2 Petro 3 - KITABU KITAKATIFU

¹ Avalina vange avayaanze, yiyi ni ibarwa yange ya kaviri, mung'oderaa. Mu ziombi ngerizaa kuvukiza iziganagani zindahi mu mioyo jinyu ku limwizuliza amakuva yaga.

² Nyenya munyi mwizurizi amakuva gavoolwa na vaporofeti vatakatifu lwimbiri ni lilaga liu Mwami oveeye Muhonyi, lia mwahevwa kuvitira mu vatumwa vinyu.

³ Kindu chu kutanga, gamudukira mumanye ndi mu madiku ge keheri yaga, vandu valala valaloleka kuva vilivamwoyo liavo iliamiifwi ni likayirwa lie miviri jiavo valakamunyage kandi

⁴ valateeva, “Yalaga ndi alaza; na kalunu aveeye haliha? Avaguuga viitu vamala kukuza, navuzwa ivindu viosi vikiri vuzwa vilala viele kuli viali kutura lwe lirova lialombwa!”

⁵ Avandu yavo aveene vivilira kumanya ndi lwimbiri Nyasaye yahaana lilago, na ligulu kandi lirova vialombwa. Lirova lialombwa kutura ku mazi kandi na mazi,

⁶ kandi gaali amazi gi imbura yi migelera, agaajira lirova liali ho ni lidivizwa.

⁷ Navuzwa ligulu ni lirova, viveeye ho kalunu viviikiywi nililago lilala liere lia Nyasaye viduuki kudivizwa nu muliru. Viviikangwa kuduuka ku lidiku lie likalaga no kudivizwa kwa vandu vatamanyi Nyasaye.

⁸ Navuzwa avalina avayaanze, mutivilira ikindu kilala yiki! Mu zimoni ziu Mwami, lidiku lilala liveeye kuli mihiga elefu, kandi mihiga elefu jiveeye kuli lidiku lilala.

⁹ Mwami sialindagiraa kutwekiza lilagana lilie, kuli avandu vandi vaganagana. Navuzwa, aveeye umwikuziri ni munyi, kigira siyenya umundu kali mulala ku munyi adivizwi, navuzwa yenya vosi vaduuki ku lieganira.

¹⁰ Lidiku liu Mwami lilakaze kuli umwivi. Ku Lidiku yilio, ligulu lilatulizwa ho nu mufuumu munene. Ni miviri josi ju mwigulu jilasaambwa nu kudivizirwa mu muliru munene; lirova ni vindu vialio viosi vilasambwa.

Kwetegeka ku lidiku liu Mwami

¹¹ Kigira vindu yivi viosi vilakadivizwi munzira ndala nzere, gamudukira kuva avandu vu lugano ki? Gamudukira komenya mu liiva litakatifu,

¹² nimulindiliraa Lidiku lia Nyasaye kandi mukore vulahi kulilomba liduuki vwangu. Ku Lidiku yilio, ligulu lilakasambwe nu kudivizwa, ni vindu vialio viosi vilasaluluki no lomemo lonene.

¹³ Navuzwa, kolondekana ni lisuuviriza lilie, kunyi kulindiliraa konyoora ligulu lihia kandi lirova lihia; hango hu vutakatifu.

¹⁴ Kunangwa, avalina vange, lwa mukilindilira Lidiku yilio, mukore zinguru ligali muve avasereze, vugira imbara imbiri wa Nyasaye kandi muve ni mirembe naye Nyasaye.

¹⁵ Muloraa ndi liekuzira liu Mwami liveeye vwiyangu vwa hanaa kumunyi muduuki kohona kuli Paolo, amiitu wiitu muyanze yaamungodera, natumikira ovogeri vwa Nyasaye yamuha.

¹⁶ Yaga nigo gavoora mu zibarwa zizie ziosi lwa ng'oda ku makuva yaga. Viveeye ho nivindu vindi vidinyu mu zibarwa zizie via vandu vatumanyi kandi vataveeye valungi vivaalaa nu vugadi kuli vakora na makuva gandi ga mang'oda Matakatifu. Nandi veleteraa lidivizwa vene.

¹⁷ Navuzwa munyi, avalina vange, mwamanya vindu yivi. Muve mu lielinda kunangwa muvuli kogotizwa nu vugadi vwa vandu vachamu harara ma mugwi kutura havundu halahi.

¹⁸ Navuzwa muzizagiliri kuviruka mu zimbavasi novogeri vwu Mwami wiitu nu muhonyi Yeso Kristo. Uvukumi vove kuye, kalunu kandi mihiga ni mihiga! Amini.