2 Samweli 11 - KITABU KITAKATIFU

Daudi na Bazisheba

¹ Mu ing'inga yi vitagwa vimera, lwa avami vanene vazizaa mu liihi kazozo, Daudi yatuma Joabu na avanene veve kandi ni liihi lia vandu va Isiraeli kuzia mu vulwani. Vaguuta vandu va Amoni kandi nivakumbiriza lidaala linene lia Raba. Navuzwa Daudi mwene yaatigara mu Jerusalemi.

² Lidiku lilala hamugorova ligali, Daudi yavuka kutura mu lisosa lilie nazia kwigulu kwi inyumba yu vwami. Lwa yaali nagenda igulu wene yeyo, yalora mukali niyisinga. Mukali oyo yaali wi ligondo lilahi ligali.

³ Kunangwa Daudi yatuma mutumwa kuzia kumanya akaveeye vwaha; ma nanyoora ndi ni Bazisheba, mukaana wa Eliamu, mukali wa Uria, Umuhiti.

⁴ Maku Daudi yatuma avatumwa kuzia kumuleeta; vamuleeta kuye, kandi yagona harara naye. Mukali zana yaali niyakamara kwisinga kigira yaali naatuli mu madiku geege gu mweli. Ahene yaho yamanya niyirana yengo.

⁵ Lwinyima mukali uyu yamanya ndi umali kovereka, ku yatuma amakuva ku Daudi kumuvolera ndi aveeye ni inda.

⁶ Daudi yatuma amakuva ku Joabu: “Ndumira Uria Umuhiti yaaze ku inzi.” Kunangwa Joabu yaamutuma ku Daudi.

⁷ Lwa Uria yaduuka kuye, Daudi yamuteeva niiva Joabu na avasikari va mahi vaveeye avalamu, kandi kuli lilwaana lizizagiliraa.

⁸ Maku yavolera Uria, “Zia yengo osose hake.” Uria yatura nazia, Daudi yatuma kihanwa kuye yengo weve.

⁹ Navuzwa Uria siyaazia yengo weve mba, nitali yagona ha kirivwa chi inyumba yu vwami harara na avasikari, valindi vu mwami.

¹⁰ Lwa Daudi yahulira ndi Uria siaziiyi yengo mba, yamuteeva, “Ivi utuli vuzwa mu logendo lwene yilu; kigira ki nuuvula kuzia yengo?”

¹¹ Uria yativura, “Avasaza va Isiraeli ni Ivuyuda vaveeye ihale mu vulwani, kandi Lisandugu lie Lilagana liveeye navo; munene wange Joabu na avanene veve valombi hokososa mwigendanyama. Ngwisuuhiraa ndi sindakola kindu kuli yiki mba!”

¹² Maku Daudi yamuvolera, “Kunangwa tanga ove kalunu, na mugamba ndakutuma wirane mu liihi.” Kunangwa Uria yaali mu Jerusalemi lidiku yilio, ni lidiku lialonda ku.

¹³ Daudi yamugenihiza kulia chukulia cha mugolova naye, kandi naanwa kuduuka nahambika. Navuzwa uvudiku yivwo kandi, Uria siyaazia yengo weve mba. Mu vogono yivwo, yagona ku mulingedi gwigwe mu keng'oze chu kulindira inyumba yu vwami harara na avasikari vandi.

¹⁴ Lidiku lialondaku, Daudi yang'odera Joabu ibarwa natuma Uria agihilane.

¹⁵ Daudi yang'oda navoora, “Viika Uria imbiri wi liihi wu uvulwani voveeye uvululu ligali. Maku mwiruki ma mwirane inyima muleke yiitwi.”

¹⁶ Kunangwa lwa Joabu yaali nakumbiriza, lidaala linene, yatuma Uria ahi liihi lia vasigu vaali nizinguru.

¹⁷ Amahi ga vasigu vatuliza vasikari vaavo ichova wi lidaala linene klwaana amahi ga Joabu; valala ku vanene va Daudi viitwa harara na Uria.

¹⁸ Ahene yaho, Joabu yatuma amakuva ku Daudi namuvolera kuli vulwani vwali.

¹⁹ Yahaana malago ku mutumwa, “Inyima wokovolera mwami munene amakuva goosi gi liihi,

²⁰ hawundi alasinyika ma akoteeve, ‘Kigira ki nimwisuunda ahimbi ni lidaala linene kuvalwaana? Simwali kumanya ndi valalasa imivano juvuta nivaveeye ku lidigi?

²¹ Simumanyi kuli Abimeleki muyaayi wa Gidioni yitwa? Haali ha Zebesi ahu mukali yalasa lugina ku mutwi gwa Abimeleki kutura igulu wi lidigi kigilaki nimwisuunda himbi ni lidigi? Niiva mwami alakoteeva liteeva yili, umuvolere, mulala ku vasikari vovo Uria kali naye yaitwa.’ ”

²² Kunangwa mutumwa yazia ku Daudi, namuvolera aga Joabu yaali naamutumi avoole.

²³ Yavoola, “Avasigu viitu vaali nizinguru kuvita kunyi kandi nivatura mu lidaala linene kukulwaana mu kiguti. Navuzwa kwavakuunga nukuviranyia ku kirivwa chi lidaala linene.

²⁴ Ahene yaho vakulasa mivano juvuta kutura igulu wi lidigi, kandi valala ku avanene vu mwami vuluyali viitwa; mutumikiri woovo Uria yitwa kandi.”

²⁵ Daudi yavolera mutumwa zana “Luviriza Joabu kandi umuvolere ataveerera mba; kigira siunyala kumanya nivwaha waza akuziri mu vulwani mba. Muvoolere yingiliri lidaala linene ni zinguru zinene na muliguuti ligali.”

²⁶ Lwa Bazisheba yahulira ndi musaza weve witiiywi, yamusiomera ligali.

²⁷ Lwi ing'inga yilisioma yamalirika, Daudi yaamutumana yaaze munyumba yu vwami; yamanya naagwa mukali weve kandi namwivulira mwana muyaayi. Navuzwa Yahova siyayaanzizwa nicha Daudi yaali naakori mba.