2 Kyetsinyinga 34 - KITABU KITAKATIFU

Mwami Josia wi Ivuyuda

¹ Josia yaali ni mihiga 8 lwa yaatanga kwamiiha kuli mwami wi Ivuyuda. Yamiha mu Jerusalemi ku mihiga 31.

² Yakola agaali amalungi imbiri wa Yahova, kandi yalonda liiva liaguuga weve Daudi, naatia malago ga Yahova ligali.

Josia agayaa kusigamira misambwa

³ Mu muhiga gwa munane lwa Josia yaali mwami, lwa yaali nakikiri muyaayi yaatanga kusigamira Nyasaye wa guuga weve mwami Daudi. Inyima wi mihiga jine, yaatanga kwononyia havundu hu kusigamira misambwa, vifananyi viu munyasaye wi kikali Ashera, kandi ni vifananyi vindi viosi.

⁴ Yahaana amalago ku vasaza vanene veve kusambulanyia uvwali ha vandu ha vasigamira Baali, kandi nasambura uvwali vwi vimuli ahimbi navwo. Kandi yaduvulanyia vifananyi viu munyasaye wi kikali Ashera harara ni vifananyi vindi viosi, navugura luguchi lwavio nalusalanyia ku virindwa via vandu vahaana visiuviliru kuvio.

⁵ Yasamba vigumba via avasaalisi vi misambwa ku vwali havajisigamira. Ku likora yaga goosi, yalomba Ivuyuda na Jerusalemi kutakaswa kandi.

⁶ Yakola kindu kilala chere mu madaala manene ga Manase, Efuraimu, kandi Simioni, kali kuduuka ku lidaala lia Nafutali mu vianyi viavio viosi.

⁷ Mu kivala choosi cha Ivaale wa Isiraeli, yasambula uvwali kandi niyononya vifananyi viu munyasaye Ashera, nashonoranyia vifananyi viosi vigwa luguchi, kandi yavunanya uvwali vwosi vwi vimuli nivigwa vidonye. Lwa yaali ni yakakola yaga goosi, yirana Jerusalemi.

Kitabu chi Lilaga kenyooleki

⁸ Mu muhiga gwa 18 gwi liamiiha liu mwami Josia inyima wa yaali ni yakatakasa kivala ni Litembeli lia yahova, yatuma avasaza 3 kuzia kolomba hi Litembeli lia Nyasaye lialii nilioneki; vaali Shafani muyaayi wa Azalia, Maaseia mwamihi wa Jerusalemi kandi Joashi muyaayi wa Joahazi mung'odi munene.

⁹ Amabesa ga vasikari vandu va Levi gasololwa kutura ku vandu va Efuraimu, na Manase, mu Litembeli gahaanwa ku Hilikia musaalisi munene kandi kutura ku vandu vu vwami vwi Ivaale, kandi kutura ku vandu vi Ivuyuda, Benjamini, na Jerusalemi.

¹⁰ Mabesa yaga gahaanwa ku vasaza vavaga avasingilira uvwumbaki vuhia vwi Litembeli,

¹¹ Avasaza yava vahaana mabesa yaga ku vavaazi na vumbaki kugura amagina kandi zimbaho kutumikira kwumbaka zinyumba zia vami vi Ivuyuda vaali nivononyia.

¹² Avasaza avakola miyinzi yiji vaali avasuuvirifu ligali. Vasingililwa na vandu va Levi vane: Jahazi, Obadia wi kiliango cha Merari, Zakaria na Meshulami wi kiliango cha Kohazi. Avandu va Levi vaali avandu vu vusiza vwu vukana, vikuli na madulele gu kwimbiramu.

¹³ Na vandu va Levi vandi vasingilira uvugingi vwi vindu viatumika ku vwumbaki, kandi kohenza avayinziri vaakora miyinzi lugano na lugano, na vandi vaali avang'odi, na vandi vaali avanene na vandi vaali avalindi vivirivwa.

¹⁴ Lwa vaali nivatulizaa mabesa kutura mu livikiru lie Litembeli, musaalisi Hilikia yanyoora kitabu chi Lilaga lia Yahova, Lilaga lia Nyasaye yaaha Musa.

¹⁵ Yavolera Shafani mung'odi, “Nyooye kitabu chi Lilaga mu Litembeli lia Yahova.” Yavugula kitabu chi Lilaga yiki nahaana ku Shafani,

¹⁶ na Shafani yavugula nahaana ku mwami. Yavolera mwami, “Kumali kokora goosi ga ivi wakulaga.

¹⁷ Kuvuguye mabesa gaviikwa mu livikiru lie Litembeli na kumali kuhaana ku avasaza avayinziri kandi na vasingiliri vaavo.”

¹⁸ Hene yaho, Shafani yavoola, “Hano mbeeye ni kitabu chi Lilaga cha Hilikia yambeeye.” Shafani yaasoma kitabu yiki vudinyu imbiri wu mwami.

¹⁹ Lwu mwami yahulira makuva gi Lilaga ni gasomwa kutura mu kitabu imbiri weve, yatandula zigaanza zizie mu lihenda mwoyo.

²⁰ Maku, mwami yahaana amalago yaga ku Hilikia musaalisi, Ahikamu muyaayi wa Shafani, Abidoni muyaayi wa Mikaya, Shafani mung'odi wu mwami, kandi na Asaia mudendi wu mwami, navavoolera,

²¹ “Muzie koteeve Yahova kulwange nu ku lwa vandu vatigara mu Isiraeli ni Ivuyuda, kigira amigizu gi kitabu yiki. Uvutima vwa Yahova voveeye vonene ligali kigira avaguuga viitu sivahulira makuva ga Yahova kandi si vakora kolondekana na makuva goosi agang'odwa mu kitabu yiki mba.”

²² Maku Hilikia harara na yavo vu mwami yaali natumi, vazia ku Hulida mukali muporofeti, mukali wa Shalumu muyaayi wa Tokazi, mwisukulu wa Hasira, mulindi wi zinguvu mu Litembeli, uwamenyaa mu Jerusalemi. Vamoloma kuye kigira makuva gang'odwa mu kitabu yiki.

²³ Mukali uyu yavavolera, viirane ku mwami vamuvolere amakuva gaturaa ku Yahova Nyasaye wa Isiraeli.

²⁴ Yahova avoora ndi, “Nda kuya Jerusalemi yoosi harara na vandu vosi avamenyi mu, ni vilaamo kuli gang'odwa mu kitabu chi lilaga cha somwa imbiri wu mwami wi Ivuyuda.

²⁵ Kigira vamali koleka inzi kandi vamali kuhaana visiuviliru ku avanyasaye vandi, na ndio vamali kuvukiza uvutima vwange ku miyinzi ja vamali kokora. Uvutima vwange vwakiziywi ku Jerusalemi, kandi sivulasiminywa mba.

²⁶ Navuzwa ku mwami mwene wi Ivuyuda, yaga nigo ga inzi, Yahova Nyasaye wa Isiraeli mboraa: Ivi wahuliriza ku makuva gang'odwa mu kitabu chi Lilaga yiki,

²⁷ kandi nu wegehiza umwene imbiri wange, watandula zinguvu zizio, kandi nulira nukwidoloka amaliga, lwa wahulira kuli ndatihiza ku haana amageri ku Jerusalemi harara na avandu vamenyi mu. Navuzwa inzi mali kuhulira lisaala liilio,

²⁸ na amageri ga nziza kuhaana ku Jerusalemi sigalaaza kandi, kuduuka inyima wi likuza liilio. Ndaleka ukuzi mu mirembe.” Avasaza yavo viirana ku mwami Josia na makuva yaga.

Mwami Josia Alombaa Lilagana liu kutia Yahova

²⁹ Mwami Josia yalanga harara aviimiliri vosi vi Ivuyuda na Jerusalemi,

³⁰ na vosi harara vazia mu Litembeli, ni vaveeye harara na vasaalisi, kandi na vandu va Levi kandi harara na avandu vandi vosi, avatugi na vadaka. Mwami yasooma vudinyu imbiri wavo kitabu chi Lilagana ichaali nikenyoleki mu Litembeli.

³¹ Mwami yasingira ahimbi ni itiiru yu vwami, nalomba lilagana harara na Yahova, ku muhulira, nu kulinda amalago geege goosi, nu mwoyo gwigwe gwosi, kandi nokokola makuva kolondekana ni lilagana, kuli ga ng'odwa mu kitabu chi lilaga yicho.

³² Mwami Josia yakola avandu vosi avaari mu Jerusalemi, kandi mu kivala cha Benjamini kulaga kugumira lilagana. Na ndio, avandu va Jerusalemi vahulira agadukanaa ni lilagana lia vaali ni valombi harara na Nyasaye wa vaguuga vaavo.

³³ Mwami Josia yononyia vifananyi viosi viukuvihiririzwa iviali muvivala via vandu va Isiraeli, kandi yakola avandu vosi avaari mu Isiraeli kutumikira Yahova Nyasaye wavo. Mu madiku goosi ga yamiha avandu va Isiraeli, vazizagilira kuhulira Yahova Nyasaye wa vaguuga vaavo.