2 Kyetsinyinga 25 - KITABU KITAKATIFU

Mwami Amazia wi Ivuyuda

¹ Amazia yaatanga kwakwiha naveeye ni mihiga 25. Yamiha mu Jerusalemi ku mihiga 29. Mama weve yaali Jehoadini kutura Jerusalemi.

² Yakola agali malungi imbiri wa Yahova, navuzwa siyaali musuuvirifu ligali ku Yahova mu mwoyo gwigwe mba.

³ Nonoho lwa yanyoora zinguru mu liamiiha lilie, yita avanene veve, aviita baba weve.

⁴ Navuzwa si yita avana vaavo mba, navuzwa yalonda lilaga lia Yahova yalaga mu malago ga Musa: “Aviivuli si valitwa kigira uvwoni vwa avana vaavo mba, anoho avaana sivaliitwa kigira uvwoni vwa viivuli vaavo mba, navuzwa mundu sa mulala aliitwa kigira uvwoni vwivwe umwene.”

Vulwani ku kivala cha Edomu

⁵ Mwami Amazia yalanga avasaza vosi harara vi zihiiri zie Ivuyuda na Benjamini mu viduma via vasaza 1,000 kandi viduma via vasaza 100. Vasaza yava vosi avi mihiga 20 anoho avahiindira vaali 300,000. Vaali avatovole vi liihi veetegeki kuzia mu vulwani, avaari no vogeri vwukutumikira amatimu ni zinguva.

⁶ Komeeda ku yava, mwami Amazia yahandika avasikari 100,000 kutura mu Isiraeli na vatungwa ahimbi zikilo 3,400 zie ifeza.

⁷ Navuzwa muporofeti yazia ku mwami namuvolera, “Utavugula vasaza va Isiraeli yava harara naivi mba. Yahova siaveeye harara na avasaza yava kutura ku vwami vwa Ivaale mba.

⁸ Hawundi uganagana ndi avasaza yava valakokola ove ni zinguru mu vulwani, navuzwa ni Nyasaye yeng'ine oveeye ni zinguru kokokola uguuti mu vulwani, kandi anyala kuha avasigu vovo zinguru vakulwaane nu kukuguuta.”

⁹ Na mwami Amazia yateeva muporofeti uyu, “Navuzwa kulakola ki ku ifeza yamali kuhaana ku vasaza yava?” Na muporofeti yamutivulira, “Yahova alakwilanyira vinyingi kuvita yivi!”

¹⁰ Hene yaho, mwami yatuma avasaza va yaali navuguye ku mitungu kwirana yengo wavo. Kigira yaga, avasaza yava viirana yengo wavo nivaveeye nu vutima vululu ligali ku vandu vi Ivuyuda.

¹¹ Mwami Amazia yanyoora zinguru ma ni yimilira avasaza vi liihi lilie kuzia mu Livona lie jumbi, valwaana ma niviita avasikari va Edomu 10,000,

¹² kandi vagumira avandi 10,000. Vavavugula ni vavahila kondongozi yi kiguru mu lidaala lia Sela, na vavazoma kutura kondongozi kwi kiguru yiki, na vosi vamanya nivakuza.

¹³ Navuzwa avasaza, avasikari vu mwami Amazia yaali natumi kwirana yengo wavo, na vavuli kuzia mu vulwani harara naye, vingilira amadara gi Ivuyuda hagati ha Samaria na Bezi-horoni, ma niviita avasaza 3,000, kandi nivavugura vilaanye viavo vinyingi.

¹⁴ Lwa Amazia yirana kutura mu liguuta lie liihi lia vandu va Edomu, yaleeta harara naye vifananyi viavo, yavisingiriza kuli avanyasaye veve, naavasigamira, kandi nahaana vimuli viu kusambwa kuvo.

¹⁵ Agene yaga gakoraa Yahova kuvihilirwa mu lituma muporofeti ku Amazia. Muporofeti yamuteeva, “Kigira ki ivi umali kusigamira avanyasaye vageni avatanyala kali kohonya vandu vaavo kutura mu zinguru zizio?”

¹⁶ Navuzwa lwa yaali nakemoloma, mwami Amazia yamuvolera, “Kwa kokora ivi kuva mugelihizi wu mwami? Lekera komoloma, anoho ndakwiita!” Muporofeti uyu yalekera kumoloma, navuzwa inyima wo kovora, “Kalunu mali kumanya ndi Nyasaye umali kusaavira kukudiviza kigira ivi umali kokora yaga goosi, kandi umali kusura amigizu gange.”

Vulwani ku Isiraeli

¹⁷ Mwami Amazia wi Ivuyuda harara na vagerihizi veve, viikiruka kulwaana Isiraeli. Maku yatuma amakuva ku mwami Jehoashi wa Isiraeli, uwaali mwana muyaayi wa Jehoahazi, mwisukulu wa Jehu, yamulaanga yaze valwaane naye.

¹⁸ Jehoashi yatuma litivuli yili ku Amazia; “Ing'inga indala kisaka cha mafa ku kiguru cha Lebanoni chatuma amakuva ku mudaragwa gwa Lebanoni ndi; ‘Uhaane mukaana woovo aleetwe nu muyaayi wange.’ Inyama yu mu vulimu yaavitira aheene yaho niduvagira litagalo zana hasi.

¹⁹ Kalunu mwami Amazia, ivi welolaa ndi umali kuguuta vandu va Edomu, navuzwa inzi ng'ogelihiza ove hango; Kigira ki utaangiza uvudinyu vulileta ikivi ku ivi mwene na vandu vovo?”

²⁰ Navuzwa Amazia yavula kuhulira. Vwali uvulariri vwa Nyasaye ku Amazia kuguutwa, kigira yaali natovoli kusigamira avanyasaye va Edomu.

²¹ Maku mwami Jehoashi wa Isiraeli yazia kulwaana mwami Amazia wi Ivuyuda. Vombi vaaganira ha Bezi-shemeshi mu Ivuyuda,

²² na iliihi lie Ivuyuda lia guutwa ma avasikari virukira mu zingo ziavo.

²³ Jehoashi yagumira Amazia ma na muhiraa mu Jerusalemi. Hene yaho yaduya lidigi lie lidaala linene nilivunguguka kutura ku kirivwa cha Efuraimu kuduuka ku kirivwa cha Kona, ahimbi uvutambi vwi zimita 200.

²⁴ Yavugula vilaanye viosi vie zahabu, ifeza, harara ni viju viosi viali mu Litembeli lia Nyasaye viali mu vulindi vwa Obedi Edomu, kandi amaviikiru gi inyumba yu mwami, harara na vahambe ma niyirana navio mu Samaria.

²⁵ Mwami Amazia wi Ivuyuda yamenya mihiga 15 inyima wi likuza liu mwami Jehoashi mwana muyaayi wa Jehoahazi mwami wa Isiraeli.

²⁶ Vindu vindi viosi via Amazia yakola kutura mu litanga kuduuka ku keheri chi liamiiha lilie, viang'odwa mu kitabu cha makuva ga Avami vi Ivuyuda na Isiraeli.

²⁷ Kutura ing'inga yeyo, lwa Amazia yagirung'ana naleka Yahova, avasigu veve vamwikiruka nivenya kumwiita mu Jerusalemi. Hene yaho, yiruka nazia mu lidaala linene lia Lakishi, navuzwa avasigu veve vamulonda ni vamwitira yo.

²⁸ Muviri gwigwe gwaagingirwa ku barasi nigoletwa mu Jerusalemi, ma naateevwa harara na vaguuga veve mu virindwa viu vwami mu lidaala linene lia Daudi.