2 Kyetsinyinga 5 - KITABU KITAKATIFU

¹ Lwu mwami Solomoni yaali ni yakamala miyinzi josi ku Litembeli, yavika mu mavikiru gi Litembeli vindu viosi via baba weve Daudi yaali niyamala kutakasa kulwu vutumiki vwa Yahova: ifeza, izahabu, ni iviju viosi.

Lisandugu lie Lilagana livikangwa mu Litembeli

² Maku Mwami Solomoni yalanga aviimiliri vosi vi zihiiri ni viliango via Isiraeli vaze kuvugana mu Jerusalemi, vaduuki kuhila Lisandugu Lie Lilagana lia Yahova kutura Ziyoni, Lidaala linene lia Daudi, kuduuka mu Litembeli.

³ Avandu vosi vavugana harara imbiri wu mwami Solomoni mu ing'inga yi Lisavo lie vidioli.

⁴ Lwa avimiiri vosi va Isiraeli vaali nivakavugana harara, vandu va Levi vaginga Lisandugu Lie Lilagana lia Yahova igulu,

⁵ ni valihila mu Litembeli. Vandu va Levi na Avasaalisi vasuunda Lihema lia Yahova, kandi ni viju vialio vitakatifu viosi mu Litembeli.

⁶ Mwami Solomoni na vandu vosi va Isiraeli vavugana harara imbiri wi Lisandugu lie Lilagana, kandi vita visiuviliru vinyingi via magondi ni zing'ombe zinyingi ligali, zitanyala kuvalizwa mba.

⁷ Maku vandu va Levi vaginga Lisandugu lie Lilagana lia Yahova ni valihila mu Litembeli nivaliviika Havundu Hatakatifu ligali.

⁸ Zimbaha ziavambuka nizifuma Lisandugu lie Lilagana kandi ni misaala ja liagingilwa ku.

⁹ Misaala jene yiji jaali mitambi kali zisonga jazio jaali jinyala kololeka ku mundu woosi wasingilaa imbiri wa Havundu Hatakatifu ligali, navuzwa sijali jinyala kololeka kutura ichova mba. Misaala zana yijo jikikiri ho kuduuka na kalunu.

¹⁰ Kindu sichali musi mwi Lisandugu Lie Lilagana Lia Yahova mba, nitali vibaho 2 via magina via Musa yaali naviiki mu ha kiguru cha Sinai, lwa Yahova yalomba lilagana na vandu va Isiraeli lwa vaali nivaturaa mu kivala cha Egebeti.

Vukumi vwa Yahova

¹¹ Lwa vasaalisi vosi vaali nivatulaa mu Litembeli, vaali niviitakasi aveene, vugira kumanyikana ku miganda jaavo.

¹² Ma kandi vandu va Levi vosi avaari avimbi, Asafu, Hemani, na Jeduzuni, avana vayaayi vaavo, na viiko vaavo vosi, viviika zinguvu zindahi, harara ni vikuli nu vukana vwi migoye. Vasingira Ivugwi wu vwali harara na avasaalisi 120 avaari avakubi vi visiriva.

¹³ Lwa vakubi vi visiriva na viimbi vi zinyimbu vahambana harara mu Lizominya Yahova nu kuhaana Lisandiza, nu kwimba igulu harara ni visiliva, vikuli, kandi ni vindu vindi viosi viu kwimbira mu. Viimba nu kwizominya Yahova, nivavoora, “Yahova aveeye mulahi, kigira vuyanzi vwivwe vomenyaa mihiga ni mihiga.” Maku, Litembeli lia Yahova liizula lilesi,

¹⁴ na avasaalisi sivakora miyinzi jaavo mba, kigira lilesi liali linyingi, na vukumi vwa Yahova vwiizula mu Litembeli lia Nyasaye.