2 Samweli 13 - KITABU KITAKATIFU

Amunoni Yavika Tamara

¹ Muyaayi wa Daudi Abisolomu yaali na mbozo weve wiligondo walangwa Tamara. Muyaayi wundi walangwa Amunoni yayanza Tamara.

² Amunoni yanyangizwa ligali kali naava mulwaye ku kivuni cha mbozo weve Tamara, kigira yaali mugima na nigaloleka siganyalika kuye kokora kindu choosi naye mba.

³ Amunoni yaali numulina weve uwalangwa Jonadabu, muyaayi wa Shemedi, amwavo Daudi. Jonadabu yaali mundu mugalama ligali.

⁴ Yateeva Amunoni, “Kigira ki ivi muyaayi wu mwami ololekaa kuva no vovereri vuli lidiku. Siunyala kombolera kivuni?” Amunoni yamutivulira, “Inzi nyanza Tamara, mbozo amwavo wange Abisolomu.”

⁵ Jonadabu yamuvolera, “Zia ogone mu kidali na wigadizi ndi ulwalaa. Lwa baba woovo yaza kokolola, umuvolere ndi, ‘Mwaza nuyanza teeva mbozo wange Tamara yaaze. Ndakayanzi yandetere chukulia. Leka yanombere chukulia imbiri wange nindoraa ma yandiihize kutura mu mukono gwigwe.’ ”

⁶ Kunangwa Amunoni yagona hasi niyiigadiza ndi alwalaa. Lwu mwami Daudi yazia kumulora, Amunoni yamuvolera, “Ndakayanzi mbozo wange Tamara yaaze kumba chukulia. Alombere chukulia yiki imbiri wi zimoni ziange, nindoraa, ma ndie kutura mu mukono gwigwe.”

⁷ Daudi yatuma likuva ku Tamara mu inyuma yu vwami: “Zia munyumba ya mbozo woovo Amunoni na umulombere chukulia.”

⁸ Yazia yo namunyoola mu kidali. Yavugula uvusie naaduvula niyuuminya mugadi imbiri weve.

⁹ Maku yavugula mugadi kusahani namusuundila, navuzwa yasura kulia. Amunoni yavoola, “Kunga avandu vosi vatuli muno.” Kunangwa vosi vaatura.

¹⁰ Amunoni yavolera Tamara, “Ndetera chukulia zana hano mu keng'oze change nduuki kulia kutura mu mukono gugwo.” Kunangwa Tamara yavugula migadi ja yaali naalombi naahilira Amunoni mu keng'oze chayagonaa mu.

¹¹ Navuzwa lwa Tamara yaamuhilira, yamugumira navoora, “Hamba ogone ninzi mbozo wange!”

¹² Tamara yamugaya, “Awa mbozo wange utaniga mba. Kindu kidamanu kuli yiki sikekolwa mu Isiraeli mba! Utakola kindu kidamanu yiki mba!

¹³ Galava ndi ku inzi? Ndatuliza ndi zisoni ziange. Na ku ivi, galava ndi, ulava mulala ku avasiru vadamanu mu Isiraeli. Moloma nu mwami. Sialanzigalira mburi koleetwa nivi mba.”

¹⁴ Navuzwa Amunoni yasura kumuhulira, na kigira yaali ni zinguru kuvita Tamara, yamwononyia kuzinguru.

¹⁵ Maku Amunoni yamuvihilirwa ni lidunya linene; kali yamuvihilirwa ligali kunangwa livihirirwa liayamuvihiliraa liali linene ligali kuvita liyaanza lia yaali niyamuyaanza maziambiri. Amunoni yamuvolera, “Vuka utuli ichova uzie.”

¹⁶ Yamutivulira, “Awa mbozo wange: kungunga kutura muno, vulava vudamanu ligali kuvita aga umali kongolera.” Navuzwa Amunoni siyaali unyala kumuhulira mba;

¹⁷ Yalanga mutumikiri weve yingiri navoora, “Tuliza mukali uyu imbiri wange. Mulase ichova na uhane kiliango!”

¹⁸ Kunangwa mutumikiri weve yaamulasa ichova, nahaana kiliango. Tamara yaali niyiviiki inguvu indambi ya makono yuvuguli vonene ya avakaana vagima va avami vivikaa.

¹⁹ Tamara yiivaka ligoke ku mutwi gwigwe nataandula zinguvu zia yaali niyiviiki naviika mukono ku mutwi nazia nalira.

²⁰ Mbozo weve Abisolomu yamuteeva, “Mbozo woovo Amunoni yaali nivi? Kiring'ana mbozwa, oyo ni mbozo woovo. Inguuva yiyi itakoveleriza mba.” Kunangwa Tamara yamenya munyumba ya mbozo weve Abisolomu, mukaana wovovereri kandi wekesoma.

²¹ Lwu mwami Daudi yahulira inguuva yiyi, yavihilirwa ligali;

²² Abisolomu siyavoola likuva ku Amunoni lilahi anoho lidamanu mba; Abisolomu yaduunyira Amunoni kigira yonogonyia mbozo weve Tamara.

Abisolomu Avanzaa Kisaalia ku Amunoni

²³ Inyima wi mihiga giviri, Abisolomu yaali naakara vwoya vwa magondi geege ha Baali Hazori ahimbi ni lidaala lia Efuraimu; Abisolomu yagenihiza avayaayi vu mwami vosi vaze uwene yeyo.

²⁴ Yazia ku mwami Daudi navoora, “Mwami wuluyali, amagondi gange gakalwa uvwoya. Mwaza, hamba harara na vatumikiri vovo na musange mu lilia.”

²⁵ Mwami yativura, “Awa, mwana wange. Kunyi kwosi kutazia yo mba; kulava musigo ku ivi.” Abisolomu yamugoonya ligali, navuzwa yasura kuzia yo, nitali yahaana kuye ligasiza.

²⁶ Maku Abisolomu yavoola, “Niiva ivi mwene si ulaaza, mwaza leka amwavo wange Amunoni yaaze ni kunyi.” Mwami yamuteeva, “Kigira ki azie harara nivi?”

²⁷ Navuzwa Abisolomu yaazizagilira kumugoonya ligali kuduuka mu limalirika Daudi yaleka Amunoni na vayaayi vandi vosi ni vazia na Abisolomu. Abisolomu yalomba lilia linene ligali, ilidukanaa nu mwami munene;

²⁸ yalaga avatumikiri veve, “Huliri! Lwa Amunoni naave niyakanwa iwaini inyingi, kandi lwa nambane lilago, mu mwiti. Mutatia mba. Inzi ndadulwa mwene. Muve avaluviriri kandi mutalindagilira mba!”

²⁹ Kunangwa avatumikiri va Abisolomu vaakora ku Amunoni icha Abisolomu yaali nalagi vamwita. Maku avayaayi vu mwami vasingira nivaniina ku zisukiri ziavo niviruka.

³⁰ Lwa vaali nivazizaa yengo, amakuva gaduukiraa Daudi: “Abisolomu witi avayaayi vu mwami vosi; siaveeyeho na mulala utigaye mba!”

³¹ Mwami yasingira, naatandula zinguvu zizie mu vovereri kandi naagona hasi. Avatumikiri veve vosi vasingira ahene yaho vatandula zinguvu ziavo.

³² Navuzwa Jonadabu, muyaayi wa Shimea, amwavo Daudi, yavoola, “Mwami wuluyali wange ataganagana ndi viiti avayaayi vu vwami mba; nitali Amunoni yeng'ine niyie ukuzi. Waali unyala kumanya nohenzi mu moni mwa Abisolomu Ndi, yaali niyaatovra mu zing'anagani zizie kokora kindu yiki kutura ing'inga ya Amunoni yonogonyia mbozo weve Tamara.

³³ Mwami wange wuluyali utahenda mwoyo kigira amakuva ga uhuliyi ndi avayaayi vosi vu mwami vaakuzi mba; ni Amunoni yeng'ine umali kukuza.”

³⁴ Mu ing'inga yeyo, Abisolomu yaali niyiruki. Lwene yilwo, musikari waali ku vulindi yahenza nalora kiduma kenene cha avandu kunzira kolovega lwi madioli nivasulunguta. Mulindi oyo yazia navolera mwami, “Ndolaa avandu kolovega lwa Hovonaimu, kolovega lwi kiguru.”

³⁵ Jonadabu yavolera mwami, “Henza, avayaayi vumwami vaduuki hano; gekoleki vuzwa kuli mutumikiri woovo amali kovora.”

³⁶ Nonoho lwa yaali niyakamara komoloma, avayaayi vu mwami vingira munyumba yu vwami nivasioma. Mwami Daudi, naye kandi, na vatumikiri veve vosi, vasioma ligali.

³⁷ Abisolomu yiruka nazia ku Talimai, muyaayi wa Amihudi, mwami wa Geshuru. Navuzwa Daudi yasiomera muyaayi weve ku ing'inga indambi.

³⁸ Inyima wa Abisolomu kwiruka nukuzia mu kivala cha Geshuru, yamenya yo ku mihiga jivaga.

³⁹ Mwoyo gwu mwami Daudi gwaali namaholu ku Abisolomu, kigira yaali niyakalema mwoyo ku likuza lia Amunoni.