadezeri, muyaayi wa Rehoba wa Zoba mu kivala cha Siria. Hadadezeri yaali nazizaa kugumira nukwirana kwamiiha kivala keveeye imutwi wu mugera gwa Efurate.

⁴ Daudi yagumira zibarasi elefu ndala ni zimia saba harara navahili vazio, kandi avasikari zielefu sirini vagenda kuvirenge. Daudi yaleka zibarasi zinyala kung'usa magare gu vulwani imia ndala, navuzwa yatema amaki gi zibarasi zindi ziosi.

⁵ Lwa vandu va Siria na Damasiko vaatuma liihi kuzia kokoonya Hadadezeri mwami wa Zobahi, Daudi yavingilira niyiita avasaza zielefu sirini na mbiri.

⁶ Ahene yaho Daudi yalomba hokososa ha amahi geege mu kivala chavo kandi vaagwa avatumikiri veve, nivatunga uvusuru kuye. Yahova yaaha Daudi uvuguuti havundu hoosi nahoosi.

⁷ Daudi yaavanyaga zikuuti zie zahabu zia avanene va hadadezeri valii nazio nazihila Jerusalemi.

⁸ Yavugula kandi migasa minyingi kutura mu madaala manene ga Beta na Berozai aga Hadadezeri yamiha.

⁹ Mwami Toi wa Hamazi yahulira ndi, Daudi yaveeye kuguuta liihi liosi lia Hadadezeri.

¹⁰ Kunangwa yatuma muyaayi weve Joramu ku mwami Daudi ukumucheliza kandi kumusandiza kigira kuguuta mwami Hadadezeri, uwu mwami Toi yaali niyalwaana naye haali kanyingi. Joramu yaahilira Daudi vihaanwa vinyingi ivialombwa ku zahabu, ifeza nu mugasa.

¹¹ Mwami Daudi yaavitakasa vitumikirwi mu lisigamira Yahova, harara ni feza, nizahabu viayaagumira kutura ku zihiiri zia yaali naguuti:

¹² Edomu, Moabu, Amoni, Filisitia, na Amaleki kandi vilala ku vilaanye via yavugula kutura ku Hadadezeri.

¹³ Lusuma lwa Daudi lwameedeka ligali lwa yirana kutura mu liita vandu va Edomu zielefu likomi na munane mu Livona lie Jumbi.

¹⁴ Yalomba hokososa ha mahi ga avasikari mu Moabu mwosi, na avandu uwene yeyo vaagwa avatumikiri veve. Yahova yahaana ku Daudi vuguuti havundu hoosi.

¹⁵ Daudi yamiha ku Isiraeli yoosi nalora ndi avandu veve vakolerwa malungi kazozo.

¹⁶ Joabu uwa mama weve yaali Zeruya, yaali munene wi liihi. Jehoshafati muyaayi wa Ahiludi yasingiliri wi vindu viang'odwa.

¹⁷ Zadoku muyaayi wa Ahitubu na Abimeleki muyaayi wa Abiazari vaali avasaalisi; Seraya yaali mung'odi mu kiyaalo.

¹⁸ Benaia muyaayi wa Jehoyada yaali musingiliri wa vakerezi na vaperezi, na avayaayi va Daudi vaali avasaalisi.