2 Samweli 7 - KITABU KITAKATIFU

Lisuuvirizwa lia Nyasaye ku Daudi

¹ Mwami Daudi yiituulira munyumba yu Vwami yeeye kandi Yahova yamukinga kutura ku avasigu veve vosi.

² Maku Mwami yavolera muporofeti Nazani, “Menyi hano munyumba yumbakirwa midaragwa, navuzwa Lisandugu lie Lilagana lia Nyasaye liavikwa mu Lihema!”

³ Nazani yamutivulira, “Kola choosi choveeye nacho mu zing'anagani, kigira Yahova aveeye nivi.”

⁴ Navuzwa uvudiku yivwo, Yahova yavolera Nazani,

⁵ “Zia ovoolere mutumikiri wange Daudi ndi inzi muvooleraa, ‘Siaveeye ni ivi unyumbakira litembeli menye mu mba.

⁶ Kutura ing'inga ya ndahonyia avandu va Isiraeli kutura Egebeti kuduuka kalunu, sindamenya ku mu Litembeli mba; ndagendagendangi vuzwa nemenyi mu lihema.

⁷ Mu zing'endo ziange ziosi harara na avandu va Isiraeli sindateeva ku mundu kali mulala ku aviimiliri va ndaatovora ndi, kigira ki vakikiri kunyumbakira Litembeli liumbakirwa midaragwa.’

⁸ “Kunangwa volera mutumikiri wange Daudi ndi, inzi Yahova wanyala Viosi muvooleraa, ‘Ndaakuvugura kutura mu liaya amagondi mu milimi kandi ningokola ove mwamihi wa avandu vange Isiraeli.

⁹ Ndaaveyange nivi havundu hoosi ha waziyange, kandi mali kuguuta avasigu vovo vosi lwa wavingiriyange. Ndakokola umanyikane kuli aviimiliri vanene kandi avizingulu mu lirova liosi.

¹⁰ Mali kotovola havundu kigira avandu vange Isiraeli, kandi mali kuvaviikaho, na valamenya havundu yaho, vugira kudambizwa kandi. Vasaza vu vutindi vavuli kuvatulira kandi, kuli vaakora ku maziambiri;

¹¹ kutura lwa ndaatovora avakalagi vave ku avandu vange Isiraeli, ngusuuvirizaa ndi ndakuha lielemeriza kutura ku avasigu vovo vosi. Kali ndio ngovolera ndi, ndakuha visukululwi.

¹² Lwa ukuza na uyavilwi harara na avaguuga vovo, ndakora mulala ku avayaayi vovo kuva mwami munene kandi ndakora uvwami vwivwe kuva vwizingulu.

¹³ Niyie ulinyumbakira Litembeli kandi ndalora ndi endeve yu vwami vwivwe ilazizagilira mihiga ni mihiga.

¹⁴ Ndava baba weve, naye alava muyaayi wange. Lwakola uvudamanu, ndamuha amageri kuli baba wumwana ahaanaa mageri ku muyaayi weve.

¹⁵ Navuzwa sindatuliza ovokonyi vwange kuye mba. Kuli ndaakola kutura ku Saolo, wandatuliza ku vwami kunangwa ivi uduuki kuva mwami.

¹⁶ Visukululwi vivio viliikala kondeve yu vwami kazozo, na ndakora uvwami vuvwo vuhindiri mihiga ni mihiga. Uvwami vuvwo sivulava nekeheri mba.’ ”

¹⁷ Nazani yavolera Daudi ivindu viosi via Nyasaye yaali naamuvuuliyi.

Lisaala lia Daudi lie lisandiza

¹⁸ Maku mwami Daudi yazia mu Lihema liukuvuganira mu na Yahova, niyikara kandi nasaara, “Yahova Nyasaye Wuvunyali inzi kali vandu avinyumba yange sikuduukanaa nayaga ga umali kokokolera.

¹⁹ Nitali kalunu okolaa kali amanyingi ligali kuvita, O, Yahova umali kolomba lilagana kigira visukululwi viange mu mihiga jizaa. Oleki kandi mundu kolola yaga, O, Yahova Nyasaye Wuvunyali! Nyara komeeda kovora ki ku ivi!

²⁰ Ivi umanya inzi mutumikiri woovo.

²¹ Liali lilalira kandi lienya liilio kokora yaga; ivi umali kokora vindu vinene yivi uduuki kunzigiza.

²² Ivi oveeye munene kuli ndi, O, Yahova Nyasaye Wuvunyali! Siaveeye ho nu wundi kuli ivi; kunyi kwamanya kazozo ndi ivi oveeye munene, O, Yahova Nyasaye Wuvunyali.

²³ Sihaveeye ho ni ihiiri yindi ku lirova kuli Isiraeli, ya ivi wahonyia kutura mu vutugwa mu kivala cha Egebeti, ukuvalomba vave avandu vovo ivi mwene. Vindu vinene kandi viokogenyia via wavakolera vimali kulandiza ulusuma lulwo mu lirova liosi. Ivi wakunga zihiiri zindi na avanyasaye vaavo lwa avandu vovo vazizagilira kuvingilira nukulwana navo, avandu va ivi wavoholola kutura Egebeti kuva avoovo ivi mwene.

²⁴ Umali kokora Isiraeli kuva avandu vovo ivi mwene mihiga ni mihiga; kandi ivi Yahova, umali kuva Nyasaye wavo.

²⁵ “Na kalunu, Yahova Nyasaye, dukiza ku zing'inga ziosi, lilagana lia walomba ku inzi kandi visukululwi viange, na okole ga wavoola ulakola.

²⁶ Ulusuma lwi limanyikana liilio lulava lonene, kandi avandu valavoora mihiga ni mihiga; ‘Yahova Wuvunyali, aveeye Nyasaye ku Isiraeli.’ Ivi ulalinda endeve yu vwami vwange mihiga ni mihiga.

²⁷ Yahova Wuvunyali, Nyasaye wa Isiraeli! Inzi mbeeye nuvuluviliri kusaala lisaala yili ku ivi kigira ivi umali kumbuulira amakuva yaga goosi; inzi mutumikiri woovo umali kombolera ndi ulakola visukululwi viange kuva avami.

²⁸ “Kandi kalunu, Yahova, Wuvunyali, ivi oveeye Nyasaye; ivi utwekizaa lilagana liilio kazozo, kandi umali kolomba lilagana liilio kuva lio kogenyia inzi.

²⁹ Inzi ngoteva nuyanza, ugasize visukululwi viange kunangwa valazizagiliri kusangalira zimbavasi, zizio. Ivi, Yahova Wuvunyali, umali kusuuviriza yaga, kandi uvugasu vuvwo vulava ku visukululwi viange mihiga ni mihiga.”