2 Kyetsinyinga 32 - KITABU KITAKATIFU

Mwami Senakeribu yingiliraa

¹ Inyima wi vindu yivi viosi iviu mwami Hezekia yaali naakori nu vusuuvirifu vwosi, Senakeribu Mwami wa Asiria yingilira Ivuyuda. Yaakumbiriza madaala manene gizimbinga naaganaga kugavugula.

² Lwa Hezekia yalora ndi Senakeribu umali kuuza kandi usaaviyi kwingilira Jerusalemi kandi,

³ oyo harara na vanene veve kandi na vasaza veve vizingulu vavolerana harara ma nivatovola kwigalira vidaho viosi iviali ichova wi lidaala linene; na vaamukoonya.

⁴ Vavungiza muganda gwa vandu vanyingi ligali harara nivigalira vidaho viosi nu mugera gwavitiraa hagati hi kivala yicho nivavoora, “Kigira ki avami va Asiria vaze konyoora amazi manyingi?”

⁵ Maku mwami yayinzira vudinyu ligali niyumbaka vuhia lidigi liosi iliali niliayavuguka liosi kandi niyumbaka minaara kulio. Yumbaka lidigi lindi ichova. Liene yilio kandi yumbaka vudinyu kedonye chi lidigi iliali ku lovega lwi ivugwi wi lidaala linene lia Daudi aha milo. Yalomba kandi iviugi vinyingi niinguva zinyingi ligali.

⁶ Yavika avasaza vosi vu mu lidaala hasi huvusingiliri vwa vanene va mahi kandi navalaga vavuganiri imbiri weve ha Mugizi gwi kirivwa chi lidaala linene. Yavavolera,

⁷ “Muve avagulu kandi avaluviriri. Mutatia mwami wa Asiria anoho iliihi linene liaveeye nalio mba. Koveeye ni zinguru zinene ligali ku lovega lwiitu kuvita iziveeye ku lovega lwilwe.

⁸ Oyo aveeye nizinguru ziu mundu, navuzwa kunyi koveeye na Yahova Nyasaye wiitu, kokokonya, ukulwaanira uvulwani vwitu.” Avandu valuvilirizwa ligali namakuva gu mwami wavo.

⁹ Inyima wi ing'inga ngekeeke, lwa Senakeribu ni liihi lilie vaali nivakikiri ha Lakishi, yatuma amakuva yaga ku mwami Hezekia harara na vandu vi Ivuyuda avaari harara naye mu Jerusalemi:

¹⁰ “Inzi, Senakeribu mwami wa Asiria, ndevaa ndi niki kimuheza vuluviliri kuva mu Jerusalemi imali kukumbirizwa?

¹¹ Hezekia amuvoleraa ndi, Yahova Nyasaye winyu alamuhonyia kutura kuzinguru zietu; navuzwa Hezekia amugaadaa, na alaleka munyi mukuzi ni inzara kandi nuvuluhu.

¹² Niyie uwononya hu kusigamira kandi uvwali vwa Yahova. Yavolera avandu vi Ivuyuda kandi Jerusalemi ukusigamira kandi ukuvuyiza kimuli ha vwali vulala vweng'ine.

¹³ Simumanyi aga vaguuga vange kandi nainzi kumali kokora ku vandu vi zihiiri zindi? Avanyasaye vi zihiiri zindi mbula vaali vanyara kohonya avandu vaavo kutura ku mwami wa Asiria?

¹⁴ Ni ing'inga ki lwa avanyasaye vi vivala yivio viosi vaahonyia vivala viavo kutura ku kunyi? Kunangwa ni ki kigira munyi muganaganaa ndi nyasaye winyu alamuhonyia?

¹⁵ Kalunu mutaleki Hezekia amugotize kuli ndio mba. Mutamusuuviri mba! Siaveeye ho nu munyasaye wi ihiiri ku ziosi anoho uvwami uwanyala kohonyia avandu veve kutura kuzinguru ziange anoho zia avaguuga vange kali hakuzu mba. Kunangwa Nyasaye winyu alanyala ndi kumuhonyia kuzinguru ziange?”

¹⁶ Avanene va mahi ga Asiria vavoola ivindu vidamanu ligali kuvita ku Yahova Nyasaye kandi ku Hezekia mutumikiri wa Yahova.

¹⁷ Ibarwa yu mwami Senakeribu yang'oda yaali yukuchaya nokonyega Yahova Nyasaye wa Isiraeli ligali kandi kumutala vudamanu mbitilira. Ibarwa yavoola, “Avanyasaye vi zihiiri zie vivala vakikiri kohonyia ku avandu vaavo kutura mu zinguru ziange mba, kandi ndio Nyasaye wa Hezekia sialahonyia avandu veve kutura kuzinguru ziange.”

¹⁸ Avanene va Senakeribu vaahanzuka amakuva yaga mu Luheburaina, ku vaduuki kutihiza nu kwiita mioyo ja avandu va Jerusalemi avaari ku lidigi lie lidaala linene, Kunangwa vuduuki kuva vodoto kugumira lidaala linene zana.

¹⁹ Vaamoloma amakuva ga Nyasaye wa Jerusalemi munzira ndala yavatalila mu avanyasaye va vandu vi vivala vindi avaari vifananyi vialombwa na vandu.

²⁰ Maku mwami Hezekia nu muporofeti Isaya muyaayi wa Amozi, vasaala ku Nyasaye kandi vanira kuye avakoonye.

²¹ Yahova yatuma engelosi iyiita avasikari vosi na vanene vi iliihi lia Asiria kali na vanene vu mwami. Kunangwa mwami Senakeribu yirana Asiria mu zisoni zinyingi. Lidiku lilala lwa yazia mu litembeli liu munyasaye weve, valala ku vayaayi veve vamwita nivivavi viavo.

²² Munzira yiyi, Yahova yahonyia mwami Hezekia harara na vandu vamenyaa mu Jerusalemi kutura kuzinguru zia Senakeribu, mwami wa Asiria; ma kandi kutura ku vasigu vaavo vandi. Yaleka avandu vamenye mu mirembe, nivivala viali mu votende.

²³ Avandu vanyingi vazia Jerusalemi, nivahira vihaanwa ku Yahova kandi Hezekia kunangwa avandu vosi vahaana lizominya ku Hezekia.

Uvulwaye ni liegingira lia Hezekia

²⁴ Mu madiku yago, mwami Hezekia yalwala ma navuyika ligali. Yasaala na Yahova yamuha kelolero ndi alahona.

²⁵ Navuzwa Hezekia yaali niliegingira linene ligali kali siyaali unyala kumanya lisandiza ku aga Yahova yaali naamukoleye mba. Ku lwayago, uvutima vwa Yahova vwaduuka kuye, Ivuyuda kandi Jerusalemi.

²⁶ Lwu kumaliriza Hezekia harara na vandu va Jerusalemi vegehiza ligali, nandio Yahova siyavaha amageri kuduuka inyima wi likuza lia Hezekia mba.

Uvutugi, nu vukumi vwa Hezekia

²⁷ Mwami Hezekia yamanya naava mutugi ligali, na vuli mundu yamuha luyali lonene. Yumbaka zinyumba zia mavikiru gi izahabu, ifeza, kandi zia magina guvuguli vudinyu, vindu viazuganywa mu na manemane, zie zinguva kandi zie viju viuvuguli vudinyu ligali.

²⁸ Komeeda ku ziene yizio, yumbaka videera viu vuswage, iwaini, na maguta, ga muzeituni; ivigo vie zing'ombe zizie; kandi via magondi.

²⁹ Komeeda ku vindu yivi viosi, Nyasaye yamuha magondi ni zing'ombe uvutugi vundi vunyingi ligali kali kuduuka niyumbaka madaala manene manyingi.

³⁰ Yaali mwami Hezekia wingalira aha mazi gi kidaho cha Gihoni gavitiraa nigazia ichova, nagagirung'anyia gavitiri mu logova kuduuka havundu musi mwa madigi ga Jerusalemi. Hezekia yagasizwa mu vindu viosi via yakola.

³¹ Lwa vatumwa kutura Babiloni vaza koteveveleriza amakuva gi kindu chokogenyia ichaali ni chekoleki mu kivala, Nyasaye yaleka Hezekia azie kunzira yeeye mwene aduuki kumugeriza kumanya agaveeye mu mwoyo gwigwe.

Keheri chi liamiiha lia Hezekia

³² Ivindu vindi viosi viu mwami Hezekia yakola, kandi vikolwa vivie vilahi ku Yahova viang'odwa mu kitabu cha Malola gu Muporofeti Isaya muyaayi wa Amozi kandi mu vitabu via makuva ga kale ga “Avami vi ivuyuda na Isiraeli.”

³³ Hezekia yakuza ma nayavirwa ku lovega lwiluhia lwi vilindwa viuvwami. Avandu vosi vi Ivuyuda na Jerusalemi vamuha uluyali lonene ligali ing'inga yi likuza lilie. Muyaayi weve Manase yavugula ovogono vwivwe kuli mwami.