2 Samweli 22 - KITABU KITAKATIFU

Lwimbu lwu Vuguuti vwa Daudi

¹ Lwa Yahova yahonyia Daudi kutura ku Saolo kandi ku vasigu veve, Daudi yimba lwimbu yilu ku Yahova:

² Yahova aveeye mukingi wange, Aveeye imbinga yange yi zinguru, kandi muhonyi wange.

³ Nyasaye wange aveeye chukwivisa mu change, aveeye inguva yange kandi zinguru zio vohonyi vwange. Aveeye imbinga yange, chu kwivisa mu change kandi muhonyi wange; ivi ombonyia kutura ku vasigu vange.

⁴ Nzanira Yahova, udukana kwizominywa, kandi mbonyia kutura ku vasigu vange.

⁵ Viguvuli vie likuza viangumbiriza, migera jukudiviza jambita nizinguru.

⁶ Uvuhimwa vwi likuza vwangumbiriza, mutego gwi likuza gwaduuka ku inzi.

⁷ Ndaanira ku Yahova, mu kivi change ndanira ku Nyasaye kutura mu litembeli lilie yahulira mwoyo gwange, lilira liange liaduuka mu matu geege yahuliriza ku lilira liange kigira ovokonyi.

⁸ Maku lirova liatenga nilidegera misinai ji ligulu jadengeya, kigira Nyasaye yaali nu vutima!

⁹ Mwoki gwasunduka kutura mu muulu geege, muliru gulizaa gwatura mu munwa gwigwe; Amanda gu muliru gwaduuka kutura mu munwa gwigwe.

¹⁰ Yavukanyia ligulu kandi niyiika hasi, kisundi kenene chaali isi wi virenge vivie.

¹¹ Yikala ku mukerubi weve, nabuluka, yaloleka ku zimbaha zie imbuza.

¹² Yifuma umwene ni kisundi; malesi mamwamu, nigiizuyi amazi, gamukumberiza;

¹³ Amanda gumuliru gaaka kutura mu loheni imbiri weve.

¹⁴ Maku Yahova yaatululukiza inguba kutura mwigulu, kandi mwoyo gwa Nyasaye Wuvunyali gwahulirika.

¹⁵ Yalasa mivano ju uvuta vwivwe kandi yaasalanyia avasigu veve; Yavakunga ni lihemahema lie zimbeni.

¹⁶ Lwaalo lwi inyanza lwakolwa hazwa, kandi misingi ji lirova jakunulwa lwa Yahova yagondokera avasigu veve, kandi nuvafuumira nu vutima.

¹⁷ Yahova yaduuka hasi kutura igulu, kandi naang'umira. Yang'usa inzi kutura mu mazi gu luliva.

¹⁸ Yambonyia kutura ku avasigu vange vizingulu kandi kutura ku yavo vosi avadunyira - vaali avizingulu ligali ku inzi.

¹⁹ Lwa ndaali mu kivi, vanzingilira, navuzwa Yahova yasoola.

²⁰ Yangoonya kutura mu vuhimwa; yambonyia kigira ndamuyaanziza.

²¹ Yahova yamba madanyi kigira ngolaa vulahi, yangasizaa kigira simbeeye niimbala mba.

²² Mali kugumira lilaga lia Yahova Ngikiri kugirung'ana kutura ku Nyasaye wange mba.

²³ Mali kolonda malago geege goosi, kandi sindaleka amalago geege.

²⁴ Yamanya ndi inzi mbeeye vugira imbara kandi ndayigaya ku likora vudamanu.

²⁵ Nandio yambezaa madanyi kigira ngolaa agaveeye malungi, kigira amanya ndi simbeeye nimbala mba.

²⁶ O, Yahova, oveeye musuuvirifu ku yavo avaveeye avasuuvirifu ku ivi, kandi oveeye mulahi ligali ku yavo avaveeye avadukiru.

²⁷ Oveeye mulungi ku yavo avaveeye valungi. Navuzwa oveeye mululu ku yavo avachamu.

²⁸ Ivi ohonyia yavo avaveeye avahoma navuzwa ogehizaa yavo avaveeye avigingiri.

²⁹ Ivi O, Yahova, oveeye vulavu vwange ivi utulizaa ho kisundi change.

³⁰ Ivi ombeezaa zinguru kwingilira avasigu vange, kandi zinguru kuguuta zimbinga ziavo.

³¹ Nyasaye uyu, ivikolwa vivie viveeye vidukiru ligali, amakuva geege gaveeye agiligali! Aveeye kuli inguva ku vosi avenya likingwa lilie.

³² Yahova wengine aveeye Nyasaye; kandi niye yeng'ine oveeye mukingi wiitu.

³³ Ni Nyasaye ongoraa mbe ni zinguru; kandi akolaa inzira yange kuva inungi.

³⁴ Alombaa inzi kunyagula kuli virenge vie kisusu; yaanindaa mbe ni mirembe ku vigulu.

³⁵ Yanzigiza kuli nyara kulwaana vulwani; kunangwa nduuki unyala kutumikira uvuta vwizingulu ligali.

³⁶ Ivi ombeeye inguva yu vuguuti kandi ovokonyi vuvwo vokoli inzi munene ligali.

³⁷ Ivi ummali kuginga mburi kugumirwa, kandi ngikiri kugwa hasi kali hakuzu.

³⁸ Nondeleraa avasigu vange kandi mbaguuta; si sinndekaa kuvalondelera kuduuka lwa mbadiviza ligali.

³⁹ Ndaavatumita mu kuvadiviza ligali; vaagwa hasi nivaguutiywi.

⁴⁰ Ivi ombeezaa zinguru ziu kulwaanira (muvulwani) kandi liguuta ku vasigu vange.

⁴¹ Ivi okolaa vasigu vange ukwiruka kutura ku inzi; Ndivizaa yavo avandunyira.

⁴² Vanira ovokonyi, navuzwa siaveeye ho nu uvahonyia mba. Vanira ku Yahova, navuzwa siavativuliraa mba.

⁴³ Inzi mbasionoranyia, kandi ma vaagwa kuli luguki mbaduvagaa kuli ovodohi muzinzira.

⁴⁴ Ivi wambonyia kutura ku avandu vi liebaala walinda uvwamihi vwange ku zihiiri; avandu va inzi ndaavura kumanya vagwiyi vatumikiri vange.

⁴⁵ Avageni vinamaa imbiri wange, lwa vahulira inzi, vavezaa nuvuti.

⁴⁶ Vagotizanga uvuluviliri vwavo, ma vaza nivadegeranga kutura mu zimbinga ziavo.

⁴⁷ Yahova aveeye mwoyo! Mukingi wange yizominywe! Landiza ovonene vwa Nyasaye ombonyia.

⁴⁸ Nyasaye yambezaa liguuta ku vasigu vange kandi zihiiri mu zinguru ziange.

⁴⁹ Ombonyia kutura ku vasigu vange. O, Yahova, ivi ohezaa inzi iliguuta ku avasigu vange; kandi ukingaa inzi kutura ku avasaza vu vutindi.

⁵⁰ Kigira yaga ndakwizominya O, Yahova, hagati hi zihiiri; Ndakwimbira zinyimbu zie lizominya lieta liilio.

⁵¹ Nyasaye ahaanaa liguuta linene ku mwami munene weve; kandi amanyia uvuyanzi vutaveeye nekeheri ku uyu uwamali kotovola. Kandi Daudi ni ivisukulurwi vivie mihiga ni mihiga.