2 Samweli 10 - KITABU KITAKATIFU

Daudi Yaguuta Vandu va Mori na Siria

¹ Inyima wa yaga, mwami Nahashi wa Amoni yakuza, kandi muyaayi weve Hanuni yavugula ovogono vwivwe.

² Mwami Daudi yavoola, “Kuduuka manyie uvusuuvirifu vwu vulina ku Hanuni, kuli baba weve yangolera.” Kunangwa Daudi yatuma avatumwa kumuleminya mwoyo kigira likuza lia baba weve. Lwa avatumwa vaduuka mu Amoni,

³ aviimiliri va vandu va Amoni vavoolera mwami, “Uganaganaa ndi gaveeye luyali lwa baba woovo ndi Daudi utumi avasaza yava kokoleminya mwoyo? Awa, avatumi hano ukutunyiriza lidaala linene vulahi kunangwa aduuki kukuguuta!”

⁴ Haruni yagumira avatumwa va Daudi, naakara lovega lulala lwi zinderu zia vuli musaza, naakara zinguvu ziavo hagati kutura ku kisindi ma navakuunga.

⁵ Vaali nizisoni ligali muno kali sivali vanyara kwirana yengo mba. Lwa Daudi yahulira ichaali nichekoleki, yatuma likuva ndi vamenye mu Jeriko na vatirana kuduuka zinderu ziavo ziviruki.

⁶ Avandu va Amoni vamanya ndi vamali kokora Daudi kuva musigu wavo, kunangwa vatuungaa avasikari vuvulwani zielefu sirini va vandu va Siria kutura Bezirehobu na Zoba avasaza vu vulwani zielefu likomi na vaviri kutura Tobu, kandi mwami wa Maaka na avasaza elefu ndala kuvalwanira.

⁷ Daudi yahulira amakuva yaga, ma natuma Joabu kuzia kulwaana navo niliihi liosi.

⁸ Avandu va Amoni vaatura nivavugura ovogono vwavo ha vwingiliru vwi kirivwa chi lidaala linene lia Raba; lwa avandi, vombi vandu va Siria, na avasaza kutura Tobu na Maaka, vaavugura vogono vwavo ichova mu viguuti.

⁹ Joabu yalora ndi amahi ga vasigu valavingilira kutura imbiri kandi kutura inyima; kunangwa yatovola avasikari valahi ligali va Isiraeli navaviika mu vogono vwavo kohenza vandu va Siria.

¹⁰ Yavika amahi ga avasikari vaatigara hasi hu vwimiliri vwa amwavo weve Abishai uwavaviika mu vogono okoheenza vandu va Amoni.

¹¹ Joabu yamuvolera, “Niiva olola vandu va Siria nivanguutaa, uzi kongonya, na niiva vandu va Amoni valava nivaguuta ivi, na inzi ndaza kokokonya.

¹² Ove wizingulu kandi muluviliri! Genda kulwaaniri avandu viitu vudinyu kandi madaala ga Nyasaye wiitu. Uvulariri vwa Yahova vokoleke!”

¹³ Joabu harara na avasaza veve visunda imbiri kwingilira, na vandu va Siria viiruka.

¹⁴ Lwa vandu va Amoni valora vandu va Siria niviruka, navo kandi viiruka kutura ku Abishai nivirana mu lidaala linene. Maku, Joabu yagirung'ana kutura mu lilwaana vandu va Amori niyirana Jerusalemi.

¹⁵ Avandu va Siria vamanya ndi vaguutiywi na vandu va Isiraeli, valanga amahi gaavo goosi harara.

¹⁶ Mwami munene Hadadezeri yalaga vandu va Siria vosi avaari kulovega lwi Ivugwi lwu mugera gwa Efurate vaza, vaduuka ha Helamu nivasingiliywi na Shobuki, munene wi liihi liu Mwami Hadadezeri wa Zoba.

¹⁷ Lwa Daudi yahulira amakuva yaga, yavungiza amahi ga Isiraeli nivambuka mugera gwa Jorodani, kandi nivagenda kuzia Helamu, aha vandu va Siria vaali nivelohizi kuvalwaana. Uvulwani vwatanga,

¹⁸ Avandu va Isiraeli vakunga liihi lia vandu va Siria nivaviiranyia inyima. Daudi harara na avandu veve vita avasaza vukuhila amagare gu vulwani ga vandu va Siria zimia saba, kandi avasaza zielefu arubaini avaniina ku zibarasi. Vaatoza Shobuki, munene wi liihi liu musigu, ma nakuzira yo mu kiguti chu vulwani.

¹⁹ Lwa avami, avaari nivasingiliywi na Hadadezeri vamanya ndi vaguutiywi, valomba lilagana lie mirembe na Isiraeli kandi nivagwa avatumikiri vaavo. Avandu va Siria vaatia ligali kokoonya vandu va Amoni mu vulwani kandi.