2 Kyetsinyinga 24 - KITABU KITAKATIFU

Mwami Joashi wi Ivuyuda

¹ Joashi yaatanga kwamiiha kuli mwami wi Ivuyuda naveeye ni mihiga 7, yamiha mu Jerusalemi ku mihiga 40. Mama weve yalangwa Zibia kutura mu lidaala linene lia Beerisheba.

² Mulimenya liile liosi yakola agayaanziza Yahova mu mihiga josi ja Jehoyada musaalisi, yaali nakikiri mwoyo.

³ Jehoyada yaatovolera Joashi avakali vaviri avayiivula navo avana vayaayi na vakaana.

⁴ Inyima wa yaga, mwami Joashi yasavira kolomba hi Litembeli lia Yahova liali ni lia sasuguka.

⁵ Yalanga avasaalisi harara na vandu va Levi naavalaga vazie mu madaala manene gi Ivuyuda kosolola kutura ku vandu vosi mabesa gaduukaa gu kolomba hi Litembeli lia Yahova liali ni lia sasuguka vuli muhiga. Yavavolera vakole vwangu, navuzwa vandu va Levi si vakora vwangu mba.

⁶ Kunangwa, mwami Joashi yalanga Jehoyada mwimiliri wavo namuteeva, “Kigira ki siwenya vandu va Levi vasolole uvusutu vwa Musa mutumikiri wa Yahova yalaga kutura ku vandu vi Ivuyuda na Jerusalemi kokonyelera uvulindi vwi lihema lia Yahova?”

⁷ Kigira avana vayaayi va Azalia, uwaali mudamanu vononya Litembeli lia Nyasaye, kandi yatumikira iviju vinyingi viatakaswa mu lisigamira Baali.

⁸ Maku, mwami yalaga vandu va Levi kolomba lisandugu lio vosololi nivaliviika ichova ha kirivwa chi Litembeli lia Yahova.

⁹ Valandiza mu Vuyuda mwosi nu mu Jerusalemi mwosi, vuli mundu koleta ku Yahova lisolola lia Musa mutumikiri wa Nyasaye yasolola kutura ku Isiraeli mu ligendanyama.

¹⁰ Avandu vosi harara na viimiliri vaavo vaali nu vuyanzi koleta vusuuru nu kuviika mu lisandugu kuduuka nilizula.

¹¹ Lwa vandu va Levi vavugura lisandugu nu kuhila ku vanene vu mwami na lwa valora ndi Mabesa gaeveeye mu manyingi, mung'odi wu mwami harara na vanene vu musaalisi munene vaavugura lisandugu nu kutulizamu mabesa nu kulilanya ha kirivwa chi Litembeli. Vakora ndio lidiku vuli lidiku na vasolora mabesa manyingi ligali.

¹² Mwami Joashi nu musaalisi Jehoyada vaavugura mabesa yaga nivaha yavo avasingilia miyinzi jo kolomba hi Litembeli lia Yahova liasasuguka. Venya avasaza vaari nu vusiza vwu kwumbaka, nu kuvaaza, kandi avaari nu vusiza vwu kuyinzira ni vivia kandi nu mugasa kolomba hi Litembeli lia Yahova liasasuguka.

¹³ Avasaza vosi avaakoraa miyinzi jiu vwumbaki, vayinzira vudinyu kolomba Litembeli lia Nyasaye kuduuka ni nililoleka kuli liali mu litanga.

¹⁴ Lwi miyinzi yiji jaali nijakafa mabesa gatigala vahiraa ku mwami Joashi nu musaalisi Jehoyada nivatumikira kolomba zisahani ni viju vindi kutumika mu Litembeli. Mu madiku goosi ga Jehoyada yaali musaalisi, vihaanwa viahaanangwa kazozo mu Litembeli lia Yahova.

Uvwimiliri vwa Jehoyada vugiruuganywa

¹⁵ Navuzwa Jehoyada yamenya kuduuka naava mundu muhindira ligali, na yamanya nakuza naveeye ni mihiga 130.

¹⁶ Yateevwa mu vilindwa viu vwami mu lidaala linene lia Daudi mu luyali lwimiyinzi ju vutumwa vwa yakolera avandu va Isiraeli, Nyasaye kandi Litembeli lia Yahova.

¹⁷ Navuzwa inyima wi likuza lia Jehoyada, aviimiliri vi Ivuyuda vazia ku mwami Joashi ni viinama imbiri weve. Hene yaho, mwami yavahulira.

¹⁸ Maku avandu valekera kusigamira Yahova mu Litembeli lia Yahova, Nyasaye wa vaguuga vaavo, ma nivatanga kusigamira vifananyi viu munyasaye mukali Ashera. Na uvutima vwa Yahova vwaduuka mu Ivuyuda na Jerusalemi kigira uvwoni vwavo.

¹⁹ Yahova yatuma avaporofeti kuveganihiza viirane kuye, navuzwa avandu si vamuhulira mba.

²⁰ Hene yaho Roho wa Nyasaye yaduuka ku Zakaria muyaayi wa Jehoyada musaalisi. Yasingira havundu ha vandu vosi vaali vanyara kumulora, navoora, “Yahova Nyasaye ateeva, ‘Kigira ki si mwahulira malago geege, na muletaa kivi ku munyi aveene! Mwaleka Yahova na Yahova ya mulekaa.’ ”

²¹ Mwami Joashi yahambana na vandu nivikiruka muporofeti Zakaria, na ku lilaga liu mwami, avandu valasa Zakaria na magina mu mugizi gwi Litembeli.

²² Mwami Joashi si yizuliza uvulahi vwa Jehoyada baba wa Zekaria ga ya mukolera, navuzwa yita Zakaria. Lwa Zekaria yaali nakuza, yavoola, “Yahova ayaanze alole agokolaa na ahaane amageri ku ivi!”

Keheri chi Liamiiha lia Joashi

²³ Lwa gaaduuka ku limala muhiga, iliihi lia vandu va Siria vingilira Ivuyuda na Jerusalemi, ma niviita aviimiliri vosi, ma ni vavugura vilaanye viavo viosi nivahira mwami wavo a Damasiko.

²⁴ Kali niiva iliihi lia vandu va Siria vingilira na vasaza vakeekeke, navuzwa Yahova yavakola nivaguuta kiduma kenene chi liihi lia vandu vi Ivayuda, kigira vaali nivaleki Yahova Nyasaye wa vaguuga vaavo. Munzira yiyi, mwami Joashi yahevwa amageri.

²⁵ Lwi liihi lia vandu va Siria vaatura kuzia, valeka mwami Joashi natumitiywi ligali, navuzwa avanene veve 2 vamwikiruka ni vamwitira mu kidali chiche, kuvaanza kisaalia kigira liitwa lia Zakaria mwana muyaayi wa Jehoyada musaalisi. Yateevwa mu lidaala linene lia Daudi, navuzwa si yateevwa mu virindwa viu vwami mba.

²⁶ Avanene vaviri avamwikiruka ni: Zabadi muyaayi wa Shimirizi mukali wa vandu va Amoni, na Jehozabadi muyaayi wu mukali wa vandu Ava Moabu Shimirizi.

²⁷ Amakuva ga vana va Joashi, Ovoporofeti vunyingi kuye, makandi kolomba Litembeli lia Nyasaye, gang'odwa mu kitabu cha makuva ga vami. Na Amazia mwana weve muyaayi yamiha mu vogono vwivwe kuli mwami.