2 Samweli 18 - KITABU KITAKATIFU

Abisolomu Yaguutiywi kandi Witiiywi

¹ Mwami Daudi yaleeta avasaza vi liihi veve vosi harara, naavagavulanyia mu miganda ji zielefu ni jizimia, kandi ja mia, kandi naviika vimiliri vava igulu wavo.

² Maku yavatuma ichova mu viduma vivaga; Joabu, na amwavo Joabu amwavo weve Abishai na Atai kutura Gazi, sa mulala ukulinda vuli kiduma cha avasikari. Mwami Daudi yavolera avandu veve kandi, “Ndazia nimunyi inzi mwene.”

³ Vaamutivulira, “Utazia mu vulwani nikunyi mba. Sikilava kindu ku musigu niiva kunyi kulagirung'ana nukwiruka mba, anoho kali niiva inusu ku kunyi nikukuza, sivalaganagana kunyi kuva kindu kuvo mba. Navuzwa ivi oveeye mulahi kukunyi kuvita avasaza elefu ndala; kunangwa nivulahi ligali kuvita niiva ivi utigala mu lidaala linene, na ukutumiri ovokonyi.”

⁴ Mwami munene yavavolera, “Choosi cha munyi muloraa kuva kilahi ligali, inzi ndakekola.” Kunangwa mwami yasingira handulu hi kirivwa, lwa avasaza vi liihi vosi vavita imbiri weve mu viduma vie zimia ni zielefu.

⁵ Mwami Daudi yahaana malago ku Joabu na Abishai, na Itai: “Kigira inzi mutasaliriza musoleri Abisolomu mba.” Amahi goosi gaahulira mwami Daudi nahaana lilago yili ku vimiliri veve.

⁶ Kunangwa liihi liatura ichova kulwaana Isiraeli mu mulitu gwa Efuraimu.

⁷ Avandu va Isiraeli vaguutwa na avatumikiri va Daudi; kandi liguutwa linene ligali, avasaza zielefu sirini viitwa lidiku yilio.

⁸ Uvulwani vwalanda mu kivala choosi, avasaza vakuzira mu mulitu vaali avanyingi kuvita yavo aviitirwa mu vulwani.

⁹ Nonoho Abisolomu yagana na valala ku avatumikiri viliihi va Daudi. Abisolomu yaali naniini ku isukiri yeeye, kandi lwi isukiri yazia kuvitira isi wi zisia ziadindana ziu musaala munene gulangwa mwaloni, liisu lia Abisolomu liagumirwa mu zisia yizio. Isukiri zana yeyo yaazizagilira kunyagula na Abisolomu yalekwa niyeleraa.

¹⁰ Mulala ku vasaza va Daudi yamulola ma navolera Joabu, “Munene wange, ndoli Abisolomu niyeereyaa musaala gwa mwaloni.”

¹¹ Joabu yamuteeva, “Niiva ivi wamulola, kigira ki nuvula kumwita ahene nahene yaho? Inzi mwene ngano ndakakoheye vidonye viefeza likomi numusibi.”

¹² Navuzwa musaza oyo yativura, “Kali niiva ulamba vidonye viefeza elefu ndala, sindaali nyiiri mukono gwange nukwita muyaayi wu mwami mba. Kunyi kwosi kuhuliyi lilago liu mwami ku ivi, Abishai na Itai ndi, ‘Kigira inzi, utasaliriza musoleri Abisolomu mba.’

¹³ Navuzwa ndava utinguhi mwami nukwita Abisolomu, mwami yaali ahuliri amakuva yaga. Ahuliraa amakuva goosi na ivi siwali unyala osoore mba.”

¹⁴ Joabu yavoola, “Sinzizaa kogotiza ing'inga yindi inyingi ku ivi mba.” Yavugula amatimu gavaga kandi nagatoza mu kiritu cha Abisolomu nakikiri mwoyo niyeereye mu musaala.

¹⁵ Maku avasikari likomi va Joabu vakumbiriza Abisolomu ma nivamaliriza limwita.

¹⁶ Joabu yalaga kisiriva kikubwi kusingiriza vulwani, kandi mahi geege girana kutura mu lilondelera vandu va Isiraeli.

¹⁷ Vaavugura muviri gwa Abisolomu, nivagusiuva mu liliina liveeye musi ligali mu mulitu, nivalikunika na magina. Avaisiraeli vosi viiruka, mundu sa mulala nazia yengo weve mwene.

¹⁸ Ing'inga yi livamwoyo lilie, Abisolomu yaali niyiyumbakaira munara, mu livona liu mwami; kigira siyaali nu muyaayi kuzizagiliriza lieta lilie mu Isiraeli mba. Kunangwa yagugulika lieta lilie mwene, kandi kuduuka lidiku lia lero, gwamanyikana kuli munara gwa Abisolomu.

Daudi Yavolerwa likuza lia Abisolomu

¹⁹ Maku, Ahimaazi, muyaayi wa Zadoku yavolera Joabu, “Leka nyaguli ku mwami; na makuva malahi ndi Yahova umali kumuhonyia kutura ku vasigu veve.”

²⁰ Joabu yamutivulira, “Awa kalunu siulahila amakuva malahi ku mwami mba. Lidiku lindi waza, okole ndio, navuzwa kalunu mba, kigira muyaayi wu mwami ukuzi.”

²¹ Maku yavolera mutugwa weve kutura Ezopia, “Zia ovoolere mwami cha umali kolola.” Mutugwa zana yinama kandi nazia zimbiru.

²² Ahimaazi yaanigiriza Joabu, “Sindegeleraa ichekoleki mba. Mwaza yaanza oleke inzi mbili makuva malahi zana kandi.” Joabu yamuteeva, “Kigira ki wenya okole ndio mwana wange? Sinoonyole madanyi kugo mba.”

²³ Ahimaazi yavoola kandi, “Ku choosi ichekolekaa, nyenya nzie.” Joabu yamuvolera, “Zia.” Kunangwa Ahimaazi yazia zimbiru kuvitira mu livona lia Jorodani, nonoho, yavita mutugwa zana oyo.

²⁴ Daudi yaali niyikaye hagati hi virivwa viviri. Mulindi wi kirivwa yanina igulu wi kirivwa kuduuka ku lidiiji igulu. Kandi lwa yaginga zimoni zizie igulu, yalora mundu musaza nanyagura yeng'ine.

²⁵ Mulindi zana yalanga kandi navolera mwami. Mwami yavoola, “Niiva aveeye yeng'ine aleetaa amakuva malahi.” Naye yaza zimbiru ligali niyisunda himbi.

²⁶ Maku musikari mulindi yalora mundu musaza wundi nanyagura yeng'ine, kandi yalanga hasi ku mulindi wi kirivwa, “Henza mundu wundi yaazaa zimbiru kandi!” Mwami yativura, “Mwene uyu kandi aleetaa amakuva malahi.”

²⁷ Musikari mulindi yavoola, “Nyara kolola ndi musaza wukutanga anyaguraa kuli Ahimaazi. Aveeye mundu mulahi.” Mwami yavoola, “Kandi aleetaa amakuva malahi.”

²⁸ Ahimaazi yacheliza mwami vudinyu, niyituula hasi umwene navoora, “Yahova Nyasaye woovo yizominywi, umali kukuha liguuta ku avasaza vibaara ku Mwami Wuluyali!”

²⁹ Mwami yateeva, “Musoleri Abisolomu akaveeye mu mirembe naho?” Ahimaazi yativura, “Mwami Wange, lwu munene woovo Joabu yaandumi, ndoli vuzwa liduvagana linene, navuzwa sindaali nyara kumanya chaali ki mba.”

³⁰ Mwami yamuvolera, “Singira yaho.” Kandi yaazi nasingira ho.

³¹ Ahene yaho, mutugwa wa Ezopia yaduuka kandi navolera mwami, “Mbeeye na makuva malahi, Mwami Wuluyali! Kalunu Yahova akoheeye liguuta ku yavo vosi avibaara kutura ku ivi.”

³² Mwami Daudi yamuteeva, “Musoleri Abisolomu akaveeye mu mirembe naho?” Mutugwa zana oyo yativura, “Ndakayanzi ichekoleke kuye chakekoleki ku avasigu vovo vosi; Mwami, kandi ku vosi avibaara ku ivi.”

³³ Mwami Daudi yiizurwa nekevelera. Yanina kuduuka mu keng'oze keveeye kunzira yikirivwa. Lwa yaali nazizaa, yalira, “O, muyaayi wange! Muyaayi wange Abisolomu! Abisolomu, muyaayi wange! Ngano ninzi ukuzi mu vogono vuvwo muyaayi wange! O, muyaayi wange Abisolomu!”