2 Kyetsinyinga 3 - KITABU KITAKATIFU

¹ Maku mwami Solomoni yaatanga kwumbaka Litembeli mu Jerusalemi aha Daudi yaali niyalaga ku kiguru cha Moria, aha Yahova yaloleka ku baba weve Daudi, ku oloze lwa umujebusi.

² Yaatanga kwumbaka mu mweli gwa 2 ku muhiga gwa 4 gwi liamiiha lilie kuli mwami.

³ Litembeli liu mwami Solomoni yumbaka liali uvutambi zimita 27, na uvuvambalaru zimita 9.

⁴ Ekeng'oze chu vwingiliru chaali imbiri wi Litembeli liali nuvuvambalaku, zimita 9, na uvutambi kuzia igulu vwali zimita 54. Mugati musi mwe keng'oze zana mwavakwa izahabu indahi ligali.

⁵ Keng'oze kenene chaalwa ni zimbaho zie midaragwa kandi nizivakwa ni zahabu indahi ligali, na yaang'ora ku makindu kandi minyororo.

⁶ Mwami yaasiaha Litembeli na magina malahi ligali kandi guvuguli vudinyu kandi ni zahabu iyaagulwa kutura mu kivala cha Paravaimu.

⁷ Yatumikira izahabu zana ukuvaka madigi gi litembeli, imialiru ji lirungu, zifuremu zie miliango, kandi naang'oola Avakerubi ku madigi.

⁸ Keng'oze chu mugati chalangangwa Havundu Hatakatifu ligali, chaali zimita 9 uvutambi kandi zimita 9 uvuvambalaru. Yivu vwali uvuvambalaru vwi Litembeli. Yavaka mugati zana ni zahabu indahi iviti uvulitu vwi zitani 20.

⁹ Izahabu yu vulitu vwi ziguramu 570 yaatumikirwa kolomba misumari, kandi madigi gi ving'oze vieyigulu gaavakwa ni zahabu.

¹⁰ Mwami Solomoni yalaga kandi avayinziri vasaza veve valombe iviroombe viviri kutura ku kivia navaka ku izahabu ma naaviviika Havundu Hatakatifu ligali.

¹¹ Zimbaha zia Vakerubi vombi harara nizivambuki, ziali uvutambi zimita 9. Luvaha lulala lwu Mukerubi mulala lwali uvutambi zimita 2.2 lwadiira lidigi lieinyumba lovega lulala, na uluvaha lundi lwali uvutambi zimita 2.2 lwadiira luvaha lwu Mukerubi wundi.

¹² Malala mere kandi ndio; luvaha lulala, lwali uvutambi zimita 2.2 na lwa adiira lidiri lindi lie Litembeli, na uluvaha lundi kandi, zimita 2.2 uvutambi lwadiira luvaha lwi kutanga.

¹³ Zimbaha ziavio ziavambuka uvutambi vwi zimita 9. Vasingira ku virenge viavo, nivihenza keng'oze kenene.

¹⁴ Yalomba inguvu yukukinga Havundu Hatakatifu ligali yirangi ya bulu, muzambarao, inzakanyu, nikatani indahi ligali, ma nazunganyiamu lifana lia vakerubi.

Zitiru ziu mugasa ziviri

¹⁵ Mwami yalomba zitiru 2 sa ndala zimita 15.5, ma naziviika imbiri wi Litembeli. Sa ndala yaali numutwi gwu vutambi zimita 2.2.

¹⁶ Zisonga zie igulu zie zitiru ziasiafa na mangirinya javasanywa ni migasa 100 ja makuyu.

¹⁷ Yasingiriza zitiru imbiri wi Litembeli, ndala ku lovega lwa Ivaale na iyindi ku lovega lwa Isavaalu. Yagulika iyaali ku lovega lwi Isavaalu - Jakini na iyaali ku lovega lwa Ivaale yagigulika Boazi.