2 Kyetsinyinga 28 - KITABU KITAKATIFU

Liamiiha liu mwami Ahazi wi Ivuyuda

¹ Ahazi yaali ni mihiga 20 lwa yaatanga kwamiiha, na yamiha ku mihiga 16 mu Jerusalemi. Si yalonda liiva lilahi lia guuga weve Daudi mba. Yakola gaali madamanu imbiri wa Yahova.

² Navuzwa yalonda liiva lia avami va Isiraeli. Kali yalomba vifananyi via Baali ivialongwa kutura ku Vivia,

³ Yasamba kimuli mu Livona lia Hinomu, kali yahaana avayaayi veve kuli visiuviliru viukusambira misambwa, kolondekana ni likora liukuvihiliriza lie zihiiri zia Yahova yakunga kutura mu kivala imbiri wa avandu va Isiraeli.

⁴ Ahazi yahaana visiuviliru nukusamba kimuli havundu hukusigamira misambwa, ku vigulu kandi isi wa vuli musaala gwi chiriri.

Siria kandi Isiraeli vatulira Ivuyuda

⁵ Kunangwa, Yahova Nyasaye weve yaleka mwami wa Siria aguuti Ahazi, kandi naahira avandu avanyingi ligali mu Damasiko kuli avahambe. Yahova Nyasaye yaleka mwami wa Siria aguuti Ahazi kandi ni yita vandu veve avanyingi ligali.

⁶ Peka muyaayi wa Remalia yita avasikari valuviliri 120,000 vi Ivuyuda mu lidiku lilala; kigira avandu vi Ivuyuda vaali nivaleki Yahova, Nyasaye wa vaguugavavo.

⁷ Zikiri, musaza wizingulu kutura mu ihiiri ya Efuraimu, yita Maaseia muyaayi wa Ahazi, Azirikamu munene wi inyumba yu vwami, kandi Elikana, uwaali wakaviri ku mwami mu vunyali.

⁸ Kali niiva avandu vi Ivuyuda vaali aviiko vache vaavo, liihi lia vandu va Isiraeli vagumira avakali na vana 200,000 kuli avahambe nivavahila mu kilala cha Samaria harara ni viranye vinyingi.

Muporofeti Odedi akalagira Isiraeli

⁹ Haali ho nu muporofeti wa Yahova, uwalangwa Odedi wamenyaa mu lidaala linene lia Samaria. Yagana ni liihi lia Isiraeli liali nivirana na vahambe kutura Ivuyuda lwa vaali nivaveeye ahimbi kwingira mu lidaala linene ma navavoolera, “Yahova Nyasaye wa vaguuga vinyu yavihilirwa na vandu vi Ivuyuda ma naleka munyi muvaguuti; navuzwa kalunu umali kuhulira kuli munyi mu vasinzi mu vutima vonene vugira livelererwa, kali yaga goosi gaduuki mwigulu.

¹⁰ Na kalunu musaaviraa kokora avasaza na vakali va Jerusalemi nivuyuda kuva avatugwa vinyu. Simumanyi ndi na munyi kandi mu mali kwonera Yahova Nyasaye winyu?

¹¹ Mu mbulirize! Avahambe yava vaveeye avamwavo na vavoozo vinyu. Leki vazie, gase Yahova alahaana kumunyi mageri mu vutima vwivwe vululu.”

¹² Vane ku vasaza vimiliri vu vwami vwa Ivaale, Azaria muyaayi wa Jehohanani, Berekaya muyaayi wa Meshilemozi, Jehizikia muyaayi wa Shalumu, na Amasa muyaayi wa Hadilai navo kandivaagaya kekolwa chi liihi liali nilikoli.

¹³ Vavavolera, “Mutaleeti avahambe yavo yinu mba! Kunyi kumali kwonera Yahova nu kumukola avihilirwi na kunyi kandi akohe mageri. Kalunu mwenya kokora ikindu kimanyaa kemeede uvwoni vwitu vululu ligali ku Isiraeli.”

¹⁴ Kunangwa avasikari vi liihi vaahana avahambe harara ni vilaanye ku viimiliri kandi muganda gwosi gwa vandu

¹⁵ na vasaza vane yavo vaatovolwa ukuhaana zinguvu kutura mu vilaanye viagumirwa ku vahambe vaali chahonyo. Vaavaha zinguvu ni vilato ukwiviika, chukulia kandi ni linywa, kandi nivavaka maguta ga muzeituni mu zingwagu ziavo. Yavo avaari vadedekere avatanyala kogenda vanyinywa ku zibunda, na avahambe vosi viranywa mu kivala chi Ivuyuda ha Jeriko, lidaala lie misaala ji likindu. Maku avandu va Isiraeli viirana yengo wavo.

Ahazi ateevaa ovokonyi kutura ku mwami wa Asiria

¹⁶ Ku ing'inga yeyo mwami Ahazia yatuma amakuva ku mwami wa Asiria naamugonyaa amuhe ovokonyi.

¹⁷ Yakola ndio kigira vandu va Edomu vaali nivingiliyi nukuguuta Ivuyuda 2 kandi nivahili avahambe.

¹⁸ Ku ing'inga ndala nzere avandu va Filisitia vaali nivingilira madaala gaveeye mu vireremo vie madioli kandi mu lovega lwi isavaalu wi Ivuyuda. Vaavugura madaala manene ga Bezi-shemeshi, Aijaloni, kandi Gederozi, kandi na madaala ga Soko, Timina, na Gimuzo harara na madaala gago, kandi nivamenya mu.

¹⁹ Yahova yahaana mageri nu kwikiza vandu vi Ivuyuda, kigira mwami Ahazi yaali navuli kumuhulira kandi naasuuyi kwigalira avandu vi Vuyuda vavuli kokora uvwoni.

²⁰ Kunangwa mwami Tigilazi Pileseri wa Asiria yazia kuye, navuzwa mu vogono vwo kokonya Ahazi, yaamudambiza ligali.

²¹ Maku Ahazi yavugula izahabu kutura mu Litembeli, zinyumba ziu vwami, kandi kutura mu zingo zia viimiliri va vandu, ma nagihaana ku mwami wa Asiria, navuzwa kali yaga sigakonya kindu mba.

²² Lwu uvudinyu vwa Ahazi vwa medeeka ligali, kandi naye yameda kwona ku Yahova mbitilira kuvita maziambiri.

²³ Yahaana visiuviliru ku vanyasaye va Vandu va Asiria, avaari nivamuguuti. Yavoola, “Avanyasaye va Vasiria vakonya avami va Siria, kunangwa niimbana visiuviliru kuvo, hawundi vanyara kongonya.” Yivwo nivwo uvwoni vwagira Ahazi naagwa mu kivi, harara ni kivala chiche chi Ivuyuda.

²⁴ Komeeda ku gene yaga, yavugula iviju viosi vie Litembeli kandi naaviatanyia. Yahaana viliango vie Litembeli kandi naasingiriza uvwali vwa vanyasaye vageni mu vuli havundu ma Jerusalemi.

²⁵ Mu vuli lidaala linene kandi vuli tudaala mu Ivuyuda, yumbaka havundu hukusigamira misambwa, ahi kimuli kidukanaa kisambirwi ku vanyasaye vandi. Munzira yiyi yeletera kuye mwene uvutima vululu vwa Yahova, Nyasaye wa vaguuga veve.

²⁶ Ivikolwa vindi viosi vie liamiiha lilie, kutura mu litanga kuduuka ku keheri, viang'odwa mu vitabu via makuva ga kale via avami vi Ivuyuda na Isiraeli.

²⁷ Mwami Ahazi yakuza kandi nateevwa mu Jerusalemi, navuzwa si mwaali mu vilindwa viu vwami mba. Muyaayi weve Hezekia yavugula ovogono vwivwe kuli mwami.