2 Samweli 19 - KITABU KITAKATIFU

Joabu Yagondokera Daudi

¹ Joabu yavolerwa ndi mwami Daudi aliliraa nukusiomera Abisolomu.

² Nandio uvusangari vwi liguuta vwagirung'anywa kuva vovereri ku amahi ga Daudi goosi lidiku yilio, kigira vahulira ndi mwami asiomeraa muyaayi weve.

³ Viirana mu lidaala linene makiriri niviivisa kuli avasikari vi liihi avaveeye soni kigira vamali kwiruka kutura mu vulwani.

⁴ Mwami munene Daudi yatuma mumoni mwimwe kandi nalira vudinyu, “O, muyaayi wange! Muyaayi wange Abisolomu! Abisolomu muyaayi wange!”

⁵ Joabu yazia ku inyumba yumwami namuvolera, “Kalunu umali koleganyia avasaza vi liihi vovo, avasaza vahonyia livamwoyo liilio kandi livamwoyo lia avana vovo vayaayi na avakaana, kandi lia avakali vovo kandi avakali vaviika.

⁶ Ivi udunyiraa yavo avakuyanza, kandi okonyaa yavo avakuvihilwaa! Ivi umali kugakola galoleke havulavu ndi vatumikiri vovo kandi avasaza vuvulwani sivaveeye kivuni ku ivi mba. Nyara kolola ndi ivi wakaveeye nuvuyanzi niiva Abisolomu yakaveeye mwoyo, na kunyi kwosi kukuzi.

⁷ Kalunu zia oleminye mwoyo nukuluviriza avasaza vovo. Niiva siulakola ndio, nzisuha ku lieta lia Yahova, siaveeye ho numulala uwaza ave nivi kuduuka muganda mba. Yivwo vwaza vove vudinyu vudamanu vwokohereriza vwa ivi wamala kusalira mu livamwoyo liilio liosi.”

⁸ Maku mwami yasingira, nazia kandi yikala ahimbi ni kirivwa. Avasaza vi liihi veve vahulira ndi aveeye yo, navo vosi vaza nivavuunga kumukumbiriza. Ing'inga yeyo, avandu va Isiraeli vaali niviiruki, sa mulala kuzia kuduuka hango hehe.

Daudi Yetegeka Kwirana Jerusalemi

⁹ Vatanga kolembana mu kivala choosi hagati haavo aveene. Vavolerana aveene, “Mwami Daudi yakohonyia kutura ku vasigu viitu. Yakohonyia kutura ku vandu va Filisitia, navuzwa kalunu umali kwiruka kutura ku Abisolomu nokoleka kivala.

¹⁰ Kwavaka Abisolomu amaguta kuli mwami wiitu, navuzwa witiiywi mu vulwani. Kunangwa kigira mundu atageriza kwiranyia mwami Daudi hango mba.”

¹¹ Amakuva ga avandu va Isiraeli vavoola gaduukiraa mwami Daudi, kunangwa Daudi yatuma amakuva ku musaalisi Zadoku na Abiazari vateeve aviimiliri va Ivuyuda, “Kigira ki munyi muve avukumaliriza kokoonyana kwiranyia mwami munyumba yu vwami yeeye?

¹² Munyi muveeye aviiko vange, kandi wa masahi gange mwene; kigira ki munyi muve avukumaliriza kunziranyia?”

¹³ Daudi kandi yavavolera vavoolere Amasa, “Ivi oveeye mwiko wange. Kutura kalunu kuzizagilira, nguviikaa munene kusingilira liihi mu vogono vwa Joabu. Nyasaye yanguyi nguzi niiva sindakola ndio mba.”

¹⁴ Amakuva ga Daudi gaagumira nokonyoora uvusuuvirifu ligali vwa avasaza vosi vi Ivuyuda, kandi vamutumira likuva yirane na vimiliri veve vosi.

¹⁵ Kunangwa mwami yirana ha mugera gwa Jorodani; na avandu vasaza vi Ivuyuda vosi vaza kumwaganira ha Giligali vaduuki kumuhereka yaambuki engereka wu mugera.

¹⁶ Ku ing'inga ndala nzere Shimei, muyaayi wa Gera wi ihiiri ya Benjamini kutura mu lidaala lia Bahurimu, yakola vwangu kuzia ku mugera gwa Jorodani ukwaganira mwami Daudi harara na avandu vasaza vi Ivuyuda.

¹⁷ Yaali na avandu elefu ndala kutura mu ihiiri ya Benjamini. Ziba, uwaali mutumikiri wa vandu avinyumba ya Saolo naye kandi yaza na avayaayi veve likomi na vatano kandi avatumikiri sirini; vaduuka ha mugera Jorodani mwami nakikiri kuduuka.

¹⁸ Vaambuka mugera okohereka avandu avinyumba yu mwami okokora choosi ichu mwami ava niyenyaa. Lwu mwami yaali niyetegekaa kwambuka, Shimei yagwa hasi mam'mama imbiri weve.

Daudi amanyia uvulahi ku Shimei

¹⁹ Navoora, “Mwami Wange Wuluyali wange, mwaza yivilira uvudamanu vwa ndakokolera lidiku lia waatura Jerusalemi. Utava ni kindu ku inzi anoho kuganagana amakuva yago kandi mba.

²⁰ Inzi mutumikiri woovo, manya ligali ndi ndamala kwona, navuzwa lidiku lia lero, mali kuuza kuli wukutanga kutura munyumba ya Josefu mu zihiiri zia Ivaale ukusulunguta hano nu kwaganira mwami, mwami munene wange.”

²¹ Maku Abishai muyaayi wa Zeruya yavoola, “Kuduuka Shimei yiitwi kigira yalaama uyu wa Yahova yavaka maguta kuva mwami.”

²² Navuzwa Daudi yavolera Abishai na amwavo weve Joabu, “Nivwaha oteevi ahevwe zing'anagani zienyu, munyi avayaayi va Zeruya? Lidiku linu, mumali kugwa avasigu vange! Inzi oveeye mwami wa Isiraeli kalunu, na Umuisiraeli mwosi kali mulala sialiitwa lidiku lia lero mba.”

²³ Kandi yavolera Shimei, “Ngoheza likuva liange ku liesuuha ndi si uliitwa mba.”

Daudi Yamanyia Uvulahi ku Mefiboshezi

²⁴ Maku Mefiboshezi, mwisukulu wa Saolo, naye yasulunguta ukwaganira mwami munene. Siyaali niyisaavi virenge vivie mba, naavegi zinderu zizie, anoho kufuuya zinguvu zizie kutura ing'inga yu mwami munene yatura Jerusalemi kuduuka lwa yirana nimirembe.

²⁵ Lwa Mefiboshezi yaduuka kutura Jerusalemi ukwaganira Mwami munene, mwami munene yamuteeva, “Kigira ki ivi nuuvula kuzia niinzi, Mefiboshezi?”

²⁶ Yativura, “Kuli ivi umanyi, mwami wange, inzi mbeeye mulema ndavolera mutumikiri wange yanombere isukiri nduuki kuniina nukuzia harara nivi, navuzwa yanzaama.

²⁷ Umali kandi kugina mutumikiri woovo ku mwami munene wange. Mwami munene wuluyali wange aveeye kuli engelosi wa Nyasaye; kunangwa kola choosi ikikuyanzizaa.

²⁸ Avandu vinyumba ya guuga wange vosi vaduukana ukwitwa, navuzwa ivi wamba uvunyali ukulia komesa yooyo. Simbeeye nuvulungi koteeva ngolerwe uvugasu vundi kutura ku Mwami wuluyali wange mba.”

²⁹ Mwami munene yativura, “Sigakuduukiraa ovoole makuva gandi mba. Mali kotovola ndi ivi na Ziba mulasanga milimi jaali ja Saolo.”

³⁰ Mefiboshezi yativura, “Leka Ziba avuguli josi. Ganduki kolola ndi, mwami munene Wuluyali wange wirani yengo nimirembe.”

Daudi Yamanyia Uvulahi ku Barizilai

³¹ Barizilai kutura Gileadi, yaali naasulunguti kutura Rogelimu okohereka mwami munene ukwambuka mugera gwa Jorodani.

³² Barizilai yaali musakulu ligali ahimbi ni mihiga samanini. Yaali mutugi ligali kandi yahaana viukulia ku mwami Daudi lwa yaali namenyi ha Mahanaimu.

³³ Mwami munene yamuvolera “Hamba uzie harara ninzi Jerusalemi, na inzi ndakulinda vulahi.”

³⁴ Navuzwa Barizilai yativura, “Simbeeye ning'inga indambi komenya mba; kigira ki nzie naivi Jerusalemi numwami wuluyali wange?

³⁵ Inzi mbeeye ni mihiga samanini na sikeveeye ho ni kinyaanzizaa kandi mba. Sinyala kuzazama ichandia nukunwa mba, kandi sinyala kuhulira mioyo ja aviimbi mba. Ndava vuzwa uvulitu ku mwami munene wuluyali wange.

³⁶ Sindukana koheevwa madanyi manene kuli yaga mba. Kunangwa ndakohereka vuzwa hakekeke engereka wu mugera gwa Jorodani.

³⁷ Maku oleke nzirane yengo kandi nguziri ahimbi ni kilindwa cha aviivuli vange. Mbeeye hano numuyaayi wange Chimuhamu, uwaza akutumikiri; umbuguli azie nivi, mwami wuluyali wange; kandi umukolere kuli guganagana kuva amalahi.”

³⁸ Mwami munene yativura, “Ndamuvugura yaaze harara ninzi kandi mukolere choosi chu wenyaa. Na ndakokolera choosi cha oteeva.”

³⁹ Ahene yaho Daudi harara na avandu veve vosi vaambuka mugera gwa Jorodani. Yaavusa Barizilai kandi naamuha ligasiza lilie, na Barizilai yirana yenge weve.

Ivuyuda na Isiraeli vahangalizaniraa ku mwami munene

⁴⁰ Lwa mwami yaali niyaakambuka mugera gwa Jorodani, naaherekwa na avasaza vi Ivuyuda kandi ni inusu ya avasaza va Isiraeli, yaazizagilira kuduuka ha Giligali, kandi Chimuhamu yazia naye.

⁴¹ Maku vandu va Isiraeli vosi vazia ku mwami munene nivamuvoolera, “Mwami wuluyali wiitu, kigira ki avamwavo viitu, avasaza vi Ivuyuda, nivaganagana ndi vaveeye nuvunyari kuvugura kandi kohereka ivi, avandu avinyumba yooyo kandi avasaza vi liihi vovo kwambuka mugera gwa Jorodani?”

⁴² Avasaza vi Ivuyuda vaativura, “Kwakora ndio kigira mwami munene aveeye mulala ku kunyi. Kunangwa kigira yaga gamuvihilirizi? Akikiri kukutungira chukulia chiitu anoho kukuha kunyi choosi.”

⁴³ Avandu va Isiraeli vaativura, “Kunyi koveeye nividieli likomi ku mwami Daudi kuli munyi, kali naveeye mulala ku munyi. Kunangwa, kigira ki munyi mukolegerizaa? Mutivilira ndi kunyi nivo avaari vukutanga komoloma amakuva gi iliiranyia mwami wiitu mba!” Navuzwa avandu vi Ivuyuda vaali nu uvululu ligali mu lienya liavo kuvita avandu va Isiraeli.