2 Samweli 15 - KITABU KITAKATIFU

Abisolomu alohizaa liebaala kubaba weve Daudi

¹ Inyima wa yaga, Abisolomu yelombera ligare liuvulwani ni zibarasi, na avasaza vukumuhereka amusini.

² Yaali anyala kuvuuka mu mavwevwe ma azia kusingira handulu hi inzira hi kirivwa chi lidaala linene. Lwu mundu woosi yaazaa ho wavula kuva nilihulirizana nu wache niyenyaa mwami munene kuvahambanyia, Abisolomu yaamulangaa nukumuteva lwu mundu oyo yaali niyakamara kovora ihiiri yaatulaamu.

³ Abisolomu yaali anyala kovora, “Henza, lilago liveeye ku lovega lwulwo, na henza, siaveeyeho nu mundu wu mwami yalaga kuhulira amakuva gi liyaala liilio mba.”

⁴ Kandi yaali anyala komeeda kovora, “Ndakayanzi kuva mukalagi! Ahene yaho ku vosi mundu wakava naveeye nilivitaana kinga livaanza yakaazi ku inzi, na inzi ndakamuheye likalaga liuvulungi!”

⁵ Lwu mundu zana yisunda ahimbi ku Abisolomu, ukwinama imbiri weve, Abisolomu yanyira mukono gwigwe nukumugumira, kandi kumuvusa.

⁶ Abisolomu yakola ndio ku vuli mundu wa Isiraeli uwaza ku mwami munene kigira likalagirwa liuvulungi; nandio avandu va Isiraeli vayaanza Abisolomu kuvita babaweeve Daudi.

⁷ Inyima wi mihiga jine, Abisolomu yavolera mwami Daudi “Mwaza, leka nzie Heburoni kutunga lilagana lie liesuuha liange, lia ndisuuhira Yahova.

⁸ Lwa ndaali ningemenyi mu Geshuru mu Siria, Ndasuuviriza Yahova ndi niiva alanziranyia mu Jerusalemi, ndakamusigamihi mu Heburoni.”

⁹ Mwami yamuvolera, “Zia mu mirembe.” Kunangwa yasingira nazia Heburoni.

¹⁰ Navuzwa Abisolomu yatuma avatumwa mambisu ku zihiiri ziosi zia Isiraeli na makuva yaga: “Lwa muhulira mwoyo gwi visiliva, muhanzuki, ‘Abisolomu amali kugwa mwami ha Heburoni!’ ”

¹¹ Vaali ho avasaza zimia ziviri avaari nivalangiywi naye kutura Jerusalemi; vazia nivaveeye nilisuvira nivatamanyi chekoleka.

¹² Lwa Abisolomu mu lilohiza lia Abisolomu nahaana visiuviliru, yatumana Ahizofeli kutura mu lidaala lia Gilo, uwaali mulala ku vahaani viziganagani va Daudi. Zinguru zianyooleka kigira kolohiza muvwivisu ku mwami, kandi avalondi va Abisolomu vaadasika.

Daudi yiruka kutura Jerusalemi

¹³ Mutumwa yavolera Daudi, “Mioyo ja avandu va Isiraeli jiyanziliyi Abisolomu.”

¹⁴ Daudi yavolera avanene veve vosi avaari naye mu Jerusalemi, “Kuduuka kwiruki vwangu nikwenya kohononoke kutura ku Abisolomu! Koli vwangu! Anoho alava hano kandi akuguuti na yiiti avandu vosi mu lidaala linene!”

¹⁵ Vaativura, “Yee, mwami wuluyali. Kunyi kwetegeki kokora choosi cha ovola.”

¹⁶ Kunangwa mwami yatura, naveeye harara na vandu avinyumba yeeye vosi kandi avanene veve, nitali avakali vaviika veve likomi, ava yaleka inyima kulinda inyumba yu vwami.

¹⁷ Lwu mwami na avasaza veve vosi vaali nivaturaa mu lidaala linene, vasingira hanyumba yukumaliriza.

¹⁸ Avanene veve vosi vasingira ahimbi naye lwa vasikari valindi vu vwami vaali nivavita imbiri weve. Avasikari vi liihi zimia sita, avaari nivamulondi kutura Gazi navo kandi vavita imbiri weve,

¹⁹ nu mwami yavolera Itai mwimiliri wavo, “Kigira ki okolondaa? Yirana omenye nu mwami muhia. Ivi oveeye mugeni, mundu uwakungwa kutura mu kivala chicho chene.

²⁰ Omenyi hano ku ing'inga ngekeeke, kunangwa kigira ki ngolombe ovoyavoye harara niinzi? Kali inzi simanyi wa nziza mba. Yirana na uvuguli avasaza vache vikivala chicho valava nivi; Yahova ave mulahi kandi musuuvirifu ku ivi.”

²¹ Navuzwa Itai yativura, “Mwami wuluyali wange, nzisuha ku ivi mu lieta lia Yahova ndi inzi ndazia nivi kazozo hoosi ha uzia, kali niiva galava ilikuza anoho livamwoyo.”

²² Daudi yativura, “Vulahi! Vita uzie!” Kunangwa Itai umugiti yazia imbiri na avasaza veve vosi kandi avakeekeke vosi va yaali navo.

²³ Avandu vosi vaalira nu mwoyo munene lwa avalondi va Daudi vaatura mu lidaala. Mwami Daudi yambuka mugera gwa Kidironi, naalondwa na avasaza veve, kandi vosi harara vazia kunzira izizaa mwigendanyama.

²⁴ Musaalisi Zadoku yaali yo, kandi harara na vandu va Levi, nivagingi Lisandugu litakatifu lie Lilagana. Valivika hasi, kandi sivalivugula kutura hasi mba, kuduuka lwa avandu vosi vaali nivakatula mu lidaala linene. Musaalisi Abiazari yaali ho kandi.

²⁵ Maku Mwami Daudi yavolera Zadoku, “Yiranyia Lisandugu lieligana mu Lidaala linene. Niiva Yahova ayanziziywi niinzi, lidiku lilala alakaleke ndirane kulilola kandi havundu ha limenya.

²⁶ Navuzwa niiva siayaanziziywi niinzi vulahi, ahene yaho, leka akole ku inzi icha alalira.”

²⁷ Mwami yavolera musaalisi Zadoku, “Henza, vugula muyaayi woovo Ahimaazi kandi Jonazani muyaayi, wa Abiazari na mwirane mu lidaala linene nimirembe.

²⁸ Ku ing'inga yinu, ndalinda ha zinyambuku ziu mugera mwigendanyama kuduuka lwanyoola amakuva kutura ku ivi.”

²⁹ Kunangwa Zadoku na Abiazari vaavugura Lisandugu lie Lilagana niviiranyia mu Jerusalemi kandi nivamenya yo.

³⁰ Daudi yanigira kiguru cha mizeituni nasiomaa; yaali vugira vilato mu virenge. Yaali nafuumi mutwi gwigwe kuli kelolero chovovereri. Avandu vosi avaari avamulonda vaakunika mitwi jaavo kandi ni vasioma.

³¹ Lwa Daudi yavolerwa ndi, Ahizofeli yiyungi ni liebaala lia Abisolomu, yasaala, “Yahova, mwaza, girung'anyia lihaana zing'anagani zia Ahizofeli kuva uvusiru!”

³² Lwa Daudi yaduuka kondongozi kwi kiguru, ukwaliho na havundu hu kusigamira Yahova, mulina weve musuuvirifu Hushai umuariki, yamwaganira nizinguvu zizie zitanduliywi kandi namarova ku mutwi gwigwe.

³³ Daudi yamuvolera, “Siulava novokonyi ninzi niiva ulanonda mba;

³⁴ navuzwa unyala kongonya niiva wirana mu lidaala linene kandi ovolele Abisolomu ndi ulamutumikira kalunu nu vusuuvirifu kuli watumikira baba weve. Okole goosi agunyala ukuhing'anyia zing'anagani ziosi zia Ahizofeli ahaanaa.

³⁵ Avasaalisi Zadoku na Abiazari valava yo; uvavoolere vindu viosi via uhulira munyumba yu vwami.

³⁶ Vaveeye na vayaayi vaavo Ahimaazi muyaayi wa Zadoku na Jonazani muyaayi wa Abiazari vaali harara navo, na unyala kuvatuma ku inzi vandetere amakuva goosi ga onyoora.”

³⁷ Kunangwa Hushai, mulina wa Daudi, yirana mu lidaala linene lwa Abisolomu yaali niyakaduka.