2 Samweli 23 - KITABU KITAKATIFU

Amakuva ga Daudi gukumaliriza

¹ Daudi muyaayi wa Jese yaali mundu uwa Nyasaye yakola munene, uwa Nyasaye wa Yakobo yatovola kuva mwami munene, kandi mung'odi wi zinyimbu zindahi ligali kigira Isiraeli. Yaga na makuva gukumaliriza ga Daudi:

² Roho wa Nyasaye amolomaa kuvitira mu inzi: Makuva geege gaveeye mu munwa gwange.

³ Nyasaye wa Isiraeli umali komoloma; mukingi wa Isiraeli yambolera: “Mwami wamihaa nuvulungi, uwamiha mu liitia Nyasaye.

⁴ Aveeye kuli liuva litongaa aveeye kuli uvulavu vwa mugamba liuva nilitongaa, ku mugamba gutaveeye na malesi; kuli uvwaku vwi liuva ku vulimu inyima wi imbura, isivukizaa uvulimu kutura mu marova.”

⁵ Kandi nindio Nyasaye aligasiza kisukururwi change, kigira umali kolomba lilagana lie mihiga ni mihiga ninzi, lilagana ililivula kuvunanywa, lisuuvirizwa ililivula kugirung'anywa. Yicho nicho choosi (ichanzegombaa); ikiliva liguuta liange, Na Nyasaye alakakitwekizi.

⁶ Navuzwa avandu vatamanyi Nyasaye vaveeye kuli amafwa gasiuvwa ihale, avula ho nu mundu ugadiira namakono ameere.

⁷ Kuduuka utumikiri ikiju chi kivia anoho litimu; vilasambwa ligali.

Avasikari vi zinguru va Daudi

⁸ Yaga na amita ga avasikari vi liihi va Daudi: Wukutanga yaali Joshebu Bazisheba, kutura Taokemoni, uwaali mwimiliri wa “Vavaga zana”; yalwana avandu vasaza mia nane naveeye ni litimu vuzwa, kandi naviita vosi mu vulwani vulala vuzwa.

⁹ Wakaviri ku vahaga vavaga yaali Elieza muyaayi wa Dodo, uwi kiliango cha Aho. Lidiku lilala oyo harara na Daudi vatangiza uvutindi ku vandu va Filisitia avaari nivavungi ha Pasi Damimu ukulwaana Ahene yaho, Avasaza va Isiraeli viirana inyima,

¹⁰ navuzwa yasingira vudinyu nalwaana vandu va Filisitia kuduuka lwu mukono gwigwe gwaruha kandi niguhanda ku kivavi, na siyaali anyala kukilakula mba. Yahova yaguuta uvuguuti vonene ligali lidiku yilio. Inyima wa vwali nivwakahera, vandu va Isiraeli viirana ahu Elieza yaali, kandi nivatuliza isalamba ku vakuzu.

¹¹ Uwakavaga ku avamanyikana vavaga yaali Shama muyaayi wa Agee, kutura Harari. Avandu va Filisitia vaali nivavungi ha Lehi, ahu mulimi gwi zimbindi gwaali. Avandu va Isiraeli viiruka kutura ku vandu va Filisitia,

¹² navuzwa Shama yasingira vudinyu mu mulimi, naagosoola, kandi yita vandu va Filisitia vosi. Yahova yaguuta liguuta linene ligali lidiku yilio.

¹³ Ahimbi mu litangilira lie ing'inga yiligesa, vavaga kuyavo “Salasini” vasulunguta kuduuka haluhangaywa lwu Adulamu, aha Daudi yaali, lwa muganda mukekeeke gwa vandu va Filisitia gwalomba hokososa mu livona lia Refaimu.

¹⁴ Ing'inga yeyo, Daudi yaali ku kiguru chumbakwa lugaga lwa vasikari, kandi muganda gwa vandu va Filisitia gwaali niguvuguyi Bezelehemu.

¹⁵ Daudi yaali na mahooru kolola yengo navoora, “Kimba mundu yandetera amazi gukunwa kutura mu kidaho ha kirivwa cha Bezelehemu!”

¹⁶ Kunangwa avasikari vavaga vizingulu vavitira hagati ha ahokososa hi liihi lia vandu va Filisitia, nivadaha ku amazi kutura mu kidaho, kandi nivaha Daudi. Navuzwa siyaganwa mba, mu vogono yivwo, yagasundula kuli kihanwa ku Yahova;

¹⁷ kandi navoora, “Yahova, sindali ndakanweeye amazi yaga mba! Gakaveeye kuli linwa amasahi ga avasaza yava avaviika livamwoyo liavo muvuhimwa!” Kunangwa yasura kuganwa. Yivio viali vikolwa viuvuluviliri via avasikari vavaga.

¹⁸ Abishai, amwavo Joabu, (uwa mama wavo yaali Zeruya) yaali mwimiliri wa “Vahaga salasini.”

¹⁹ Yalwana ni litimu lilie avasaza zimia zivaga kandi naviita, kandi naagwa muhaga hagati ha, “Vahaga salasini,” ma naagwa mwimiliri wavo, navuzwa siyaali muhaga kuli “Vavaga zana.”

²⁰ Benaia muyaayi wa Jehoyada, kutura Kabuzeeli yaali musikari muhaga wundi. Yakola vikolwa viuvuluviliri ligali, harara ni liita avalwaani vanene va vandu va Moabu vaviri. Lidiku lilala, yika mu Luhangaywa ku ing'inga yuvukindu niyiita king'ang'a.

²¹ Kandi yita mu Egebeti mundu munene uwaali nilitimu liu vulwani. Benaia yaamutulira nikigurumi chiche, niyikuba litimu kutura mu makono gu Muegebeti; kandi namwiita nalio.

²² Yivio viali vikolwa viuvuluviliri via Benaia, uwaali mulala ku salasini zana.

²³ Yaali wuluyali hagati haavo, navuzwa siyaali muhaga kuli “Vavaga zana.” Daudi yamuvika kuva munene wu vulindi vwivwe.

²⁴ Hagati ha salasini vaali ho: Asaheli amwavo Joabu, Elihanani muyaayi wa Dodo kutura Bezelehemu,

²⁵ Shama na Elika kutura mu lidaala lia Harodi,

²⁶ Helezi kutura mu lidaala lia Paleti, Ira muyaayi wa Ikeshu kutura mu lidaala lia Tekoa,

²⁷ Abiezeri kutura mu lidaala Anazozi, Mebunai kutura mu lidaala lia Hushai,

²⁸ Zalimoni kutura mu lidaala lia Ahohi, Maharai kutura mu lidaala lia Netofa,

²⁹ Helebu, muyaayi wa Baana kutura Netofa. Itai muyaayi wa Ribai kutura Gibea mu kivala cha Benjamini.

³⁰ Benaia kutura mu lidaala lia Pirazoni, Hidai kutura mu lidaala liveeye mwivona ahimbi Gaashi,

³¹ kandi Abialiboni kutura mu lidaala lia Araba Azimavezi kutura Bahurimu,

³² Eliaba kutura mu lidaala lia Shaaliboni, avayaayi va Jasheni, Jonazani

³³ Shama kutura Harari, Ahiamu muyaayi wa Sharari, kutura Harari.

³⁴ Elifeleti muyaayi wa Ahasibai, kutura maaka, Eliamu muyaayi wa Ahizofeli kutura mu lidaala lia Gilo,

³⁵ Hezoroni kutura mu lidaala lia Karimeli, Paarai kutura Araba,

³⁶ Igali, muyaayi wa Nazani kutura mu lidaala lia Zoba, Bani kutura mu lidaala lia Gadi,

³⁷ Zeleki kutura mu lidaala lia Amoni, naharai kutura mu lidaala llia Beerozi, mugiingi wi inguuva ya Joabu, muyaayi wa Zeruya,

³⁸ Ira na Garebu kutura mu lidaala lia Yatiri,

³⁹ Kandi Uria Umuhiti vosi vaali avandu salasini na saba.