2 Kyetsinyinga 26 - KITABU KITAKATIFU

Mwami Uzia wi Ivuyuda

¹ Avandu vosi vi Ivuyuda vaatovora Uzia, muyaayi wa Amazia, uwaali naveeye ni mihiga 16, nivamukora ave mwami mu vogono vwa baba weve.

² Inyima wi likuza lia Amazia lwa Uzia yirana kugumira lidaala linene lia Elazi na ukuliumbaka Uvuhia,

³ Uzia yaali ni mihiga 16, lwa yaatanga kwamiiha na yamiha ku mihiga 52 mu Jerusalemi. Lieta lia mama weve liali Jekolia kutura Jerusalemi.

⁴ Yakola agaali malungi imbiri wa Yahova, kolondekana ku liiva lia baba weve Amazia, wakola agayaanziza Yahova.

⁵ Yiviika umwene kwenyeleriza Nyasaye ligali, mu madiku ga Zakaria yaali mwoyo, uwaali mugerihizi weve wi dini mu liitia Nyasaye; na kolohoono lwa yenya Yahova, Nyasaye yamugasiza.

⁶ Uzia yazia kulwaana na vandu va Filisitia. Yasambula madigi ga madaala manene ga Gazi, Jamunia, na Ashidodi, kandi niyumbaka zimbinga zia madaala manene ahimbi na Ashidodi kandi mu Filisitia mwatigalaa mwosi.

⁷ Nyasaye yaamukonya ukuguuta vandu va Filisitia, Avandu Arabu avamenyaa ha Guri-baali, kandi Avameuni.

⁸ Avandu va Amoni vaatunga uvusuuru ku Mwami Uzia, kandi yagwa wizingulu ligali kali ulusuma lwilwe lwalanda kuduuka Egebeti.

⁹ Uzia yadinyiriza liumbakwa lie imbinga ya Jerusalemi ku liumbaka minaara ha kirivwa cha Kona, ha kirivwa chi livona, kandi hi lidigi liegoda.

¹⁰ Yumbaka kandi minaara ji zimbinga mu kivala choosi kandi yayava amaliina manyingi gu kuvungiza mu amazi, kigira yaali ni chayo chi mitugu minyingi hoosi hi vigulu vie madioli mu Shefela kandi mu vireremo. Kigira yayanza uvulimi, yadinyiriza avandu kutaga mizabibu mu kivala chi vigulu kandi kulima kivala kenoru.

¹¹ Uzia yaali ni liihi linene ilietegekera vulwani ku ing'inga yoosi. Makuva gang'odwa gi vikolwa viavo galindwa na vang'odi veve Jeyeli na Maaseia, hasi hovohenzerizi vwa Hanania mulala ku vahenzi vu mwami.

¹² Livalizwa lia aviimiliri vi zinyumba vosi avaari vanene ku vasaza valuviliri vu vulwani vaali 2,600.

¹³ Hasi ha malago gaavo haali ni iliihi lia vasaza vigizwa vulahi kigira vulwani vaali 307,500, liihi lie zinguru ligali liokokoonya mwami kulwaana avasigu veve.

¹⁴ Uzia yahaana zinguva, amatimu, igudwa, zisalamba, uvuta amatimu kandi amagina gu kulasila ku migoye.

¹⁵ Mu Jerusalemi, avaturi veve valomba viju viu kulasila zisere ziuvuta kandi viu kulasila amagina manene kutura ku minaara kandi kutura ku zikona zia madigi gi lidaala linene. Luyali lwi lizominywa lilie lwalanda havundu hoosi kandi naagwa wizingulu zinene ligali kigira ovokonyi vwa yanyoora kutura ku Nyasaye.

Uzia aheevangwa mageri kigira ilielola lilie

¹⁶ Navuzwa lwu mwami Uzia yagwa wizingulu ligali, yaali ni liegingira; na lielola lilie liamudiviza. Si yahulira Yahova Nyasaye weve lwa yazia mu Litembeli ukusamba kimuli ku vwali mba.

¹⁷ Musaalisi Azaria, naahelekangwa na vasaalisi valuviliri kandi vi zinguru 80 va Yahova, valonda mwami Uzia mu Litembeli

¹⁸ kumugaya. Va vola, “Uzia! Si oveeye nuvunyari kusamba kimuli ku Yahova mba. Avasaalisi veng'ine, avaveeye kisukururwi cha Haruni, nivo avatakaswa kokora yaga. Tula ahatakatifu yaaha. Ivi umali kwonera Yahova Nyasaye, na sialakugasiza kandi mba.”

¹⁹ Uzia yaali nasingiyi ho mu Litembeli ahimbi nu vwali vwukusambira ku kimuli na yaali nagumiyi kituva chi kimuli yavihilira avasaalisi zana ligali, kandi nonoho ovogere vwamulia ku vweni vwivwe.

²⁰ Lwu musaalisi munene Azaria na vasaalisi vandi vosi vamwumika mumoni ni liegosa linene. Vamuniga kutura mu Litembeli vwangu. Naye mwene yakola vwangu kutura mu Litembeli kigira Yahova yaali na haani kuye amageri ligali.

²¹ Mwami Uzia yalwala ovogere kuduuka lwa yakuza. Kigira yaga yamenya munyumba yeeye, mwena kutura ku vandu vandi kandi naasosiziywi ku miyinzi josi na siyingira mu Litembeli kandi mba. Muyaayi weve Jozamu yamiha kivala yicho mu vogono vwivwe.

²² Muporofeti Isaya muyaayi wa Amozi yang'oda vindu vindi viosi viu mwami Uzia yakola mu ing'inga yu vwamihi vwivwe.

²³ Uzia yakuza na yateevwa mu kiguti chukuta mu avami, navuzwa kigira uvulwaye vwo vogere vwivwe, siyateevwa mu virindwa via vami mba. Muyaayi weve Jozamu yavugula ovogono vwivwe kuli mwami.