2 Kyetsinyinga 6 - KITABU KITAKATIFU

Limoloma lia Solomoni ku Avandu

¹ Maku mwami Solomoni yasaala navoora, “Yahova, ivi umali kotovola komenya mu malesi kandi mu kisundi.

² Kalunu inzi mali kukwumbakira Litembeli linene liu vukumi, havundu ha ivi omenya mihiga ni mihiga.”

³ Mwami Solomoni yagirung'ana nahenza avandu vaali ni vasingiye ho, nagaasiza livugana lia vandu vosi va Isiraeli.

⁴ Hene yaho, yavoola, “Yizominywe Yahova Nyasaye wa Isiraeli! Amali kutwekiza Lisuuvirizwa lia yalomba ku baba wange Daudi, lwa yamuvolera,

⁵ ‘Kutura ing'inga ya ndatuliza avandu vange mu kivala cha Egebeti kuduuka kalunu, sindatovora lidaala liosi linene mu kivala cha vandu va Isiraeli kuli havundu hu kwumbaka Litembeli ahanyala kusigamirwa mba, kandi sindatovora mundu woosi kwamiiha avandu vange Isiraeli.

⁶ Navuzwa kalunu mali kotovola Jerusalemi kuva havundu hu kusigamira, na ivi Daudi, ulamiha avandu vange.’ ”

⁷ Solomoni yaazizagilira, “Baba wange Daudi yalohiza kwumbaka Litembeli kigira Lisigamira lia Yahova Nyasaye wa Isiraeli;

⁸ Navuzwa Yahova yamuvolera, ‘Ivi oveeye vulungi mu lienya kwumbaka Litembeli kigira inzi,

⁹ navuzwa si ulaliumbaka mba. Muyaayi woovo mwene niye uliumbaka Litembeli liange.’

¹⁰ “Kalunu Yahova umali kuduukiza Lisuuviriza lilie. Inzi mali kuvugura vogono vwa baba wange kuli mwami wa vandu va Isiraeli, kandi mali kwumbaka Litembeli kigira lisigamira lia Yahova Nyasaye wa Isiraeli.

¹¹ Mali kuviika mu Litembeli Lisandugu lie Lilagana lia Yahova, iliveeye mu ni vibaho via amagina vie Lilagana lia Yahova yalomba na avandu va Isiraeli.”

Lisaala lia Solomoni

¹² Hene yaho, mwami Solomoni yazia nasingira imbiri wu vwali vwa Yahova mu zimoni zie livugana liosi lia Isiraeli, naaginga makono geege igulu.

¹³ Solomoni yaali naalombi kitalazi chu mugasa nakiviiki hagati hu mugizi. Kitalazi chene yiki chaali uvutambi nu vugika zimita 2.2 zimbega ziosi, na kuzia igulu chaali zimita 1.3. Solomoni yanina ku kitalazi chene yiki, nasigama ku havundu hu mundu woosi yaali anyala kumulora, ma naginga makono geege mwigulu.

¹⁴ Yasaala navoora, “O, Yahova, Nyasaye wa Isiraeli, si aveeyeho na Nyasaye wundi kuli ivi, mwigulu igulu anoho ku lirova mba, ivi udukiza lilagana liilio na vandu vovo, kandi umanyianga vuyanzi vuvwo vutali nekeheri ku vatumikiri vovo avagendaa imbiri woovo nu mwoyo mulala.

¹⁵ Ivi umali kuduukiza lisuuvirizwa lia walomba ku baba wange Daudi, na kalunu makuva googo goosi gamali kuduukizwa.

¹⁶ Kalunu O, Yahova, Nyasaye wa Isiraeli, udukiza malagano gandi ga walomba ku Daudi baba wange aga wa musuuviriza ndi, halavaho na mulala ku visukululwi veve uliamiiha kuli mwami munene wa Isiraeli, niiva valahulira ivi nokogenda mu malago gange kuli ivi wagenda imbiri wange.”

¹⁷ Kunangwa kalunu, O, Yahova; Nyasaye wa Isiraeli, leka makuva goosi gaduuki kuduukizwa agawasuuviriza mutumikiri woovo Daudi.

¹⁸ “Navuzwa ivi O, Nyasaye, oveeye unyala komenya ligali mu lirova harara na vandu? Kali ligulu liosi siliveeye linene linyala kuduuka ivi omenye mu mba. Kunangwa Litembeli yili lia inzi mali kwumbaka linyala kuva linene liduka ivi?

¹⁹ O, Yahova Nyasaye wange, inzi mbeeye mutumikiri woovo. Hulira lisaala liange na uhaane mativuli ku ligoonya ni lianira liange.

²⁰ Linda Litembeli yili mbasu nu vudiku. Ivi umali kulaga ndi, havundu yaaha niho aha ivi usigamirwa. Kulwayago, hulira lisaala liange lwa mbenzaa Litembeli yili nisaara.

²¹ Hulira lisaala liange kandi lisaala lia avandu vovo Isiraeli lwa koheenzaa havundu yaaha nu kusaala. Noveeye mwigulu hango hoho halahi, hulira lianira lietu kandi ukusamihi.

²² “Lwu mundu yoneranga mundu wundi ma yenyeka yaaze yisuhi imbiri wu vwali mu Litembeli, kwisuuha ndi si aveeye nuvudamanu,

²³ O, Yahova, hulira noveeye mwigulu na ukalagiri mutumikiri woovo. Haana mageri ku mudamanu kuli gamudukira, na uleke oyo utali nu vudamanu ave.

²⁴ “Lwa vandu vovo Isiraeli vaguutwa na vasigu vaavo kigira vamali kukokolera uvwoni, ma kandi lwa vagirung'ana ku ivi ma nivazia mu Litembeli yili, kusaala uvasamihi,

²⁵ hulira lisaala liavo kutura mwigulu na usamihi uvwoni vwa vandu vovo Isiraeli, ma uviilanyie mu kivala chawaha avaguuga vaavo.

²⁶ “Lwa ugumira imbura ivuli kukuba kigira avandu vovo vamali kokokolera uvwoni, ma kandi lwa viganiraa nokoheenza Litembeli yili, nivakusaala mu liegehiza,

²⁷ O, Yahova, hulira lisaala liavo mwigulu ma usamihi uvwoni vwa vatumikiri vovo, avandu va Isiraeli ma uviigize vakole agaveeye malungi. Hene yaho, O, Yahova, tuma imbura ku kivala chicho cha waha avandu vovo kuli miandu ji mihiga ni mihiga.

²⁸ “Lwi inzala eveeye ho mu kivala anoho vulwaye vudamanu, anoho kemeyu ni vitagwa viononywa, anoho zisigi anoho lwa vasigu vakumberiza avandu vovo, kinga lwa haveeye ho nu vulwaye anoho ulukuzu ku vandu vovo,

²⁹ huliriza lisaala liavo. Niiva mulala ku vandu vovo Isiraeli, mulienya lio mwoyo gwu vovereri, anyiira makono geege nu kuhenziza ku Litembeli yili mu lisaala.

³⁰ Huliriza lisaala liavo kutura hango hoho mwigulu, ma uvasamihi. Ivi weng'ine umanya zing'anagani zia vuli mwoyo gwu mundu. Kolera vuli mundu sa mulala kuli adukanaa akolerwe,

³¹ kunangwa avandu vovo vaduuki kukuhulira nu kutia ivi zing'inga ziosi zia vamenya mu kivala cha waha avaguuga viitu.

³² “Kandi ndio, lwa mugeni woosi, utaveeye mulala ku vandu vovo Isiraeli, yaazaa kutura mu kivala chi hale kigira lieta liilio linene, nu mukono gugwo gwi zinguru, mukono gugwo gwa nyirika, lwa yaazaa nu kusaala nivahenzi ku Litembeli yili,

³³ huliliza kutura mwigulu ho vomenyo vuvwo, ma okole goosi kolondekana na agumugeni akusaala umukole; kuduuka avandu vosi avaveeye mu lirova vaduuki kumanya lieta liilio nu kutia ivi, kuli vandu va Isiraeli vaatia nu kuhulira. Na ndio, vandu yava vaduuki kumanya ndi, Litembeli yili iliamali kwumbaka lilangangwa ku lieta liilio

³⁴ “Niiva avandu vovo valatura kuzia kulwaana avasigu vaavo, kunzira yoosi yavatumira ku, ma vasaale ku ivi nivahenzi ku lidaala linene yili lia watovola ma kandi Litembeli yili iliamali kwumbaka kigira lieta liilio,

³⁵ Maku, hulira lisaala liavo kutura mwigulu ma uvahe uvuguuti.

³⁶ “Lwa vandu vovo vakolera ivi uvwoni, na havulaho nu mundu okolaa uvwoni, ma mu vutima vuvwo oleka avasigu vaavo vavaguuti nu kuvavugula kuvahila mu kivala kindi kuli avahambe, kali niiva kivala chene yiki keveeye ihale ligali,

³⁷ hulira lisaala lia vandu vovo. Niiva valiganira nu kusaala ku ivi mu kivala chene yicho, nokovoora zimbi ziavo ku ivi, hulira lisaala liavo, O, Yahova.

³⁸ Niiva valiganira nu mwoyo mulala na roho mulala mu kivala chavo chu vuhambe, ma vasaale ni vahenzi ku kivala chavo, cha ivi waha avaguuga vaavo, lidaala linene lia ivi watovola, kandi Litembeli lia inzi ndumbaka kigira lieta liilio,

³⁹ Maku, hulira lisaala liavo kutura mwigulu ho vomenyo vuvwo, ma uvahe uvuguuti kandi usamihi avandu vovo avamala kwonera ivi.

⁴⁰ “Kalunu, O, Nyasaye wange, ngogonya ohenze avandu vovo kandi huliriza lisaala lihaanangwa havundu hano.

⁴¹ Kalunu singira, O, Yahova Nyasaye, kandi harara ni Lisandugu lie Lilagana liilio, liveeye kelolero chi zinguru zizio, ma wingiri mu Litembeli ma omenye mu mihiga ni mihiga. Gasiza avasaalisi vovo ku goosi ga vakora, kandi yaanza avandu vovo vosi vave nu vusangali kigira uvulahi vuvwo kuvo.

⁴² O, Yahova Nyasaye, utasula mwami wa umali kotovola. Wizulizi uvuyanzi vwa waali navwo ku mutumikiri woovo Daudi.”