2 Kyetsinyinga 9 - KITABU KITAKATIFU

Mwami wi kikali wa Sheba ageniha Solomoni

¹ Mwami wi kikali wa Sheba yahulira lusuma lwu mwami Solomoni, yazia Jerusalemi kumugeriza na amateeva madinyu. Yazia harara ni kiduma kenene cha vadendi, harara ni zing'amia ziali nizigingi viseve viafunya mwayu, izahabu inyingi na magina guvuguli vunyingi. Lwu mwami wi kikali wa Sheba na vadendi veve vaagana na Solomoni, yamuteeva mateeva ga yaali nago.

² Mwami Solomoni yahaana amativuli ku mateeva goosi ga yateevwa, na sihali ho kali ni liteeva lilala lidinyu ku mateeva ga yaatevwa mba.

³ Lwu mwami wikikali wa Sheba yahulira vogeri vwu mwami Solomoni, nalora inyumba yu vwami ya yaali ni yumbaki,

⁴ ni viukulia vilahi vialetwa komesa, likaala lia vanene, ni lidenda lia vatumikiri veve, ni lieviika liavo, ni vihaanwa viu kusamba via yahaana mu Litembeli lia Yahova, maku mwami wi kikali wa Sheba yaali ni ligenya linene ligali.

⁵ Mwami wi kikali wa Sheba yavolera mwami Solomoni, “Amakuva ga ndahulira mu kivala change kigira ivi nu vogeri vuvwo gaveeya gagiligali!

⁶ Si ndasuuvira agavambolera mba kuduuka lwa inzi mwene ndaaza kolola. Kali sindaali nindahulira inusu yu vogeri vuvwo mba. Ivi oveeye mugeri ligali kuvita kuli avandu vavoola.

⁷ Vaveeye nu vugasu avandu vovo, vaveeye nu vugasu avatumikiri vovo, avasingiraa imbiri woovo vuli kazozo nu kuhulira ovogeri vuvwo!

⁸ Wizominye Yahova Nyasaye woovo! Uwakuyanza nakuvika ku endeve yeeye yu vwami, kwamiiha mu lieta lilie. Kigira yayanza avandu veve Isiraeli, kandi ya kayaanzi kuvalinda vahindiri mihiga ni mihiga. Na kigira yaga, yakokola kuva mwami uduuki kulinda malago kandi vulungi.”

⁹ Mwami wi kikali wa Sheba yaaha mwami Solomoni vihaanwa via yaali naaleeti. Viali izahabu zikilo 4,000, ma kandi kedonye kenene ligali chu mudalasini kifunyaa mwayu, kandi magina malahi guvuguli vonene. Si haali ho ni vifunyaa mwayu kuli yivi viu mwami wi kikali wa Sheba yaaha mwami Solomoni mba.

¹⁰ Kandi avatumikiri vu mwami Huramu na vu mwami Solomoni valeta vihaanwa vie izahabu viavatuliza Ofura, kandi valeta misaala ji mitiva na magina malahi guvuguli vonene nivaha mwami Solomoni.

¹¹ Mwami Solomoni yatumikira misaala ji mitiva yiji kolomba vika vie Litembeli lia Yahova, ma kandi inyumba yeeye yu vwami, ma kandi nalomba migoye ju vukana ni vinanda via viimbiraa mu. Sihali ho ni kindu kuli yiki chaloreka ing'inga yindi mu kivala chi Ivuyuda.

¹² Mwami Solomoni yaaha mwami wi kikali wa Sheba ku vindu viosi via yenya, kali kuvita via yaali naleti ku mwami Solomoni. Mwami wi kikali wa Sheba yirana mu kivala chiche chene harara na vatumikiri veve.

Vutugi vwu mwami Solomoni

¹³ Vuli muhiga mwami Solomoni yanyoora ahimbi zikilo 23,000 zie izahabu,

¹⁴ komeeda ku uvusuru vwa yanyoora kutura ku vakiranyi na vakara. Avami vosi va Arebia na vamihi vi kivala cha Isiraeli kandi, vamuletera izahabu ni ifeza.

¹⁵ Mwami Solomoni yalomba zinguva zinene 200, na vuli inguva yavakwa ahimbi ni zikilo saba zie zahabu yaduywa,

¹⁶ kandi zinguva zingekeke 300 ziakunikwa na himbi zikilo zivaga zie izahabu yaduywa. Mwami Solomoni yavivika viosi munyumba yu mulitu gwa Lebanoni.

¹⁷ Mwami Solomoni kandi yaali nendeve enene yu vwami yalombwa ku miinu ge enzogu, ma kandi navaka ku izahabu indahi.

¹⁸ Uvwami vwene yivu vwali ni vika 6 ma kandi endeve yi zahabu yi virenge, na vuli lovega lwe endeve, yaali nu kwa makono gidira, kandi zisimba 2 ziasingiraa ku vuli lovega lwe endeve.

¹⁹ Ma kandi zisimba 12 ziasingira ku lovega lwene yiluo, vuli isimba yasingira ku nduru kwa vuli vika 6. Si haali ho ni lilomba liu vwami kuli yivu mu kivala cha Isiraeli mba.

²⁰ Vikombe viosi viu mwami Solomoni vialombwa ni zahabu, kandi iviju viosi munyumba yu Mulitu gwa Lebanoni viali vie zahabu indahi. Ifeza siyaloleka kuva yu vuguli mu madiku gu mwami Solomoni mba.

²¹ Mwami Solomoni yaali nizimeli ziukwelema ku nyanza enene, kandi zielemaa harara ni zimeri ziu mwami Huramu. Vuli mihiga 3 zimeri zizie ziranaa ni ziletaa izahabu, ifeza, amiinu gi zinzogu, zingugi ni vikondo.

²² Mwami Solomoni yaali mutugi kuvita, kandi mugeri kuvita ligali mwami wundi woosi mu lirova.

²³ Avandu vosi venya kuzia kuhuliriza ku vogeri vwivwe vwa Nyasaye yaali ni yamuha.

²⁴ Mundu sa mulala waza ku Solomoni yamuletera vihaanwa, viju vie zahabu ni feza, zigaanza, viugi, mudalasini, zibarasi, kandi zisukiri. Yaga gazizagilira vuli muhiga.

²⁵ Mwami Solomoni yaali kandi ni zinyumba 4,000 zia magare gu vulwani harara ni zibarasi zie liihi 12,000. Yavika zindala kuzio mu Jerusalemi ni zindi ziatigala ziosi yaazihila mu madaala manene gandi.

²⁶ Solomoni yaali mwamihi munene ku vami vandi vosi mu kivala kutura ku mugera gwa Efurate kuduuka ku vandu va Filisitia ma kandi ku lwako lwa Egebeti:

²⁷ Ing'inga yiyi yu mwami Solomoni yamiha, ifeza yaali inyingi kuli amagina mu Jerusalemi, na midaragwa jali minyingi kuli mikuyu ja kazozo mu kereremo chi Ivuyuda.

²⁸ Mwami Solomoni yaleeta zibarasi kutura Egebeti kandi kutura muvivala vindi viosi.

Liamiiha lia Solomoni mu vwiimbi

²⁹ Vindu vindi viosi via Solomoni yakola, miyinzi jije kutura mu litanga kuduuka ku limalirika, viangiodwa mu kitabu cha makuva gu muporofeti Nazani, mu voporofeti vwa Ahija wa Shilo, kandi mu malola gu muporofeti Ido kandi mu makuva gu vwamihi vwu mwami Jeroboamu wa Isiraeli.

³⁰ Mwami Solomoni yamiha mu Jerusalemi ku Isiraeli yoosi ku lwi mihiga 40.

³¹ Yakuza naateevwa mu Lidaala linene lia Daudi. Muyaayi weve Rehoboamu yavugula ovogono vwivwe kuli mwami.