2 Samweli 16 - KITABU KITAKATIFU

Daudi na Ziba

¹ Lwa Daudi yaali niyakazia ihale hakekeke kutura kondongozi kwi kiguru, nonoho yagana na Ziba, mutumikiri wa Mefiboshezi, uwaali ni zibunda ziviri nizigingi milaango ji migadi zimia ziviri, visaganyi via mazabibu guminywa imia ndala, visaganyi imia ndala via makuyu mahia kandi nu imuuya yekeseero niyiizuyi iwaini.

² Mwami Daudi yamuteeva, “Uzizaa kokolera ki ivindu yivio?” Ziba yativura, “Zibunda ziveeye kigira vandu avinyumba yu Mwami Wuluyali wange kuniina ku, migadi na amakuyu gaveeye kigira avasaza kulia, kandi iwaini eveeye kigira yavo kunwa lwa vava nivakaluha mwigendanyama.”

³ Mwami Daudi yamuteeva, “Mefiboshezi, mwisukulu wu mwami woovo Saolo aveeye hayi?” Ziba yativura, “Amenyi mu Jerusalemi, kigira asuviraa ndi avandu va Isiraeli valiranyia uvwami vwa guuga weve Saolo kuye.”

⁴ Mwami Daudi yavolera Ziba, “Vindu viosi iviveeye via Mefiboshezi viveeye vivio.” Ziba yativura, “Inzi mbeeye mutumikiri woovo. Inzi ndayaanziza mwami Wuluyali wange kazozo.”

Shimei Yalaama Daudi

⁵ Lwu Mwami Daudi yaduuka mu Bahurimu, mulala ku aviiko va Saolo, Shimei muyaayi wa Gera, yatura ichova kumwaganira, namulaama lwa yaali niyazaa.

⁶ Shimei yaatanga kulasa Daudi na avanene veve amagina, kali Mwami Daudi niyaali nakumbiriziywi na avandu veve kandi na avasikari valindi veve.

⁷ Shimei yamulaama navoora, “Tula zia! Tula zia! Mulumindi ivi! Mukoli wuvudamanu ivi!

⁸ Wavugula uvwami vwa Saolo, na kalunu Yahova akohezaa amagere kigira liita lia vandu avinyumba ya Saolo avanyingi. Yahova ohooye uvwami vuvwo ku muyaayi woovo Abisolomu, naivi udiviziywi, ivi mulumindi!”

⁹ Abishai wa mama weve yalangwa Zeruya, yavolera mwami, “Mwami wuluyali wange, kigira ki olekaa imbwa yiyi niikulaama. Leka nyambuke yo nokotema mutwi gwigwe!”

¹⁰ Mwami Daudi yavolera Abishai na amwavo weve Joabu, “Yaga sigaveeye agoogo mba. Niiva yaanaama kigira Yahova amuvooleeye, gaveeye ku vwaha okoteeva ni kigira ki akolaa ndio?”

¹¹ Daudi yavolera Abishai na vatumikiri veve vosi, “Muyaayi wange mwene agerizaa kunzita; kigira ki mugenye ku mundu wa Benjamini uyu? Yahova amuvooleeye anaame; kunangwa muleke ave yeng'ine kandi leki yanaame.

¹² Hawundi Yahova alalola liverera liange ma yambe uvugasu kuvugura ovogono vwi kilaamo chiche.”

¹³ Kunangwa Daudi harara na avasaza va yaali navo, vazizagilira kuzia kunzira. Shimei yaazizagilira kuvalonda, nagenda kunyasi kwi kiguru, yaazizagilira kuvalaama kandi kuvalasa na magina nukwuha luguki naavalonda inyima.

¹⁴ Mwami munene harara na avandu vasaza veve vaali nivaluhi ligali lwa vaduuka ku mugera gwa Jorodani, kunangwa vasoosa.

Abisolomu Yaduuka mu Jerusalemi

¹⁵ Abisolomu na vasaza va Isiraeli vosi vaali naye vingira mu Jerusalemi, kandi Ahizofeli yaali harara naye.

¹⁶ Lwa Hushai, mulina musuuvirifu wa Daudi yagana na Abisolomu, yahanzuka, “Mwami ahindiri! Mwami ahindiri!”

¹⁷ Abisolomu yamuteeva, “Kindiki chekoleki ku vusuuvirifu vwuvwo ku mulina woovo Daudi? Kigira nuuvula kuzia naye?”.

¹⁸ Hushai yamutivulira, “Ndaali nyara kuzia ndi naye? Inzi mbeeye ku lovega lwa uyu uwatovolwa na Yahova, na avandu yava, kandi na avandu va Isiraeli vosi. Inzi ndamenya nivi.

¹⁹ Kali ndio, nivwaha wa inzi ndukanaa ndumikiri, nataveeye muyaayi wu munene wange? Kuli ndatumikira baba woovo, nindio kandi ndakutumikira kalunu.”

²⁰ Ahene yaho Abisolomu yagirung'ana nateva Ahizofeli, “Kalunu ndi koveeye hano, oveeye nanganagani ki yo okovolera kokole?”

²¹ Ahizofeli yativulira Abisolomu, “Zia ogone na avakali vaviika ava baba woovo yaleka inyima kulinda inyumba yu vwami. Ahene yaho avandu vosi va Isiraeli valamanya ndi baba woovo akuvugulaa kuli musigu woovo, kandi avalondi vovo valaluvilira ligali.”

²² Kunangwa vumbakira Abisolomu lihema kwigulu kwinyumba yu vwami, kandi imbiri wa avandu vosi, Abisolomu yingira mu kandi naagona na vakali vaviika vababa weve.

²³ Zing'anagani ziosi zia Ahizofeli yahaana mu madiku yago ziavugilirwa kuli ziali ligali likuva lieligali kutura ku Nyasaye; vombi Daudi na Abisolomu vazilonda.