2 Samweli 12 - KITABU KITAKATIFU

Makuva ga Nazani ni Lieganira lia Daudi

¹ Yahova yatuma muporofeti Nazani ku Daudi. Nazani yazia kuye navoora, “Vaali ho avasaza vaviri avamenyaa mu lidaala lilala; mulala yaali mutugi nuwundi yaali mudaka.

² Musaza mutugi yaali nizing'ombe zinyingi kandi namagondi manyingi,

³ navuzwa mudaka yaali niligondi lilala lieng'ine vuzwa lia yaali niyagula. Yalilinda vulahi ligali na liavirukira hango hehe harara na avana veve. Yaali anyala kulilihiza kali ni vilala ku viukulia vivie, kulileka linwere amazi mu kekombe chiche, kandi alilera kumagulu geege. Ligondi yili liali kuli mukaana weve.

⁴ Lidiku lilala, mugeni yaza naduuka hango hu mutugi. Mutugi siyenya kwita lilala ku magondi geege kolombera mugeni lilia mba. Muvogono yivwo yavugula ligondi liumudaka lieg'ine vuzwa, naalietegekizira mugeni weve chukulia.”

⁵ Daudi yavihilirwa ligali mutugi zana oyo navoora, “Nzisuha ku Yahova oveeye mwoyo ndi mundu wakola yaga kuduuka akuzi!

⁶ Kigira likora inguuva ndamanu yiyi, kuduuka atuungi haali kane kuli yavugula.”

⁷ Nazani yavolera Daudi. “Ivi niye mundu zana oyo, yaga nigo ga Yahova Nyasaye wa Isiraeli avoora: ‘Inzi ndakokola ove mwami munene wa Isiraeli kandi ningohonyia kutura ku Saolo.

⁸ Ndakuha uvwami vwivwe kandi avakali veve. Ndakokola kuva mwami wa Isiraeli ni Ivuyuda. Niiva yivi siviakuduuka, ngano ndakuha vinyingi haali kaviri kuli viene yivio.

⁹ Kigira ki nuchaya amalago gange? Kigira ki nokora inguuva ndamanu yiyi? Ivi walaga Uria yiitirwi muvulwani. Waleka vandu va Amoni vamwiti; ma nuvugula mukali weve!

¹⁰ Kalunu, muvuli likula valala ku visukululwi vovo valakuza likuza liekisaahi kigira ivi uvuli kuhulira inzi na uvuguyi mukali wa Uria.

¹¹ Nzisuha ku ivi ndi ndakora mulala kutura mu vandu vinyumba yooyo koleta uvudinyu ku ivi. Ulagalola ivi mwene lwa mbugura avakali vovo kutura ku ivi nukuvaha musaza wundi; kandi alagona navo havulavu na avandu va Isiraeli vaduuki kolola.

¹² Wakola vwoni mu vwivisu, navuzwa ndakora yaga gekoleka mbasu hagati kunangwa vandu va Isiraeli vosi valore.’ ”

¹³ Daudi yavolera Nazani, “Mali kwonera Yahova.” Nazani yativura, “Yahova ukusamihi; si ulakuza mba.

¹⁴ Navuzwa kigira wakolegeliza Yahova, Mwana woovo alakuza.”

¹⁵ Maku Nazani yazia yengo. Yahova yakola muyaayi wu mukali mutiga Uria yivulira Daudi kuva mulwaye ligali.

Muyaayi wa Daudi Yakuzaa

¹⁶ Daudi yasaala ku Nyasaye ndi mwana ahone. Yasura kulia kindu kali kikuzuzu kandi vuli vudiku yazia mu keng'oze chiche kandi naagona hasi uvudiku vwosi.

¹⁷ Avakulundu vinyumba yeeye vazia kuye nivageriza kumuvukiza, navuzwa yasura na siyaali unyala kulia kindu navo mba.

¹⁸ Mwana zana oyo yakuza inyima wi lisiza lilala, na vatumikiri va Daudi vaali avati kumuvolera ndi mwana ukuzi. Vavoola, “Lwu mwana yaali nakikiri mwoyo, Daudi siyaali unyala kovora kindu kali lwa kwamoloma naye mba. Kunyala ndi kumuvolera, umwana weve ukuzi? Hawundi anyala kwekola kindu kidamanu!”

¹⁹ Lwa Daudi yalora nivamonyanaa, yamanya ndi mwana umali kukuza. Kunangwa yavateva, “Mwana ukuzi?” Vamutivulira “Yee, ukuzi.”

²⁰ Daudi yavuka, niyisinga, nalomba liisu lilie nukwivaka maguta ma niyiviika zinguvu zizie. Maku yazia munyumba ya Yahova naamusigamira. Lwa yirana munyumba yu vwami, yateeva ahevwe chukulia nonoho lwa chetegekizwa, yikala nalia.

²¹ Vatumikiri veve vamuteeva, “Kigira ki okolaa kuli ndi? Lwu mwana yaali mwoyo, wahonga lilia kandi nusioma, navuzwa kalunu ndi mwana ukuzi, uvuki kandi uliizaa!”

²² Daudi yativura, “Yee, ndaahonga lilia nukulira lwu mwana yaali nakikiri mwoyo. Ndaaganagana ndi hawundi Yahova alambera zimbavasi, ma avuli koleka mwana akuzi.

²³ Navuzwa kalunu umali kukuza, kigira ki mburi kulia? Nyara kwilanyia mwana zana ave mwoyo? Lidiku lindi lilala inzi ndakazie aha aveeye, naye sianyala kwirana ku inzi kandi mba.”

Liivulwa lia Solomoni

²⁴ Ahene yaho Daudi yaaleminya mukali weve Bazisheba mwoyo, naava naye, kandi yivula mwana muyaayi uwa Daudi yagulika Solomoni. Yahova yayanza mwana oyo

²⁵ kandi nalaga muporofeti Nazani kugulika mwana oyo Jedidia, kigira Yahova yamuyanza.

Daudi Yagumira Raba

²⁶ Ku ing'inga zana yeyo, Joabu yaazizagilira kulwaana Raba lidaala linene lia Amoni kandi yaali naveeye ahimbi kuligumira.

²⁷ Yatuma vatumwa ku Daudi navoora ndi; “Mali kwingilira Raba kandi mali kugumira havundu ha amazi gaturaa.

²⁸ Kalunu vungiza harara amahi googo gandi goosi, wingiliri lidaala linene zana na ulivuguli. Sinyenyaa mbuguli uluyali kigira ligumira lidaala yilio mba.”

²⁹ Kunangwa Daudi yavungiza harara amahi geege gatigala goosi, nazia kulwaana Raba, naalingilira kandi naligumira.

³⁰ Daudi yavugula itaji yi zahabu iyaali nuvulitu vwi zikilo salasini na tano kandi yaali namagina guvuguli vutambi muyo Moleki, umunyasaye wa vandu va Amoni. Daudi yavugula ligina liuvuguli zana kandi yaaliviika ku itaji yeeye. Yavugula kandi vilaanye vinyingi ligali kutura mu lidaala lia Raba.

³¹ Yavika avandu valio ku miyinzi kuyinzira ni misumeno, magembe givivia, kandi zimbazi zie vivia, kandi naavaniga kuyinzira okolomba amadafali. Yakola malala mere ku avandu vosi va madaala gandi goosi ga Amoni. Maku oyo harara na avandu veve viirana Jerusalemi.