2 Samweli 24 - KITABU KITAKATIFU

Daudi avalizaa vasaza vu kulwaana

¹ Yahova yaali nu vutima na vandu va Isiraeli ligali, kandi yakola Daudi aleete uvudinyu kuvo. Yahova yamuvolera, “Zia uvalizi avandu va Isiraeli ni Ivuyuda.”

² Kunangwa Daudi yahaana malago ku Joabu, munene wi liihi lilie: “Zia harara na vatumikiri vovo muvitiri mu zihiiri ziosi zia Isiraeli kutura ku keheri cho lovega lwa Dani kuduuka ku lovega lwa Beerisheba na uvalize avasaza vosi avanyala kulwaana. Nyenya kumanya vaveeye vanga.”

³ Navuzwa Joabu yativulira mwami, “Yahova Nyasaye woovo ameede amahi googo haali mia, kandi zimoni ziu munene wange umwami zilole inguuva yiyi niyeekoleka. Navuzwa kigira ki munene wange umwami niyenya kokora kindu kuli yiki?”

⁴ Navuzwa mwami yakola Joabu na vatumikiri veve kuhulira lilago lilie; vaatura imbiri weve ni vazia ichova kuvaliza avandu va Isiraeli.

⁵ Inyima wukwambuka mugera gwa Jorodani, valomba hokososa Isavaalu wa Aroeri, lidaala linene mugati mwi livona, mu kivala cha Gadi. Kutura yaho, vazia Ivaale kuduuka mu lidaala lia Yazeri,

⁶ kandi kuzizagilira kuduuka Gileadi kandi kuduuka Kadeshi, mu kivala cha vandu va Hiti. Maku vazia kuduuka Dani kandi kutura Dani vazia imadioli wa Sidoni.

⁷ Maku vazia isavaalu wi lidaala linene liakumberizwa ilumbakwa nu lugaga lwa Tiro, kuduuka ku madaala manene ga vandu va Hivi na vandu va Kanaani, na lwukumaliriza vaduuka Beerisheba, mu kedonye chi Isavaalu wi kivala chi Ivuyuda.

⁸ Kunangwa inyima wi mieli tisa na madiku sirini, viirana Jerusalemi, nivakagenda kuvitira mu kivala choosi.

⁹ Valeta makuva ku mwami kolondekana ni livaliza lia avasaza vosi avanyala kokora uvutumiki vwa mahi. Mu Isiraeli vaali mu vasaza 800,000, na mu Ivuyuda vaali mu 500,000.

¹⁰ Navuzwa inyima wa Daudi yaali niyakamara livaliza, zing'anagani ziu mumwoyo gwigwe ziatanga limukubiza kivi kandi yavolera Yahova, “Mali kokora uvwoni vudamanu ligali, mu likora kindu yiki. Mwaza usamihi. Mali kokora vusiru.”

¹¹ Daudi nakikiri kuvuuka mugamba gwalonda ku, likuva lia Yahova liali ni liizi ku muporofeti Gadi, muvuuli wa Daudi:

¹² “Zia ovoolere Daudi, yiki nicho cha Yahova avoora: Ngoheza vindu vivaga, tovola ku kilala. Ndakora choosi cha otovola.”

¹³ Kunangwa Gadi yazia ku Daudi namuvolera icha Yahova yaali navooye, kandi nateeva, “Ni kiliha kuvio icha otovola okolerwe? Mihiga jivaga ji inzara, mu kivala chicho, anoho mieli jivaga ji liruka kutura ku avasigu vovo, anoho madiku gavaga gi likuywa nuvulwaye vudamanu mu kivala chicho? Kalunu ganaganyia amakuva yago kandi na ombolere ni litivuli ki lianziranyira Yahova?”

¹⁴ Daudi yavolera Gadi, “Mbeeye mu kivi kenene ligali. Leki kugwi mu makono ga Yahova, kigira zimbavasi zizie liveeye linene; navuzwa utaleka inzi ngwi mu makono ga avandu mba.”

¹⁵ Kunangwa Yahova yatuma uvulwaye kumala vandu va kukuya Isiraeli kutura mugamba yigwo kuduuka keheri chi ing'inga yalagwa avandu zielefu sabini vaakuza.

¹⁶ Lwe engelosi yanyira mukono gwigwe kudiviza Jerusalemi, Yahova yaali novovereri ligali kigira ikivi kandi navolera engelosi uwaali nahaana amageri ku avandu, “Gaduuki! Lekera kuhaana mageri googo.” Engelosi wa Yahova yaali ulwene yilwo ha aloze lwa Arauna Umujebusi.

¹⁷ Daudi yalora engelosi uwaali niyiita avandu, kandi navolera Yahova, “Inzi niyie uhioye. Ni inzi okoli uvudamanu. Avandu vadaka yava vakoli ki? Gadukanaa ombe amageri na avinyumba yange.”

Daudi yumbaka uvwali

¹⁸ Ku lidiku yilio Gadi yazia ku Daudi namuvolera, “Yanigira uzie kwumbakira Yahova uvwali ku oloze lwa Arauna Umujebusi.”

¹⁹ Kunangwa Daudi yahulira lilaga kandi nazia kuli Gadi yaali namuvooleye.

²⁰ Lwa Arauna yahenza, yalora mwami na avandu veve nivaazaa kuye, yatura ichova niyinama imbiri wu Mwami nahenzi hasi.

²¹ Yateeva, “Kigira ki mwami wange niyazaa ku mutumikiri weve?” Daudi yativura, “Yaazi ukugula oloze lulwo, kunangwa nduuki kwumbakira Yahova uvwali, ndi uvulwaye ku avandu vaduuki koherizwa.”

²² Arauna yavoola, “Leka munene wange umwami avuguli choosi ikikuyanzizaa na kukihaane. Zigiriki yizi ziveeye hano kusambwa kuli kihanwa chukusambwa ku vwali zana; kandi ziniira ziazio kandi vivango viveeye hano ukutumikirwa kuli zingu.”

²³ Arauna yaaluhaana lwosi ku mwami namuvolera, “Yahova Nyasaye woovo avugiliri kihanwa chicho.”

²⁴ Navuzwa mwami Daudi yativura, “Awa, ndavugura kutura ku ivi sindahaana kisiuviriru ku Yahova Nyasaye wange vihaanwa viukusambwa via inzi ndatungi mba.” Kunangwa Daudi yaagula oloze nizing'ombe kandi naatunga vidonye vie ifeza hamusini.

²⁵ Maku yumbakira Yahova uvwali kandi nahaanira ku vihaanwa viukusambwa kandi vihaanwa viemirembe. Yahova yaavugilira lisaala lia Daudi, kandi uvulwaye vudamanu vwalekera mu kivala cha Isiraeli.