2 Kyetsinyinga 36 - KITABU KITAKATIFU

Mwami Jehoahazi wi Ivuyuda

¹ Avandi vi kivala chi Ivuyuda vatovora Joahazi mwana muyaayi wa Josia, nivamukora kuva mwami mu Jerusalemi mu vogono vwa baba weve.

² Joahazi yaali ni mihiga 23 lwa yaatanga kwamiiha kuli mwami wi Ivuyuda, na yamiha mu Jerusalemi ku mieli 3.

³ Mwami Neko wa Egebeti yamugumira kuli muhambe, ma nalomba avandu vi Ivuyuda kosolola zikilo 3,400 zie ifeza, kandi zahabu zikilo, 34 kuli vusuuru.

⁴ Mwami Neko yavika Eliakimu amwavo weve kuva mwami wi Ivuyuda, ma nagirung'anyia lieta lilie kuva Jehoyakimu. Mwami Neko yaahira Jehoahazi mu Egebeti.

Mwami Jehoyakimu wi Ivuyuda

⁵ Jehoyakimu yaali ni mihiga 25 lwa yaatanga kwamiiha kuli mwami wi Ivuyuda. Yamiha mu Jerusalemi ku mihiga 11. Yakola uvwoni imbiri wa Yahova Nyasaye weve.

⁶ Lwa Jehoyakimu yaali mwami wi Ivuyuda, mwami Nebukadineza wa Babiloni yingilira kivala chi Ivuyuda, nagumira Jehoyakimu naamuvoha ni minyororo ma naamuhira Babiloni kuli muhambe.

⁷ Mwami Nebukadineza yaginga vindu vilala mu mavikiru gi Litembeli, lia Yahova naahira munyumba yeeye yu vwami mu Babiloni.

⁸ Vindu vindi viosi viu mwami Jehoyakimu yakola, harara ni vikolwa viu kuvihiliriza kandi nu vudamanu vwosi vwa yakola, viang'odwa mu kitabu cha makuva ga kale ga avami vi Ivuyuda na Isiraeli, na muyaayi weve Jehoyakini yavugula ovogono vwivwe kuli mwami.

Mwami Jehoyakini wi Ivuyuda

⁹ Jehoyakini yaali ni mihiga 18 lwa yaatanga kwamiiha kuli mwami wi Ivuyuda, na yamiha mu Jerusalemi ku mieli 3 na madiku 10. Mu madiku gi liamiiha lilie, yakola uvwoni imbiri wa Yahova, kuli baba weve yakola.

¹⁰ Ing'inga yi imbura yu kutanga mu muhiga, lwa Jehoyakini yaali mwami Nebukadineza yaahira Jehoyakini mu Babiloni muvuhambe, kandi navugura viju viu vuguli vwigulu kutura mu mavikiru gi Litembeli lia Yahova. Maku Nebukadineza yavika Zedekia amwavo Jehoyakini kuva mwami wi Ivuyuda na Jerusalemi.

Mwami zedekia wi Ivuyuda

¹¹ Zedekia yaali ni mihiga 21 lwa yaatanga kwamiiha kuli mwami wi Ivuyuda, ma yamiha mu Jerusalemi ku mihiga 11.

¹² Yakola uvwoni imbiri wa Yahova Nyasaye weve na siyahuliriza ni liegehiza gu muporofeti Jeremia mba, uwamoloma makuva ga Yahova.

Liguutwa lia Jerusalemi

¹³ Zedekia yibaala ku mwami Nebukadineza, uwaali naamunigi yisuhi mu lieta lia Nyasaye ndi alava musuuvirifu kuye. Kigira kirage chiche ya suraa kwiganira kandi kwirana ku Yahova Nyasaye wa Isiraeli.

¹⁴ Komeeda ku gene yago, aviimiliri vosi vi Ivuyuda, avasaalisi, kandi avandu vosi valonda liiva lio vwoni lia vizihiiri vavakumbiriza; mu lisigamira vifananyi viukuvihiliriza kunangwa vonogonyia Litembeli lia Yahova mwene yatakasa mu Jerusalemi.

¹⁵ Yahova Nyasaye wa vaguuga vaavo yaazizagilira kutuma avaporofeti ukwiganihiza avandu veve kigira yenya kuvahonyia kandi kosoola Litembeli lilie.

¹⁶ Navuzwa vakolera vaporofeti va Nyasaye, kehenyahenye nivahuhiza makuva geege kandi nivavasekeliza, Kuduuka lwu vutima vwa Yahova vwavuukira avandu veve na sihali ho nichokohonyia mba.

¹⁷ Kunangwa Yahova yaleeta mwami wa Babiloni kuvingilira. Mwami zana yita avayaayi vi Ivuyuda, kali yavo avaari mu Litembeli lia Yahova. Si yaali niliverera ku mundu woosi, muyaayi anoho musakulu, musaza kinga mukali, mulwaye anoho mulamu mba. Nyasaye yavahana vosi kuye.

¹⁸ Mwami Nebukadineza wa Babiloni yalaanya Litembeli, livikiru lie Litembeli kandi uvutugi vwu mwami harara nu vwa vanene veve, ma nazia nivindu viosi Babiloni.

¹⁹ Yasamba Litembeli lia Nyasaye kandi lidaala linene harara nizinyumba ziuvwami zialio, kandi nivononyia uvutugi vwalio naduya lidigi lie Lidaala.

²⁰ Yaahira mu vuhambe yavo vosi avaahononoka mu Babiloni yavo vosi avaari ni vahononoki kutura ku kivavi; na vaagwa avatumikiri veve kandi avi kisukururwi chiche kuduuka lwu vwami vwa Pasia vwatanga kwamiiha.

²¹ Nandio aga Yahova yaali niyavoola kuvitira mu muporofeti Jeremia gaaduukizwa: “Kivala kilatigala ichere ku mihiga 70, kutwekiza lisosa lie lisabato lia mwavura kulinda.”

Mwami Sairasi alaangaa Avayuda ukwirana

²² Mu muhiga gwu kutanga gwu vwamihi vwu mwami Sairasi wa Pasia, Yahova yakola aga yaali navooye kuvitira mu muporofeti Jeremia kuva agiligali. Yaavukiza mwoyo gwu mwami Sairasi ukuhaana lilaga yili na kulituma ichova mu mang'oda gasomwe vudinyu havundu hoosi mu vwami vwivwe:

²³ “Yili nilio lilaga lia Sairasi Mwami wa Pasia. Yahova, Nyasaye wu mwigulu umali kongola mwamihi ku lirova liosi na umali kumba miyinzi Ju kumwumbakira Litembeli mu Jerusalemi mu Ivuyuda. Kalunu, munyi mwosi, avaveeye vandu va Nyasaye, muzie yo, na Yahova Nyasaye winyu ave harara ni munyi.”