2 Kyetsinyinga 4 - KITABU KITAKATIFU

Iviju vie Litembeli

¹ Mwami Solomoni yalomba uvwali vwu mugasa uvutambi zimita 9 uvugalamu zimita 9 na uvudiguluku igulu zimita 4.5.

² Yalomba kandi lidangi liu mugasa likundumbu, zimita 2.2 kuzia musi, zimita 4.4 kuvitira hagati kutura lovega lulala kuzia ku lundi na zimita 13.2 mu vovodong'anu. Lia langwa inyanza.

³ Luliga lwi chova lwi lidangi lwasiafa ni zimbaso 2 zia mangirinya, lulala igulu wu ulundi. Amangirinya zana gafana vifananyi vie zigiriki, iziali nizilongeywi harara mu kedonye kilala chere ni lidangi lindi liosi.

⁴ Lidangi zana liasingira ku migongo ji zigiriki 12 zie migasa. Iziahenza ichova, 3 ziahenza mu vuli lovega lwa Ivaale, Isavaalu, imadioli ni Ivugwi.

⁵ Lidigi lie lidangi zana liali uvulitu zimilimita 75. Ululiga lwalio lwali kuli luliga lwe kekombe, nilulingika ichova kuli amatu gi kimuli chi lidanya. Lidanya zana liaginga zilita 60,000 zia amazi.

⁶ Valomba kandi zibenzeni 10, 5 ziavikwa ku lovega lwa Ivaale wi Litembeli na 5 ku lovega lwi Isavaalu. Ziatumikirwa kwogizilaku vidonye vie zinyama iviasambangwa kuli visiuviliru. Amazi gu mulidangi gatumikirwa na vasaalisi ukwisaava.

⁷ Yalomba vinara vie zahabu 10 vie zitaya kuli galohizwa, kandi naavisingiriza mu Litembeli, 5 kulovega lwa Ivaale na 5 kolovega lwi Isavaalu.

⁸ Yalomba kandi zimesa 10, naziviika mu Litembeli, 5 kolovega lwi Ivaale na zitano kolovega lwi Isavaalu. Yalomba kandi zibakuli zie zahabu 100.

⁹ Solomoni yahaana malago zinze ziviri ziumbakwe; olokekeke lwa vasaalisi veng'ine vaali vanyara kutumikira, kandi olonene lwichova. Miliango jivirivwa jingiraa mu migizi giviri yiji jafuumwa nu mugasa.

¹⁰ Lidangi liavikwa ahimbi ne kona kulovega lwi Ivugwi wa Isavaalu wi Litembeli.

¹¹ Huramu yalomba kandi zinyingu, mijiko ni zibenzeni. Kunangwa Huramu yamaliriza miyinzi ja Yasuuviriza mwami Solomoni ndi alakola ku Litembeli lia Nyasaye:

¹² Zitiru 2, zibakuli, mitwi 2 igulu wi zitiru, mangirinya 2 gi minyororo kukunika zibakuli 2 zie mitwi ijaali igulu wi zitiru.

¹³ Yalomba kandi makuyu gumugasa 400 zia mangirinya geneti. Zimbaso 2 zia makuyu ku vuli mangirinya, geneti, kukunika zibakuli 2 zie mitwi jaali ku zitiru

¹⁴ Yalomba vwikaliru kandi, zibakuli ku vwikaliru,

¹⁵ kandi lidangi lia mazi lilala zana ni vifananyi vie zigiriki 12 isi walio

¹⁶ zinyingu, vijiko kandi uvwuma kandi niviju viosi via Huramu Abi yalombera mwami Solomoni vive vie Litembeli lia Yahova Nyasaye. Viosi vialombwa ku mugasa mung'ereng'anu.

¹⁷ Mwami Solomoni yalaga vilongerwe hagati ha Sakozi na Zeredahi mu livona lia Jorodani.

¹⁸ Mwami Solomoni yalomba iviju yivi mu vunyingi ligali. Uvulitu vwu mugasa gwatumikirwa sivwaali vunyala kumanyikana mba.

¹⁹ Mwami Solomoni yalomba kandi iviju vie zahabu viu mu Litembeli: Uvwali, kandi ni zimesa ziu mugadi mutakatifu gwa Nyasaye;

²⁰ vinara vie zitaya ni zitaya zie zahabu indahi izienyekaa ziaduki imbiri wa Havundu Hatakatifu ligali, kolondekana ku lilohiza;

²¹ amauwa gukusiaha, zitaya, kandi kigumiliru,

²² na makasi gukukala ludambi, zibakuli, zisahani zie kimuli, kandi vifuria viu kutumikirwa kuginga amanda gu muliru. Iviju yivi viosi vialombwa ku izahabu indahi ligali. Miliango ji chova ji Litembeli kandi miliango jingiraa Havundu Hatakatifu ligali javakwa izahabu indahi ligali.