2 Kyetsinyinga 30 - KITABU KITAKATIFU

Hezekia yetegekeraa Lipasaka

¹ Mwami Hezekia yatuma makuva ku Isiraeli kandi Ivuyuda vosi, kandi nang'oda zibarwa ku zihiiri Zia Efuraimu na Manase, naavagenihiza vaze mu Litembeli lia Yahova mu Jerusalemi, vaduuki kolombera Yahova Nyasaye wa Isiraeli lisavo lie Lipasaka.

² Mwami na vanene veve kandi livugana liosi mu Jerusalemi vaatovora kolomba lisavo lie Lipasaka mu mweli gwa 2.

³ Si vaali vanyara kulilomba ku ing'inga ya kazozo, kigira avasaalisi vaali nivakiri kwitakasa aveene kandi avandu vaali nivakikiri kuvugana harara mu Jerusalemi.

⁴ Mwami harara nilivugana liosi vayanzizwa nililohiza yili.

⁵ Kunangwa valanga avandu vosi mu kivala choosi cha Isiraeli, kutura Dani mu lovega lwa Ivaale kuduuka Beerisheba mu Isavaalu, vaze Jerusalemi kolomba lilia lie Lipasaka ku Yahova, Nyasaye wa Isiraeli. Kigira Liali ni likikiri kolombwa ku kolondekana ni Lilaga mu viduma via vandu vanyingi kuvita maziambiri.

⁶ Avatumwa vatura kuzia ichova ku lilaga liu mwami na vanene veve mu kivala choosi chi Vuyuda na Isiraeli na makuva yaga: “Avandu va Isiraeli, mu mali kohona kutura ku liguutwa lie kivala cha vandu va Siria. Kalunu mwirane ku Yahova, Nyasaye wa Aburahamu, Isaka na Yakobo, na alirana ku munyi avatigara,

⁷ Mutava kuli avaguuga vinyu kandi kuli Avaisiraeli vache mba avavura kuva avasuuvirifu ku Yahova Nyasaye wavo. Kuli munyala kolola, yavaha mageri malulu ligali.

⁸ Mutava avamagoti madinyu kuli navo vaali mba, navuzwa muhuliri Yahova. Hambi mu Litembeli mu Jerusalemi, ilia Yahova Nyasaye winyu umali kulikola live litakatifu mihiga ni mihiga. Mutumikiri Yahova Nyasaye winyu, kunangwa avuli kuva nu vutima ni munyi.

⁹ Niiva mulirana ku Yahova, hene yaho yavo avamali kuhila avamwavo vinyu navana vinyu mu vuhambe valavamanyia liverererwa, na vavaleke viirane yengo mu kivala chavo. Yahova Nyasaye winyu aveeye wi zimbavasi kandi wilivererera. Niiva mulirana kuye, alamuvugilira.”

¹⁰ Vatumwa vi zibarwa vazia kutura mu vuli lidaala linene muvivala vie zihiiri zia Efuraimu na Manase, kandi kuduuka Ivaale ku ihiiri ya Zabuloni, navuzwa avandu vaavaseka kandi nivavakolera kehenyahenye.

¹¹ Kali ndio, vaali ho avandu valala kutura mu ihiiri ya Asheri, Manase na Zabuloni, avaari nivegehizi aveene kandi nivavugiliyi kuzia Jerusalemi.

¹² Nyasaye waali kandi na vandu vi Ivuyuda navahambanyia kuva kindu kilala vaduuki kokora agu mwami navana va vami valaga ku likuva lia Yahova.

Lilia lie Lipasaka lilombangwa

¹³ Avandu vanyingi ligali vavuganira Jerusalemi mu mweli gwa 2 okolomba lisavo liu mugadi gutali namamera.

¹⁴ Vatanga kuyinzira kandi vatuliza uvwali vwosi uvwalange mu Jerusalemi vwu kuhaanira ku visiuviliru kandi kusambira ku kimuli, ku misambwa na vavusiuva mu Livona lia Kidironi.

¹⁵ Ku lidiku lia 14 liu mweli zana, vita vimeme via magondi kigira kisiuviriru chi Lipasaka. Avasaalisi na vandu va Levi avavura kuva avanifu ku mwima valora zisoni ligali kuduuka niviitakasa, na valeta vihaanwa viu kusambwa mu Litembeli lia Yahova.

¹⁶ Vaavugura ovogono vwavo vwa kazozo mu Litembeli kolondekana na malago gi Lilaga lia Musa, mundu wa Nyasaye. Vandu va Levi vaahana masahi gi visiuviliru ku vasaalisi, avamanya nivaguuha ku vwali.

¹⁷ Kigira avanyingi ku vandu vaali mu livugana vaali nivakiri kwitakasa kuli mwima, si vaali vanyara kwiita kememe chi ligondi lie Lipasaka mba, kunangwa vandu va Levi vavakolera ndio kandi nivatakasira Yahova magondi zana.

¹⁸ Komeeda ku yaga, avanyingi ku yavo avaatura mu zihiiri zia Efuraimu na Manase, Isakari na Zabuloni si vaali nivakoli mwima gwi lietakasa mba; Valia lipasaka Vugira kolonda malago. Mwami Hezekia yahaana lisaala yili kulwa vandu yavo;

¹⁹ “O, Yahova, Nyasaye wa vaguuga viitu, mu vulahi vuvwo yaanza usamihi yavo avasigamiraa ivi ni mioyo jaavo josi kali niiva si vaveeye avatakase kolondekana na malago ga hatakatifu.”

²⁰ Yahova yativulira Hezekia lisaala lilie; yasamiha avandu yavo na si yavasaliriza mba.

²¹ Avandu vaali nivavungi mu Jerusalemi vaali ni lisavo liu mugadi gutali mu namamera ku madiku saba nuvusangali vonene, na vuli lidiku avandu va Levi na vasaalisi vizominya Yahova ni zinguru ziavo ziosi.

²² Hezekia yizominya vandu va Levi vosi kigira limanya lilahi liavo mu liemilira lisigamira Yahova. Kunangwa avandu valia viukulia vie Lisavo ku madiku saba nivahaana visiuviliru vie mirembe kandi nilihaana lisandiza ku Yahova Nyasaye wa vaguuga vaavo.

Lilia lia 2

²³ Livugana liosi vavugirizana harara kolomba lisavo ku madiku gandi saba. Kunangwa valilomba ku madiku gandi saba nuvusangali.

²⁴ Mwami Hezekia yahaana zigiriki 1,000 na magondi 7,000 avandu viite kandi valie, na vanene veve vaavaha zigiriki zindi 1,000 na magondi 10,000. Avasaalisi vanyingi vavitira mu mwima gwi litakaswa

²⁵ kunangwa livugana liosi lie Ivuyuda, avasaalisi na vandu va Levi, livugana liosi liatura Isiraeli, na vageni vamenyaa mu Ivuyuda, kandi avageni vatulaa mu kivala cha Isiraeli vasangala ligali.

²⁶ Kunangwa haali nu vusangali vonene ligali mu Jerusalemi, kigira kutura ing'inga ya Solomoni muyaayi wu mwami Daudi, sihali ni kindu kuli yiki mba.

²⁷ Vasaalisi na vandu va Levi vateevera avandu vugasu ku Yahova. Naveeye yengo weve mwigulu, Yahova yahulira lisaala liavo kandi naagavugulira.