2 Kyetsinyinga 29 - KITABU KITAKATIFU

Mwami Hezekia wi Ivuyuda

¹ Hezekia yaatanga kwamiiha kuli mwami wi Ivuyuda naveeye ni mihiga 25, yamiha mu Jerusalemi ku mihiga 29. Mama weve yaali Abija, mukaana wa Zakaria.

² Yakola agaali malungi imbiri wa Yahova kuli mwami Daudi guuga weve.

Litakasa lie Litembeli

³ Ku mweli gwu kutanga mu muhiga gwu kutanga gwi liamiiha lia Hezekia, yigula virivwa vie Litembeli ma kandi ma kandi naavilamba vuhia.

⁴ Yavuganyia kiduma cha avasaalisi na vandu va Levi ivugwi wu mugizi gwi Litembeli;

⁵ ma navavoolera, “Muhuliri munyi vandu va Levi, mwitakase munyi aveene, kandi mutakase Litembeli lia Yahova, Nyasaye wa avaguuga vinyu. Mutulize mu Litembeli vuli kindu kitali kinifu hatakatifu ha Yahova.

⁶ Avaguuga viitu sivali avasuuvirifu imbiri wa Yahova Nyasaye wiitu, makandi vaakora agataali amalungi imbiri wa Yahova. Vaatura ku Yahova ma ni vazia kuzinzira ziavo aveene.

⁷ Vahana viliango vie Litembeli, nivasiminya zitaya, kandi vavura kusamba vimuli anoho kuhaana vihaanwa viu kusamba mu Litembeli lia Nyasaye wa Isiraeli.

⁸ Kigira yaga, Yahova umali kuvihilirwa avandu vi Ivuyuda na Jerusalemi, na agaamali kuvakolera, gaveeye agu kutihiza ligali ku vuli mundu. Munyi mumanyi vulahi ligali.

⁹ Yiki nikio kigira Avaguuga viitu viitirwa mu vulwani, na avakali na avana viitu vaahirwa mvuhambe.

¹⁰ “Na kalunu mali kotovola kolomba lilagana na Yahova, Nyasaye wa Isiraeli, kunangwa avuli kuva nu vutima nikunyi kandi mba.

¹¹ Avayaayi vange, mutagotiza ing'inga mba; kigira Yahova umali kumutovola kusingira imbiri weve, muve avatumikiri veve, muduuki kumutumikira, nu kusamba vimuli imbiri weve.”

¹² Hene yaho, vandu va Levi yava vatanga miyinzi; Kutura mu kiliango cha Kohazi vaali, Mahazi muyaayi wa Amasiya na Joeli muyaayi wa Azaria. Kutura mu kiliango cha Merari vaali, Kishi muyaayi wa Abidi na Azaria muyaayi wa Jehaleleli. Kutura mu kiliango cha Gerishoni vaali, Joashi muyaayi wa Zimina na Edeni muyaayi wa Joa.

¹³ Kutura mu kiliango cha ya Elisafani vaala: Shimiri na Jueli. Kutura mu kiliango cha Asafu, vaali, Zakaria na matania.

¹⁴ Kutura mu kiliango cha Hemani vaali, Jehueli na Shimei. Kutura mu kiliango cha Jeduzuni, vaali, Shemaya na Uzieli.

¹⁵ Avandu yava vavuganya avamwavo vaavo, ma niviitakasa aveene, na ni vazia mu Litembeli kuli mwami yaali naavalagi kolondekana ni lilaga lia Yahova liakutakasa Litembeli lia Yahova.

¹⁶ Avasaalisi vazia mu Litembeli kulitakasa. Vatuliza mu Litembeli vindu viosi iviavula kutakaswa, nivavileeta mu mugizi gwi Litembeli. Kutura aheene yaho, vandu va Levi vaavivugula viosi ni vavihila ichova wi Lidaala linene, na vavihila mu livona lia kidironi.

¹⁷ Vatanga kutakasa Litembeli lia Yahova ku lidiku liu kutanga liu mweli gwu kutanga, na ku lidiku lia munane liu mweli, vaduuka ku lusimbu lwi Litembeli. Vatakasa Litembeli lia Yahova ku madiku 8, na ku lidiku lia 16, liu mweli gwu kutanga, vamala miyinzi josi.

Liranira lwukusaala Litembeli

¹⁸ Maku, vandu va Levi vazia ku mwami Hezekia nivavoora, “Kumali kutakasa Litembeli liosi lia Yahova, uvwali vwi vihaanwa viu kusambwa kandi harara ni viju viavwo viosi, ne emesa yu mugadi mutakatifu harara ni viju viayo viosi.

¹⁹ Kandi kumali kwilanya viju viosi viu mwami Ahazi yavugula mu mihiga je liamiiha lilie, lwa yaali nataveeye musuuvirifu ku Nyasaye, makandi kumali kuvitakasa viosi, henza, viosi viveeye imbiri wu vwali mu Litembeli lia Yahova.”

²⁰ Nonoho, mwami Hezekia yatura mugambazuri, ma navuganya avanene vosi vi lidaala linene, ma ni vazia mu Litembeli lia Yahova.

²¹ Valeta zigiriki saba, magondi saba, vimeme saba, ni zimburi saba vive kihanwa kutuliza ho uvwoni vwu vwami, kutakasa Litembeli lia Yahova, kandi Ivuyuda. Mwami Hezekia yalaga avasaalisi visukululwi va Haruni vavihaane kuli kihanwa ku vwali vwi Litembeli lia Yahova.

²² Avasaalisi vita zigiriki, magondi, vimeme, ni vavugura masahi nivuuha ku vwali.

²³ Vavugura zimburi zive kihanwa chu vwoni imbiri wu mwami ni livugana, vaviika kuzio makono gaavo.

²⁴ Maku avasaalisi vita zimburi, nivavugura masahi gazio, nivuuha ku vwali, keve kihanwa chu kutuliza uvwoni vwosi vwa avandu va Isiraeli, kigira mwami yaali nalagi vihaanwa viukusamba ni vihaanwa viu vwoni vilomberwe Isiraeli yoosi.

²⁵ Mwami Hezekia yavika vandu va Levi mu Litembeli lia Yahova harara ni vikuli, vukana kandi vukana vwi migoye kolondekana na gahevwa ku mwami Daudi na avaporofeti Gadi na Nazani.

²⁶ Vandu vasingira ni vikuli harara nu vukana vwa Daudi, na vasaalisi vasingira ni visiriva.

²⁷ Hene yaho mwami Hezekia yalaga ndi, kihanwa chu kusambwa kihanwe ku vwali. Lwi kihanwa chu kusambwa chatanga kuhaanwa, lwimbu lwa Yahova lwatanga kwimbwa, harara ni visiriva kandi ni vikuli nu vukana vwu mwami Daudi wa Isiraeli.

²⁸ Livugana liosi liasigamira Yahova, avimbi vimba zinyimbu, kandi visiriva nivikubwa. Yaga goosi gazizagilira kuduuka ku keheri chi kihanwa chu kusambwa.

²⁹ Lwa vamala kuhaana kihanwa, mwami harara na yavo avaari ho harara naye viinama ma ni vasigamira Yahova.

³⁰ Mwami Hezekia harara na aviimiliri vi zihiiri valaga vandu va Levi kwimba zinyimbu ziu kwizominya Yahova na makuva ga Daudi na Asafu muporofeti. Vosi viimba zinyimbu ziu vusangali nu kwizominya Yahova, ma viinama haasi ni vasigamira Yahova.

³¹ Hene yaho, mwami Hezekia yavavolera, “Kalunu mumali kwitakasa munyi aveene imbiri wa Yahova, mwisundi ahimbi, mulete visiuviliru kandi vihaanwa viu kusandiza ku Yahova.” Livugana lialeta visiuviliru kandi vihaanwa viu kusandiza mu Litembeli; na vosi avaari nu mwoyo gwu vwihaani valeta vihaanwa viu kusambwa.

³² Valeta zigiriki 70, magondi 100 kandi vimeme 200, kuli vihaanwa viu kusambira Yahova.

³³ Kandi valeta zigiriki 600 na magondi 3,000 kuli visiuviliru.

³⁴ Navuzwa avasaalisi vaali vakekeeke, na si vaali vanyara konyenya zinyama ziosi zie vihaanwa via kusambwa mba. Avamwavo vaavo vandu va Levi vavakonya kuduuka miyinzi josi ni jimalirika, na gaduukira avasaalisi vaduuki kwitakasa aveene, kigira vandu va Levi vaali avasuuvirifu mu kwitakasa aveene kuvita avasaalisi.

³⁵ Komeeda ku vihaanwa vinyingi ligali viu kusambwa, vialiho zitinya zie vihaanwa vie mirembe, kandi ni vihaanwa vie iwaini viazia harara ni vihaanwa viu kusambwa. Na ndio lisigamira lie Litembeli lia Yahova liatangizwa kandi.

³⁶ Mwami Hezekia harara na avandu vosi vasangala ku aga Nyasaye yaali navakoleeye, kigira miyinzi je Litembeli jakoleka vwangu ligali.