2 Samweli 21 - KITABU KITAKATIFU

Visukululwi via Saolo viitawa

¹ Ing'inga yu vwamihi vwa Daudi, inzara yaali ho induru ligali ku ing'inga yi mihiga jivaga. Kunangwa Daudi yateeva Yahova kivuni chayo; Yahova yavoola, “Saolo harara na avinyumba yeeye vaali namahiolo gu vurumindi, kigira yita avandu vilidaala lia Gibeoni.”

² Avandu va Gibeoni sivali vandu va Isiraeli mba, vaali muganda mukekeeke vandu va Amori ava vandu Isiraeli vasuuviriza kuvakinga; navuzwa Saolo yaageriza kuvadiviza kigira uvuha vonene vwivwe kigira avandu va Isiraeli ni Ivuyuda.

³ Kunangwa Daudi yalanga avandu va Gibeoni navavoolera, “Nyara kumukolera ki? Nyenya nzilanyie uvulahi ku vudamanu vwa mwakolerwa, kunangwa muduuki kugasiza avandu va Yahova.”

⁴ Vaamutivulira, “Ovolembani vwitu na Saolo harara na vandu avinyumba yeeye sivunyala kumalwa ni zahabu anoho ifeza mba, kandi kunyi sikwenyaa ukwita Umuisiraeli ku vosi kali mulala mba.” “Kunangwa, muganaganaa mukolere ki?” Daudi yateeva.

⁵ Vaativura, “Saolo yenya kudiviza kunyi kandi avuli koleka kali mulala ku kunyi ave mwoyo hoosi mu kivala cha Isiraeli.

⁶ Kunangwa tuliza avasaza vi kisukururwi chiche saba okohe, na kunyi kulavasunga imbiri wa Yahova ha Gibea, lidaala lia Saolo, mwami mutovole wa Yahova.” Mwami yativura, “Ndavahaana ku munyi.”

⁷ Navuzwa mwami Daudi yahonyia Mefiboshezi, muyaayi mutiga Jonazani mwisukulu, kigira lilagana lie liesuuha hagati ha Daudi na Jonazani.

⁸ Nitali mwami yavugula Arimoni na Mefiboshezi, avayaayi vaviri va Rizipa mukaana wa Aia yivula na Saolo. Kandi yavugula avayaayi vatano va Merabu mukaana wa Saolo, ava yivula na Adurieli muyaayi wa Barizilai, uwatulaa Mehola.

⁹ Daudi yavahana mu makono ga avandu va Gibeoni avamanya nivavasunga mu kiguru imbiri wa Yahova. Vosi saba vaakuza harara. Yiyi yaali ing'inga yi litanga yi ligesa lie ingano lwa vosi viitwa.

¹⁰ Maku Rizipa, mukali mbikaa wa Saolo, mukaana wa Aia, yatumikira zinguvu zia magunia kwelombera umwene lidili ku lwanda ukwimiviri mikuzu yijo jaali, kandi namenya ho kutura ku litanga lie ligesa kuduuka ing'inga yi imbura yaatanga kukuba ku miviri zana. Ing'inga ya mbasu, yakunga amanyonyi gavuli kuuza, kujilia, kandi ha vudiku, yaajikinga kutura ku zinyama ziu muvulimu.

¹¹ Lwa Daudi yahulira icha Rizipa yaali naakori,

¹² yazia navugura vigumba via Saolo na Jonazani kutura ku avandu va Jabeshi mu Gileadi. Vaali ni vajivugula kutura mu kiguti cha avandu vosi mu Bezishani, uwa avandu va Filisitia vaasunga miviri zana ku lidiku lia vita Saolo ku Kiguru cha Giliboa.

¹³ Daudi yavugula vigumba via Saolo na Jonazani kandi navungiza ivigumba via avasaza saba avaari nivasungwa.

¹⁴ Ahene yaho vaaviyavira mu kilindwa cha baba wa Saolo, mu lidaala lia Zela mu kivala cha Benjamini, kandi ni vakora ivindu viosi viu mwami yaali nalagi. Inyima wa yago, Nyasaye yavativulira lisaala liavo kigira kivala chavo.

Avandu va Isiraeli Valwaana Vandu va Filisitia

¹⁵ Vwali ho uvulwani vundi hagati ha vandu va Filisitia na vandu va Isiraeli, kandi Daudi na avasaza vu vulwani veve vazia kulwaana vandu va Filisitia. Ing'inga ndala yuvulwaani, Daudi yaaluha.

¹⁶ Ugundu gonene gwa Filisitia ugwalangwa Ishibi Benobu, gwaali nigugingi litimu liu mugasa iliali nuvulitu vwa ahimbi zikilo zivaga ni inusu, kandi gwaali nigwiviiki kivavi kihia, gwaganagana ndi gunyala kwita Daudi.

¹⁷ Navuzwa Abishai muyaayi wa Zeruya yaza kokoonya Daudi, niyingilira ugundu yigwo, kandi naagwita. Ahene yaho avasaza vi liihi va Daudi vaamwisuhira, nivavoora, “Siulazia kandi mu vulwani harara ni kunyi mba,” gase itaya ya Isiraeli ilasima.

¹⁸ Inyima wa yaga, avulwaani vwali ho na Vafilisitia ha Gobu lwa Sibekai kutura Hushai yita ugundu ugwalangwa Safu.

¹⁹ Vwali ho uvulwani vundi na vandu va Filisitia ha Gobu, na Elihanani muyaayi wa Jairi kutura Bezelehemu yita Goliati kutura Gazu, uwu luvango lwi litimu lilie lwali kuli musaala gwu muruguyu gwi kidali chu mulombi wi zinguvu.

²⁰ Maku vwali ho kandi uvulwani vundi ha Gazu, uwu ugundu gundi gwaali ugwayaanza kulwaana. Gwaali ni videte sita ku vuli mukono kandi ivino sita ku vuli kerenge; viosi sirini na vine. Gwaali kisukururwi chu gundu gwalangwa Rafu.

²¹ Yalegeriza vandu va Isiraeli, kandi Jonazani, muyaayi wa Shama amwavo Daudi, yamwita.

²² Yava vane vaali visukululwi vie imindu ja Gazu, kandi Daudi yita avandu veve vasaza.