2 Samweli 20 - KITABU KITAKATIFU

Liebaala lia Sheba

¹ Yaali ho mundu mulala wi miima midamanu mu lidaala lia Giligali uwalangwa Sheba muyaayi wa Bikiri, uwi ihiiri ya Benjamini. Yakuba kisiriva kandi naalangiriza ndi, “Koveeye ni kidieli ki mu Daudi, kandi koveeye na miandu ki mu muyaayi wa Jese! Vasaza va Isiraeli, gendi kuzie sa mulala yengo, weve!”

² Kunangwa vandu va Isiraeli valeka Daudi ni vazia na Sheba, navuzwa avasaza vi Ivuyuda vaali avasuuvirifu kuye, kandi valonda Daudi kutura ku mugera gwa Jorodani kuduuka Jerusalemi.

³ Lwa Daudi yaduuka hanyumba yu vwami mu Jerusalemi, yavugula vakali vaviika vaali likomi va yaali niyaaleka kulinda munyumba yu vwami, kandi yavavika hasi huvulindi vuduukiru. Yavaha vindu viosi via venya, navuzwa siyagona ku navo mba. Vaviikwa hasi huvulindi vuduukiru ku madiku gi livamwoyo liavo liosi nivamenyi kuli avakunzakali.

⁴ Mwami yalanga Amasa navoora, “Langa avasaza vosi vi Ivuyuda harara, na ove hano harara navo lidiku lilonda mugamba.

⁵ Kunangwa Amasa yazia kuvalanga, navuzwa siyirana ku ing'inga yu mwami munene yalaga mba.

⁶ Kunangwa mwami munene yavolera Abishai, Sheba muyaayi wa Bikiri alakuha kunyi uvudinyu vunyingi kuvita vwa Abisolomu. Vugula avasaza vange vi liihi na umulondelere gase alavugula amadara giitu gi zinguru agumbakwa nulugaga ludinyu na ahononoke kutura ku kunyi.”

⁷ Kunangwa avasaza vi liihi va Joabu yimiliraa avasikari valindi vu vwami vwa Daudi, kandi avasikari vandi vosi vaatura Jerusalemi harara na Abishai kuzia nivalondelera Sheba.

⁸ Lwa vaduuka ku lwanda lonene ha Gibeoni, Amasa yaavaganira. Joabu yaali niyiviiki zinguvu ziu vulwani, ni kivavi mu lwula lwacho nilovoheywi ku musibi gwigwe. Lwa yazia imbiri, kivavi chaagwa hasi.

⁹ Joabu yavolera Amasa, “Oveeye ndi, mulina wange?” Joabu yagumira zinderu zia Amasa numukono mulungi aduuki kumuvusa.

¹⁰ Amasa siyaali niyiikingi ku kivavi cha Joabu yaali nagumiyi mu mukono gwigwe gundi mba, maku Joabu yamutumita munda, na amala geege goosi gaasunduka hasi. Nonoho yakuza, kandi Joabu siyaaduya kandi mba. Ahene yaho Joabu harara na Amwavo weve Abishai valondelera Sheba.

¹¹ Mulala ku avasaza va Joabu yasingira ahimbi numuviri gwa Amasa kandi yalangiriza, “Mundu woosi oveeye ko lovega lwa Joabu na Daudi alonde Joabu vwangu!”

¹² Amasa yaali nagalagara mu masahi geege hagati hi inzira. Ku vosi uwaza ho, naamulora, yasingira. Lwu mulala ku avasikari va Joabu yalora avandu vosi vaza nivasingira, yaginga muviri yigwo kutura kunzira naguviika havulimu, ma nafuma ku mulingedi.

¹³ Inyima wu muviri kutulizwa munzira, avandu vosi valonda Joabu nivalondelera Sheba.

¹⁴ Sheba yaavitira muvivala vie zihiiri ziosi zia Isiraeli kandi niyazaa mu lidaala linene lia Abeli Bezi Maaka, kandi avandu vosi avikiliango cha Bikiri vavunga harara nivamulonda mu lidaala linene.

¹⁵ Lwa avasikari va Joabu vahulira ndi Sheba aveeye yo, nandio vazia nivakumbiriza lidaala linene yilio. Vumbaka vitumi via marova ku lidiji lie chova kandi nivatanga kulima isi walio kulilomba ligwi hasi.

¹⁶ Yaali ho mukali mugeri mu lidaala linene zana uwahanzuka kutura ku lidiji igulu navoora, “Huliriza! Huliriza! Volera Joabu yaaze hano; nyenya molome naye.”

¹⁷ Joabu yazia ahimbi naye kandi mukali yateeva, “Ivi niyie Joabu?” Joabu yativura, “Yee ni inzi.” Mukali zana yavoola, “Umbulirizi, mwami.” Joabu yativura, “Mbulirizaa”.

¹⁸ Mukali zana yavoola “Kale ligali, vagiraa kovora, ‘Zia onyoore mativuli googo mu lidaala linene lia Abeli’ na nindio vaakora.

¹⁹ Lidaala lietu ni linene ligali, lilala ku yago agaveeye gi mirembe kandi amasuuvirifu ligali kuvita goosi mu Isiraeli. Kigira ki ogerizaa kulidiviza? Wenyaa kwononyia ekeveeye cha Yahova?”

²⁰ Joabu yativura, “Gatava ndio mba,” “Inzi sindononyia, anoho kudiviza lidaala lienyu linene mba!

²¹ Sigaveeye ndio mba. Musaza ulangwa Sheba muyaayi wa Bikiri uturaa mu kivala chi vigulu cha Efuraimu, yatangiza liebaala ku mwami munene Daudi. Haana mundu uyu, na inzi ndaleka lidaala linene.” Mukali yavoola, “Kulamusigisila mutwi gwigwe.”

²² Maku mukali oyo yazia ku avandu vi lidaala linene ni lilohiza liovogeri vwivwe; kandi vakala mutwi gwa Sheba nivagusigisila Joabu kutura igulu wi lidiji. Joabu yakuba kisiriva kuli kimanyiru ku avasikari vi liihi veve valeke lidaala linene live, kandi viirana yengo. Joabu yirana Jerusalemi ku Mwami munene Daudi.

Avatumikiri va Daudi

²³ Joabu yaali mwimiliri wi liihi liosi lia Isiraeli; Benaya muyaayi wa Jehoyada yaali mwimiliri wa vasikari vukulinda Daudi;

²⁴ Adoniramu yaali munene wi miyinzi jukunigwa; Jehoshafati muyaayi wa Ahiludi munene wo kolohiza vindu mu mang'oda;

²⁵ Sheva yaali mung'odi wi kiyaalo; Zadoku na Abiazari vaali avasaalisi,

²⁶ Ira kutura mu lidaala lia Jairi yaali kandi mulala ku avasaalisi va Daudi.