2 Samweli 4 - KITABU KITAKATIFU

Liitwa lia Ishiboshezi

¹ Lwa Ishiboshezi, muyaayi wa Saolo, yahulira ndi Abineri umali kwitirwa mu Heburoni, yaali nuvuti ligali. Kandi avandu vosi va Isiraeli vahenda mwoyo ligali.

² Ishiboshezi yaali na avanene vaviri avaari aviimiliri vi miganda jukwingilira nukulanya avalangangwa Baana na vilaanye avalangangwa Baana na Rekabu, avayaayi va Rimoni kutura mu lidaala lia Beerozi, kutura mu ihiiri ya Benjamini. Beerozi, livalizangwa kuli kedonye chi kivala cha Benjamini.

³ Avandu va Beerozi vaali vukutanga vaali ni virukira Gitaimu, uwa vamenyi kutura lwene yilwo.

⁴ Kisukulwi kindi cha Saolo chaali muyaayi wa Jonazani uwalangangwa Mefiboshezi, uwaali ni mihiga jitano lwa Saolo na Jonazani viitwa. Lwa amakuva gi likuza liavo gaaza kutura mu lidaala linene lia Jezireeli, umuleli weve yamuginga niyiruka naye; navuzwa yaali mu lididikana lie zimbiru zinene, yagwa hasi, ma naalema.

⁵ Rikabu na Baana vaatura kuzia munyumba ya Ishiboshezi, nivaduuka yo ahimbi mbasu hagati ing'inga ya yaali naveeye mu lisosa lilie lia mbasu.

⁶ Mukali mulindi wi kiliango yaali naaserezaa ingano, navuzwa yaatanga kotengeza ma naagona; kunangwa Rikabu na Baana amwavo weve vanyenyeka ni vingira mu.

⁷ Lwa vaali nivaveeye munyumba, vazia mu keng'oze cha Ishiboshezi yaali naagonaa zindoolo, ma nivamwita. Maku vakala mutwi gwigwe ni vazia nagwo, kandi vagenda uvudiku vwosi kuvitira mu livona lia Jorodani.

⁸ Vaahana mutwi gwa Ishiboshezi ku mwami Daudi ha Heburoni, nivamuvoolera, “Ngugu umutwi gwa Ishiboshezi, muyaayi wu musigu woovo Saolo, uwageriza kukwita. Kalunu Yahova uvugiliyi Mwami wiitu kuvanza kisaalia ku Saolo na visukululwi viivie.”

⁹ Daudi yavativulira, “Nzisuha ku Yahova oveeye mwoyo, uwaambonyia kutura ku vuhimwa vwosi!

¹⁰ Mutumwa uwaza ku inzi ha yaganagana nambolera likuza lia Saolo yaganagana yandetera makuva malahi. Ndamugumira, ma nimwiita. Yago nigo amadanyi ga ndaamuha ku makuva malahi geege!

¹¹ Vulava vudamanu ligali kuli ndi, ku avandu vadamanu avamali ku rumindaa mundu mulungi naagoni ku kidali munyumba yeeye mwene! Inzi ndavanza kisaalia ku munyi kalunu kigira limwita kandi ndamweeya muturi mumoni mwi lirova!”

¹² Daudi yahaana lilago ku avasikari veve ma ni vita Rikabu na Baana; kandi vakala makono gaavo nivirenge viavo, ivia vaasunga ahimbi ni lidavalia lia Heburoni. Vaavugura mutwi gwa Ishiboshezi kandi nivaguyavira mu kilindwa cha Abineri ha Heburoni.