2 Kyetsinyinga 8 - KITABU KITAKATIFU

Miyinzi minene ja Solomoni

¹ Solomoni yumbaka Litembeli ni inyumba yeeye yu vwami ku mihiga 20.

² Yumbaka vuhia madaala manene gu mwami Huramu yaali naamuheeye, ma natuma avandu va Isiraeli kuzia komenya mugo.

³ Mwami Solomoni yagumila vivala via Hamazi na Zoba,

⁴ kandi niyumbaka imbinga mu Lidaala linene lia Tadimori liveeye mwigendanyama. Kandi yumbaka uvuhia amadara manene goosi agaali mu Hamazi agatumika kuli amaviikiru.

⁵ Solomoni yumbaka vuhia kandi amadara manene ga Bezi-horoni yiluhia na Bezi-horoni yi indangu, amadara gi zimbinga zia madigi, virivwa ni miruguyu,

⁶ kandi yumbaka uvuhia Lidaala linene lia Baalazi, na madaala goosi ga mavikiru, na madaala goosi ga magare geege, na madaala ga vasaza vi zibarasi kandi yumbaka kindu choosi cha yenya ukwumbaka mu Jerusalemi, mu Lebanoni, kandi mu kivala choosi chu vwamihi vwivwe.

⁷ Avandu vosi avatigara kutura ku vandu viti, vandu va Hiti, Mori, vandu va Avaperezi, vandu va Hivi na vandu va Vajebusi, avatali ku vandu va Isiraeli,

⁸ kutura ku visukululwi vaavo, avatigara inyima wavo mu kivala, vandu va Isiraeli vavura kudiviza, ku yava, Solomoni yaatuliza mu avakola miyinzi ju vutugwa, kali kuduuka na kalunu.

⁹ Navuzwa ku vandu va Isiraeli, siyavakola kuva avatugwa ku miyinzi jije mba, navuzwa yavakola kuva avasikari, na vanene veve, avasikari ku magare geege, kandi na vasaza vi zibarasi zizie.

¹⁰ Yava nivo avaari vami avanene vu mwami Solomoni; 250 avaari nu vunyali kwamiiha avandu ku miyinzi midinyu ju vwumbaki.

¹¹ Solomoni yaatuliza mukali weve, mukaana wu mwami wa Egebeti kutura mu lidaala linene lia Daudi na muleeta munyumba yu vwami ya yaali na mwumbakiyi. Yavoola, “Umukali wange atamenyaa munyumba ya Daudi mwami wa Isiraeli mba, kigira havundu hoosi hi Lisandugu lie Lilagana lia Yahova liaveyange, haveeye Hatakatifu.”

¹² Solomoni ya haana visuuvilu ku Yahova ku vwali vwa yaali ni yumbaki imbiri wi Litembeli.

¹³ Yahaana vihaanwa viu kusamba kolondekana na malago gi lilaga lia Musa kigira vuli lidiku litakatifu lie lisabato, mweli muhia gwa masavo gi migadi jitali na mamera, amasavo gi ligesa, kandi amasavo gi vidioli.

¹⁴ Kolondekana na malago ga baba weve Daudi yaali na viiki ho, Solomoni yalohiza miyinzi ja vuli lidiku ja Avasaalisi, vandu va Levi avakonyana na avasaalisi mu liimba zinyimbu kandi no kokora zigasi ziavo. Kandi yalohiza avasikari vi Litembeli mu vika kokora miyinzi jiavo jia vuli lidiku ha vuli kirivwa, kolondekana na amalago ga Daudi, mutumikiri wa Nyasaye.

¹⁵ Avasaalisi na vandu va Levi valora miyinzi jaavo ku vindu viosi kandi ku mavikiru kolondekana na malago ga vahevwa nu mwami.

¹⁶ Kunangwa miyinzi josi ja Solomoni, kutura ku liviika musingi gwi Litembeli lia Yahova, ja malirika vulahi.

¹⁷ Maku, Solomoni yazia Ezionigeberi na Elazi, ku lujinga lwi nyanza ya Agaba mu kivala cha Edomu.

¹⁸ Mwami Huramu yatumira Solomoni zimeri harara na valala ku velemi veve vi limanya linene. Vazia harara na veelemi va Solomoni mwene mu kivala cha Ofura ma nivaletera mwami Solomoni Izahabu kuvita zikilo 15,000.