2 Samweli 3 - KITABU KITAKATIFU

¹ Uvulwani hagati ha amahi aguungaa avinyumba ya Saolo mukono na yavo avungaa Daudi mukono vwazizagilira ku ing'inga indambi. Daudi yamedeka zinguru ligali, navuzwa avasigu veve vazizagilira kogeeha zinguru ligali.

Avayaayi va Daudi

² Yava na avayaayi sita ava Daudi yivulira ha Heburoni kolondekana ni liivulwa liavo: Amunoni uwa mama weve yaali Ahinoamu kutura Jezireeli;

³ Kileabu uwa mama weve yaali Abigaeli mukunzakali wa Nabalia, kutura Karimeli; Abisolomu uwa mama weve yaali Maaka, mukaana wu mwami Talimai kutura Geshuru;

⁴ Adonija uwa mama weve yaali Hagizu; Shefatia uwa mama weve yaali Abitali;

⁵ Ezireamu uwa mama weve yaali Egila. Avayaayi yava vosi vivulirwa mu Heburoni.

Abineri yiyunga na Daudi

⁶ Lwu uvulwani vwazizagilira hagati ha amahi gaali amasuuvirifu ku avi inyumba Saolo na aga Daudi, Abineri yaali ni zinguru ligali hagati ha avalondi va Saolo.

⁷ Lidiku lilala Ishiboshezi muyaayi wa Saolo yayaala Abineri ndi aheyi na Rizipa mukaana wa Aia, uwaali mulala ku avakali vaviika Saolo.

⁸ Yaga galombaa Abineri kuvihilirwa ligali. Abineri yateeva, “Uganaganaa inzi niimbwa itali novokonyi kutura Ivuyuda? Kutura mu litanga liene, inzi ndava musuuvirifu kubaba woovo Saolo, avamwavo veve, na avalina veve; kandi mali kohonyia ivi ku livula kuguutwa na Daudi, na henza, kalunu, uviikaa ku inzi amahiolo ku makuva gu mukali uyu!

⁹ Nyasaye ambe mageri niiva sindakolera Daudi aga Yahova yamusuuviriza

¹⁰ kandi mbane uvwami kutura ku Saolo ni kisukururwi chiche, nukusingiliza endeve yu vwami ya Daudi ku Isiraeli na Ivuyuda kutura ku Dani mu ivaale kuzia ku Beerisheba Isavaalu.”.

¹¹ Ishiboshezi yatia Abineri ligali kali siyaali anyala kovora likuva mba.

¹² Abineri yatuma avatumwa ku Daudi, uwaali ha Heburoni ku ing'inga yeyo, kovora, “Nivwaha uzizaa kwamiiha kivala yiki? Lomba lilagana niinzi, na inzi ndakokonya uguuti avandu va Isiraeli vosi kuuza ku lovega lulwo.”

¹³ Daudi yativura, “Vulahi! Inzi ndalomba lilagana nivi ku livugilirizana lilala: kuduuka ondeetere Mikaili, mukaana wa Saolo, lwa uzaa kondola.”

¹⁴ Daudi naye kandi yatuma avatumwa ku Ishiboshezi kovora, “Nziranyira mukali wange, Mikaili. Ndaatunga uvukwi vwa magodo ga maduumi ga vandu va Filisitia 100 ku nimuleeta.”

¹⁵ Kunangwa Ishiboshezi yaamutuliza ku musaza weve Palitieli, muyaayi wa Laishi.

¹⁶ Palitieli yamulonda kunzira yoosi kuduuka mu lidaala lia Bahurimu, nalira lwa yaazizaa, navuzwa Abineri yamuvolera, “Yirana yengo.” Yakola ndio.

¹⁷ Abineri yazia ku aviimiliri va Isiraeli navavoolera, “Ku ing'inga indambi, munyi mwayenya Daudi ave mwami winyu.

¹⁸ Kalunu uvwiyangu vwinyu nivwo yivu. Mwizurizi ndi Yahova yamala kovora, ‘Ndatumikira mutumikiri wange Daudi okohonyia avandu vange Isiraeli kutura ku vandu va Filisitia kandi kutura ku avasigu vaavo vandi vosi.’ ”

¹⁹ Abineri yamoloma kandi ku avandu va ihiiri ya Benjamini, ma kandi nazia Heburoni kovoolera Daudi icha avandu va Benjamini na Isiraeli vaali nivavugiliyi kokora.

²⁰ Lwa Abineri yazia ku Daudi ha Heburoni naveeye na avasaza sirini, Daudi yavalombela lilia.

²¹ Abineri yavolera Daudi, “Inzi ndazia kalunu nu kuvungiza Isiraeli vosi vave ku lovega lulwo mwami wange. Valakuvugilira kuli mwami wavo na ivi ulanyora icha wenyaa kandi ulamiha ku vandu va Isiraeli vosi.” Daudi yaleka Abineri azie mu mirembe.

Liitwa lia Abineri

²² Inyima wa yaga, Joabu harara na avanene vandi va Daudi virana kutura mu lingilira nukulwana, nivaleeta vilaanye vinyingi. Abineri, siyaali ha Heburoni na Daudi, kigira Daudi yaali naamutumi azie nililagana lie ni mirembe.

²³ Lwa Joabu harara na avasaza va yaali navo vaduuka, yavolerwa ndi Abineri yaali kuuza ku Mwami Daudi kandi umuleki aziyie mu mirembe.

²⁴ Kunangwa Joabu yazia ku mwami namuvolera, “Okoli ki? Abineri yaazi ku ivi, kigira ki nooleka azie kuli ndio?

²⁵ Yaazi hano kukugada kandi ukwenya kumanya vindu viosi via okolaa kandi havundu hoosi aha uziizanga. Ligali ivi umanyi ndio!”

²⁶ Inyima wokoleka Daudi, Joabu yatuma avatumwa kuzia koleta Abineri, kandi vaamwiranyia kutura ha kidaho cha Sira; navuzwa Daudi siyamanya kindu choosi ku amakuva yaga mba.

²⁷ Lwa Abineri yaduuka mu Heburoni, Joabu yamuhira halovega ha kirivwa, kuli uwenyaa komoloma naye mu mambisu, na uwene yeyo yaamutooza munda. Nandio Abineri yitwa kigira naye yita Hazaeli amwavo Joabu.

²⁸ Lwa Daudi yahulira amakuva yaga, yavoola, “Yahova amanya ndi avandu vange harara niinzi koveeye vugira niimbala ligali ku liitwa lia Abineri muyaayi wa Neri.

²⁹ Amageri kigira liitwa yili gagwiri Joabu kandi avinyumba yeeye! Mu vuli likula, have nu mundu mu avinyumba yeeye nuvulwaye vwi kisununu anoho oveeye novogere anoho udukana kokora miyinzi ju mukali uwidiraa mudigiru anoho uwiitwa mu vulwani anoho ogehera viukulia.”

³⁰ Kunangwa Joabu na amwavo weve Abishai vaavanza kisaalia ku Abineri kigira liita lia amwavo wavo Asaheli mu vulwani ha Gibeoni.

Litevwa lia Abineri

³¹ Ahene yaho Daudi yalaga Joabu harara na avasaza vi liihi veve vosi ukutandula zinguvu, nukwivika magunia nukusiomera Abineri. Mu ing'inga yi liteevwa lia Abineri, Mwami Daudi yagenda inyima wi lisandugu.

³² Abineri yayavirwa ha Heburoni, nu umwami yiikuula vudinyu ligali ha kilindwa cha Abineri, kandi avandu vosi vaakora kuli ndio.

³³ Daudi yimba lwimbu lwi lisioma yilu kigira Abineri: “Kigira ki Abineri nakuza kuli musiru?

³⁴ Amakono geege sigavofwa mba, kandi virenge vivie siviavofa niminyororo mba, yakuza kuli mundu uwiitwa na vadamanu!” Na avandu vamusiomera vudinyu kandi.

³⁵ Lidiku liosi, avandu vageriza kumuniga mbula alie kindu, navuzwa Daudi yisuha navoora, “Nyasaye anzite niiva inzi ndalia kindu ku choosi liuva nikikiri koyeera.”

³⁶ Vavugura makuva gene yaga kandi vayanzizwa nago ligali. Ligali, vindu viosi viu mwami yakola viayaanziza avandu.

³⁷ Avandu vosi va Daudi kandi avandu vosi va Isiraeli vamanyiriza ndi mwami siyaali nilisanga mu liitwa lia Abineri mba.

³⁸ Mwami yavolera avanene veve, “Simumanya ndi mwimiliri munene umali kukuza lidiku yili mu Isiraeli?

³⁹ Kali niiva inzi mbeeye mwami waatovolwa na Nyasaye, mbeeye mudedekere lero. Avayaayi va Zeruya yava vaveeye avandu vu kutumikira zinguru ligali kuvita inzi. Nyasaye ahaane amageri kuvo kuli gavadukiraa.”