2 Samweli 1 - KITABU KITAKATIFU

Daudi ahuliraa amakuva gi likuza lia Saolo

¹ Inyima wi likuza lia Saolo, Daudi yirana kutura mu liguuta lilie ku vandu va Maleki kandi namenya mu lidaala lia Zikilaga ku madiku gaviri.

² Lidiku lialonda ku, umusoleri mulala yaduuka kutura mu hokososa ha Saolo. Kumanyia ovovereri vwivwe, yaali naatanduyi zinguvu kandi naviiki marova ku mutwi gwigwe. Yazia ku Daudi nasigama hasi kumuha uluyali lonene.

³ Daudi yamuteeva, “Utura hayi?” Yativura, “Inzi nduraa hokososa ha avandu va Isiraeli.”

⁴ Daudi yamuvolera, “Mbolera ichekoleki.” Yativura, “Liihi lietu liali kwiruka kutura mu vulwani, kandi avanyingi ku avasikari vi liihi liitu vaali kwitwa. Saolo nu muyaayi weve Jonazani vaali kwitwa kandi.”

⁵ Daudi yamuteeva, “Ivi umanyi ndi Saolo nu muyaayi weve vaakuzi?”

⁶ Musoleri oyo yativura, “Ndaali nimbeeye ku Kiguru cha Giliboa, kandi nindora Saolo naasedemi ku litimu lilie kandi amagare na avasaza vanina ku zibarasi zia avasigu vaali nivisundaa ahimbi ligali kuye.

⁷ Ahene yaho, yagirung'ana naandora, kandi yananga. Ndaahugila ‘Yee, mwami!’

⁸ Yandeva, ‘Ivi nivwaha?’ Na inzi ndaativura, ‘Inzi mbeeye umumaleki.’

⁹ Ahene yaho yavoola, ‘Hamba hano unziti! Saliriziywi vudamanu ligali, kandi mbeeye ahimbi kukuza.’

¹⁰ Kunangwa ndaazia kuye nimwiita, kigira ndamanya alakuza lwayagwa hasi. Maku ndaavugura itaji yikivia iyaali ku mutwi gwigwe, nikisambo chaali ku mukono, maku mali kuvileeta imbiri woovo, mwami wange.”

¹¹ Daudi yatandula zinguvu zizie mu vovereri kandi vasaza vi liihi vosi avaari naye vakora malala mere.

¹² Vaavereraa, nukusiomera nokohonga lilia kuduuka hamugorova, Saolo, Jonazani kandi Isiraeli, avandu va Yahova, kigira avanyingi avaari nivitiiywi mu vulwani.

¹³ Daudi yateeva musoleri waali naamuleeteye amakuva, “Uturaa hayi?” Yativura, “Inzi mbeeye Umumaleki, navuzwa menyi mu kivala chiinyu.”

¹⁴ Daudi yamuteeva, “Ivi uluviliyi ndi ukwita umwami mutovole wa Yahova?”

¹⁵ Daudi yalanga mulala ku avasaza vi liihi veve navoora, “Mwiti!” Musaza oyo yaduya umumaleki kandi naamusaliriza vudamanu ligali.

¹⁶ Daudi yavolera umumaleki zana oyo, “Ivi weleeteye yaga ivi mwene. Waali kwiikalagira umwene lwa uvugiliyi ndi waali kwita oyo wa Yahova yatovola kuva mwami.”

Daudi Asiomeraa Saolo na Jonazani

¹⁷ Daudi yimba lisioma yili kigira Saolo numuyaayi weve Jonazani,

¹⁸ kandi yalaga ulwimbu lwi lisioma yilu lwigizi avandu vi Ivuyuda. Lwang'odwa mu kitabu cha Yasharu.

¹⁹ “Ku vigulu via Isiraeli, Aviimiliri viitu vaakuzi! Avaluviriri kuvita vosi va avasikari viitu vagwiyi!

²⁰ Utalandiza makuva yaga mu Gazi anoho mu zinzira zia Ashikeloni, gase avakali va vandu va Filisitia valasangala, gase avakaana va avandu vatamanyi Nyasaye valasangala. Avakaana avandu vatamanyi Nyasaye valasangala.

²¹ “Imbura anoho iliime vitakuba ku vigulu via Giliboa mba, Milimi javio jive vugira viamo kazozo kigira zinguva zia avaluviriri ziigoni yo hasi mu zisoni, inguva ya Saolo si ivakiywi na maguta kandi mba.

²² Uvuta vwa Jonazani vwali vwukwita ligali, kivavi cha Saolo chaali vugira livererera nivuduyaa avizingulu nukwita umusigu.

²³ “Saolo na Jonazani, vaali avalahi kandi avayaanzwa ligali. Mulivamwoyo, kandi mu likuza; sivaavukana mba. Vaali avizimbiru kuvita zindizu. Vaali avizingulu kuvita zisimba.

²⁴ “Munyi avakali va Isiraeli, musiomere Saolo! Yamuvika zinguvu zinzakanyu ziuvutugi, kandi yavika izahabu ku zinguvu, kandi yaasiaha zinguvu zienyu ni vindu vie zahabu kandi magina guvuguli.

²⁵ “Avasikari avaluviriri vagwiyi, viitirwa mu vulwani. Jonazani agoni hasi umukuzu mu vigulu.

²⁶ “Inzi mbereraa kigira ivi, amwavo wange Jonazani Ivi oveeye wukuyaanziza ku inzi! Uvuyanzi vuvwo ku inzi vwali vwokogenyia; uvulahi ligali kuvita uvuyanzi vwa vakali.

²⁷ “Avasikari avaluliri vamali kugwa, viuma viavo ving'aliywi kandi siviveeye novokonyi mba.”