2 Kyetsinyinga 31 - KITABU KITAKATIFU

Hezekia agirunganyia liiva lie Diini lia vandu

¹ Lwa vaali nivakamara lilia lie Pasaka avandu vosi va Isiraeli vazia mu vuli madaala manene mu Ivuyuda ma nivononyia zitiru zia magina, nivatema vifananyi viu munyasaye wi kikali Ashera. Vononyia uvwali na havundu hukusigamira misambwa. Vaakora malala mere mu Ivuyuda yoosi kandi ni vivala viosi vie zihiiri zia Benjamini, Efuraimu, na Manase; maku viirana yengo vosi.

² Mwami Hezekia yalohiza avasaalisi na vandu va Levi, kolondekana nu muyinzi gwa vuli mundu. Miyinzi jaavo jaali; kuhaana vihaanwa viu kusambwa kandi vihaanwa vie mirembe, kutumika mu virivwa via ahokososa ha Yahova kandi kuhaana lisandiza ni lizominya mu Litembeli lia Yahova.

³ Lihaana liu mwami liatula ku vutugi vwivwe, na viahaanwa kuva kuli vihaanwa viu kusambwa via mugambazuri na ha mugolova, kandi ku masabato, mieli mihia, kandi ku masavo gatovolwa kuli gang'odwa mu lilaga lia Yahova.

⁴ Kandi mwami yalaga avandu vamenyi mu Jerusalemi kuhaana kidieli ku vasaalisi na vandu va Levi, kunangwa vaduuki kwihana aveene ku lilaga lia Yahova.

⁵ Nonoho lwa lilaga lialandizwa, avandu va Isiraeli vahaana mu vunyingi amatunda gu kutanga nu ligera liavo, iwaini, amaguta, uvwuki ma kandi ku viosi via vagesa mu milimi jiavo, kandi valeta mu vunyingi izaka kandi kidichichio ku vindu viosi.

⁶ Vandu vosi vi Ivuyuda na Isiraeli, avamenya mu madaala manene gi Ivuyuda kandi valeta zizaka kutula ku zing'ombe na amagondi gaavo, kandi vihaanwa viatakaswa, iviali ni viavikwa ku Yahova Nyasaye wavo, na vavivika mu vitumi vinyingi.

⁷ Mu mweli gwa kavaga, vatanga kuvungiza vitumi ma nivamara mu mweli gwa saba.

⁸ Lwu mwami Hezekia harara na viimiliri weve valora uvunyingi vwi vitumi vuli vindu via valeta, vizominya Yahova kandi avandu veve, Isiraeli.

⁹ Mwami Hezekia yamoloma ku vasaalisi na vandu va Levi kigira vihaanwa yivi,

¹⁰ na Azaria musaalisi munene kutura mu kisukururwi cha Zadoku yavoola, “Kutura lwa vandu vatanga koleta vihaanwa viavo mu Litembeli lia Yahova, kwalia vinyingi, kandi viatigala vinyingi kigira Yahova yagasiza avandu veve, kulwayago, viatigala vinyingi ligali.”

¹¹ Maku mwami Hezekia yalaga valombe ving'oze via mavikiru mu Litembeli lia Yahova, na vakora kuli valagwa.

¹² Vavugura vindu viahaanwa: Zizaka ni vindu viatakaswa nivavika mu nu vusuuvirifu. Konani mundu mu Levi munene yavikwa kuva mulindi wi vindu yivi, na Shimei amwavo weve yaali wa 2 kuye mukonyeleri weve.

¹³ Vandu va Levi 10 vaviikwa kuyinzira hasi haavo; vaali: Jehieli, Azazia, Nahazi, Asheli, Jerimozi, Jozabadi, Elieli, Isimakia, Mahazi na Benaya. Yaga goosi gekolekaa ku vunyali vwu mwami Hezekia nu musaalisi munene Azaria.

¹⁴ Kore muyaayi wa Imuna mundu wa Levi waali musikari munene ha kirivwa chi Ivugwi chi Litembeli, yasingilira vihaanwa vialetangwa ku Yahova, kandi niye wasingira ligavulwa lia vio.

¹⁵ Yakonywa kugavura mu madaala gandi amanene mwa vasaalisi vaamenya na vandu va Levi vandi: Edeni, Miniamini, Jeshua, Shemaya, Amaria na Shekania. Vagavula viukulia vileng'ani ku vandu va Levi avamwavo vaavo, kolondekana kuli vutumwa vwavo vwali.

¹⁶ Komeeda ku yavo, vagavula kandi ku vayaayi vi mihiga 30 anoho muhiga minyingi, avaari nu vuyinziri vwu vutumwa mu Litembeli lia Yahova kolondekana ni miyinzi jaavo ja kazozo.

¹⁷ Na yavo avang'odwa kuli likula lia vasaalisi kolondekana ni zinyumba zia vaguuga vaavo, na vandu va Levi kutura ku mihiga 20, vagavulwa viukulia kolondekana nu vutumwa vwavo kandi ni viduma viavo.

¹⁸ Vasaalisi vang'odwa harara na avana vaavo vosi kandi na vakali vaavo, kandi na vayaayi na vakaana vaavo - mu kiduma choosi, kigira mu vusuuvirifu vwavo, vaali niviitakasa aveene mu vutakatifu.

¹⁹ Na ku vana avayaayi va Haruni musaalisi, avaari mu milimi ji vivala vialiho, avaari na amadara manene gaavo, vaali mu avasaza vukuhaana vidieli ku vasaza vosi ku vasaalisi kandi ku vuli mundu woosi ku vandu va Levi uwang'odwa.

²⁰ Yaga nigo gu mwami Hezekia yakola mu Vuyuda mwosi, yakola agaali malahi kandi vulungi, nu vusuuvirifu imbiri wa Yahova Nyasaye weve.

²¹ Kandi miyinzi josi ja yakola mu vutumiki mu Litembeli lia Nyasaye kolondekana ni lilaga kandi namalago, kwenya Nyasaye weve, yakola nu mwoyo mulala. Na ku goosi ga yakola, yagasizwa.