2 Kyetsinyinga 7 - KITABU KITAKATIFU

Ligulwa lie Litembeli

¹ Lwa mwami Solomoni yaali niyakamara lisaala lilie, umuliru gwiika kutura mwigulu nigusamba vihaanwa viukusambwa beyi kandi visiuviliru viali nivihaaniywi viosi; na ovong'ereng'anu vwu vukumi vwa Yahova vwizula Litembeli.

² Vasaalisi sivali vanyara kwingira mu Litembeli lia Yahova mba, kigira uvukumi vwa Yahova vwizula mu du.

³ Lwa avandu va Isiraeli valora muliru nigwika kutura mu ligulu, novong'ereng'anu vwu vukumi vwa Yahova nivwizula Litembeli du, vaagwa mamumama ku maru mu loze lwa magina kandi nivinama nivasigamira Nyasaye kandi nivamwizominya kigira uvugasu vwivwe kandi uvuyanzi vwivwe vwi mihiga ni mihiga. Vaasaalandi “Yahova aveeye mulahi; uvuyanzi vwivwe vuhindira mihiga ni mihiga.”

⁴ Maku Solomoni harara na vandu vosi vaahana visiuviliru ku Yahova.

⁵ Mwami Solomoni yahaana visiuviliru vie zing'ombe 22,000, amagondi 120,000 kuli vihaanwa vie mirembe. Nandio Solomoni na vandu vatakasa Litembeli lia Nyasaye.

⁶ Vasaalisi vasingira mu vogono vwavo; kuli vandu va Levi vaakora ni viju via Yahova viukwimbira, viu mwami Daudi yaali ni yalomba kulwu kwizominya Yahova kandi iviatumikirangwa lwa yaahaanaa lisandiza, navoora, “Vuyanzi vwivwe vuhindiraa mihiga ni mihiga.” Avasaalisi vaakuba visiriva nivahenzi vandu va Levi, na vandu vosi va Isiraeli vasingira.

⁷ Mwami Solomoni yatakasa hagati humugizi imbiri wi Litembeli lia Yahova, na yahaanira ho vihaanwa vie mirembe kandi vihaanwa viu kusambwa, uvuswage kandi zitinya zie vihaanwa vie mirembe. Yakola ndio kigira uvwali vwu mugasa vwa yaali niyumbaki vwali vokekeeke ligali.

⁸ Kunangwa Solomoni harara na avandu vosi va Isiraeli valomba lisavo lie Lilia lie vidioli ku madiku saba. Haali ho ni kiduma cha vandu kutura ihale kuli, Kivitiru cha Hamazi mu lovega lwa Ivaale kandi kuduuka ku lwako lwi Egebeti mu lovega lwa Isavaalu.

⁹ Vaali nivavuguyi madiku 7 ku litakasa uvwali, ma kandi madiku gandi saba kulwi Lisavo. Ku lidiku liu kumalirika vaali ni lilia liu kumala,

¹⁰ kandi ku lidiku lialonda ku, lidiku lia 23 liu mweli gwa Saba, Solomoni yatuma avandu vazie yengo wavo. Vaali nu vuyanzi ku vugasu vwosi vwa Yahova yaali nahaani ku vandu veve Isiraeli, ku Daudi kandi ku Solomoni.

Nyasaye alolekaa ku Solomoni kandi

¹¹ Inyima wa Solomoni yaali niyakatwekiza kwumbaka Litembeli lia Yahova kandi inyumba yu vwami, kandi inyima wa yatwekiza vulahi vindu viosi via yalohiza kolomba mu mwoyo gwigwe, kokora mu Litembeli lia Yahova kandi munyumba yeye mwene yu vwami,

¹² Yahova yaloleka kuye mu vudiku namuvolera, “Mali kuhulira lisaala liilio, kandi mali kotovola Litembeli yili kuli havundu hi visiuviliru vihaanwa ku inzi.

¹³ Lwa ngumira imbura Ivuli kukuba anoho ninduma zisigi kulia vitagwa vienyu, anoho ninduma vulwaye vuhambizana uvwiti avandu vange,

¹⁴ niiva vasaala ku inzi nukwiganira kandi vagirung'ane kutura ku vudamanu vwa vakolangi, maku nda vahulira mwigulu nu kusamiiha uvwoni vwavo, nokokola kivala chavo keve nilizizagilira lilahi imbiri niligasizwa.

¹⁵ Ndalinda Litembeli yili ligali kandi ndahulira lisaala liosi liasaalwa hano.

¹⁶ Mali kotovola nu kutakasa Litembeli yili kuli havundu ha Inzi sigamirwa mihiga ni mihiga. Ndahalinda kandi ndahakinga ku zing'inga ziosi.

¹⁷ Niiva ulandumikira nu vusuuvirifu vwosi kuli baba woovo Daudi yakola, nukuhulira malago gange nokokola vindu viosi via mali kukulaga,

¹⁸ Inzi ndadukiza lisuuviriza lia ndalomba ku baba woovo Daudi lwa ndamuvolera ndi Isiraeli valamiifwa kazozo ni visukululwi vivie.

¹⁹ Navuzwa niiva ivi harara na vandu vovo mulavula kuhulira malago gange ga mali kumuha, kandi musigamiri avanyasaye vandi,

²⁰ maku ndamutuliza mu kivala cha ndaamuha, kandi ndaleka Litembeli yili lia mali kutakasa kuli havundu ha sigamirwa. Avandu havundu hoosi valalichaya kandi valalikolera kehenyahenye.

²¹ “Litembeli yili liveeye kalunu nu luyali lonene muno, navuzwa lwene yilwo mundu woosi uvitira hene hano alava ni ligenya ligali, na alateeva, ‘Kigira ki Yahova naakora kindu yiki ku kivala yiki kandi ku Litembeli yili?’

²² Avandu valativura, ‘Gaveeye kigira valeka Yahova Nyasaye wavo, uwatuliza avaguuga vaavo mu kivala cha Egebeti. Vahaana uvusuuvirifu vwavo ku avanyasaye vandi nukuvasigamira. Yicho nicho chagira Yahova naaleta kivi yiki kuvo.’ ”