2 Kyetsinyinga 35 - KITABU KITAKATIFU

Josia yalomba Lisavo lie Lipasaka

¹ Mwami Josia yalaga avandu kolomba lilia lie Lipasaka mu Jerusalemi mu lihaana uluyali Ku Yahova; ku lidiku lia 14 liu mweli gwu kutanga, vita vimeme.

² Mwami yagavulira avasaalisi miyinzi ja venyeka vakole mu Litembeli, navadinyiriza vulahi.

³ Kandi mwami yavolera vandu va Levi avaari vigizi mu Isiraeli yoosi, kandi avaari avatakase ku Yahova; “Muviiki Lisandugu litakatifu lie lilagana lia Yahova, mu Litembeli lia Solomoni muyaayi wa Daudi mwami wa Isiraeli yumbaka. Mutaligi kandi ku mavega ginyu kutura yaaha na ahamba. Kalunu mutumikiri Yahova Nyasaye winyu, kandi avandu veve Isiraeli.

⁴ Mwelohize aveene mu vogono vwinyu mu Litembeli kolondekana ni viliango viavaguuga vinyu, kolondekana ni miyinzi ja mwagavilwa nu mwami wa Isiraeli, kandi na Solomoni muyaayi weve.

⁵ Mwelohize munyi aveene kunangwa valala kumunyi. Valavaho avakonya vandu vi zinyumba zindi zia Isiraeli

⁶ Mwiti vimeme vie Lipasaka, kandi mwitakase, kandi mulombere visiuviliru kuhangwa avandu va Isiraeli vache vinyu vaduuki kolonda malago ga Yahova yahaana ku Musa.”

⁷ Mwami Josia yahaana vimeme na vana va magondi kutura mu chayo chiche 30,000, nizimbuli kandi zigiriki 3,000 kutura ku miandu jije ju vwami kuli kihanwa chi Lipasaka ku vandu vosi avaari ho.

⁸ Avanene vu mwami kandi vahaana vihaanwa viavo ku vandu kandi ku vasaalisi na vandu va Levi. Hilikia, Zakaria na Jehieli, vami vanene vi Litembeli kandi vahaana vihaanwa viavo ku Avasaalisi vimeme via magondi ni zimburi 2,600, kandi zigiriki 300 kuva vihaanwa vie Lipasaka.

⁹ Aviimiliri va vandu va Levi: Konania, Shemaya na amwavo weve Nezaneli, Hashabia, Jeieli na Jozabadi vahaana vimeme via magondi ni zimburi 5,000, kandi zigiriki 500 ku vandu va Levi kuva vihaanwa vie Lipasaka.

¹⁰ Lwu vutumikiri vwali ni vwakalohizwa avasaalisi vasingira mu vwiyangu vwavo, na vandu va Levi mu viduma viavo kuli mwami yaali nalagi.

¹¹ Hene yaho, vita vimeme via magondi ni zimburi ku Lipasaka, na vasaalisi vavugura amasahi ga zio nivuuha ku vwali na vandu va Levi nivanyeenya zinyama zia zio.

¹² Vavugura vihaanwa viu kusambwa, nivahaana ku vandu kolondekana ni viduma vie zinyumba zia vaguuga vaavo vahane ku Yahova, kuli gang'odwa mu kitabu chi Lilaga cha Musa. Vakora ndio kandi ku zigiriki.

¹³ Vandu va Levi vuminya zinyama zie Lipasaka ku muliru kolondekana na malago, nivadeka zinyama zindakatifu mu zinyingu, nu kuvifuria kandi ku zinju. Vavugura zinyama vwangu nivagavulira avandu.

¹⁴ Inyima wa yaga kokoleka, vandu va Levi velombera aveene harara na avasaalisi visukululwi va Haruni zinyama ziavo, kigira avasaalisi vakora miyinzi ju kuhaana vihaanwa viu kusambwa kandi ni vihaanwa viu kusambwa vie zitinya kuduuka zing'inga zia vudiku.

¹⁵ Avimbi, visukululwi via Asafu, vaali mu vogono vwavo kolondekana na malago gu mwami Daudi, Asafu, Hemani na Jeduzuni muporofeti wu mwami. Navuzwa avalindi vi virivwa vie Litembeli vaali ha vuli kirivwa. Sivali ni lienya kutura ku vutumwa vwavo mba, kigira vandu va Levi avamwavo vaavo vavalombera lilia liavo lie Lipasaka.

¹⁶ Maku, kuli mwami Josia yaali nalagi, vindu viosi viekoleka ku lidiku liene yilio, kigira lisigamira lia Yahova, kolomba lilia lie Lipasaka, kandi kuhaana vihaanwa viu kusambwa ku vwali.

¹⁷ Ku madiku 7, avandu va Isiraeli vosi avaari ho vaali ni lisavo lie Lipasaka ni lilia liu mugadi gutali mu na mamera.

¹⁸ Sihaali ho ni Lipasaka kuli yili mu Isiraeli kutura ing'inga ya Samweli Muporofeti mba. Sihaali ho nu mwami ku vami va Isiraeli uwalomba Lipasaka kuli yili, ilialombwa nu mwami Josia, na vasaalisi, na vandu va Levi, kandi na vandu vosi vi Ivuyuda, Isiraeli na Jerusalemi biba.

¹⁹ Lisavo lie Lipasaka yili lialombwa mu muhiga gwa 18 mu liamiiha liu mwami Josia.

Keheri chi Liamiiha lia Josia

²⁰ Inyima wu mwami Josia yaali niyakakola yaga goosi ku Litembeli lia Yahova, mwami Niko wa Egebeti yimilira liihi kulwaana ha Karikemishi kumugera gwa Efurate. Mwami Josia yageriza kumwigalira.

²¹ Navuzwa mwami Neko yatuma makuva yaga ku mwami Josia kumuvolera, “Vulwani yivu sivoveeye kigira ivi mwami wi Ivuyuda mba. Inzi sinzizi kulwaana ivi, navuzwa kulwaana avasigu vange, na Nyasaye yamboleeye ngole vwangu, kigira aveeye harara na inzi. Kulwayago, utahing'ana na inzi mba, gase alakudiviza.”

²² Navuzwa mwami Josia yaali nasaviiyi kulwaana mwami Neko. Mwami Josia siyenya kuhulira ga Nyasaye yavoola kuye kuvitira ku mwami Neko. Maku mwami Josia yigilung'anyia navula kuva mu liiva liu mwami, natura kuzia mu vulwani mu kereremo cha Megido.

²³ Lwu vulwani vwali ni vuzizagiliraa mulala ku vasikari va Egebeti yatooza mwami Josia nu vuta. Mwami Josia yavolera avatumikiri veve, “Mbuguli mumbili, kigira mali kotoozwa nu kusalirizwa ligali!”

²⁴ Maku avatumikiri veve vamutuliza mu ligare lilie ni vamuvika mu ligare lindi lia 2 nivamuhila mu Jerusalemi, uwene yeyo yamanya nakuza. Vaamuta mu virindwa viu vwami vwa vaguuga veve, vasiomera mwami Josia.

²⁵ Muporofeti Jeremia yalomba ulwimbu lwu lwikuulu ku mwami Josia. Kali kuduuka kalunundi, gwagwa umwima ku avimbi vakali na vasaza mu Isiraeli ukwimba mu liekula liavo. Yakola Lwimbu yilu kuva lilaga mu Isiraeli, na lwang'odwa mu zinyimbu zieliekula.

²⁶ Vindu vindi viosi, via Josia yakola, Lisigamira lilie ku Yahova, lihulira lilie lia malago,

²⁷ vikolwa vivie kutura mu litanga kuduuka ku keheri, viang'odwa mu vitabu via makuva ga kale ga Avami vi Ivuyuda na Isiraeli.