2 Kyetsinyinga 23 - KITABU KITAKATIFU

Uvwibaali ku Azalia

¹ Inyima wi mihiga 7, musaalisi Jehoyada yatovola ndi ing'inga imali kuduuka yu kuvugura ikika. Yalomba lilagana na vanene 5 vi liihi: Azaria muyaayi wa Jerohamu, Ishimaeli muyaayi wa Jehohanani, Azaria muyaayi wa Obedi, Maaseia muyaayi wa Adaya, na Elishafati muyaayi wa Zikiri.

² Vavodong'ana mu madaala manene goosi gi Ivuyuda kandi nivavungiza harara vandu va Levi vosi na mitwi ja vizinyumba zia avandu va Isiraeli kutura mu madaala goosi nivavaleeta mu Jerusalemi.

³ Vosi vavugana harara mu Litembeli, na umwene yimwo valomba lilagana na Joashi, muyaayi wu mwami. Jehoyada yavavolera, “Muyaayi mutiga mwami aveeye hano. Kalunu alava mwami kuli Yahova yasuuviriza ndi visukululwi vu mwami Daudi valava.

⁴ Kalunu yiki nicho icha mukora. Lwa Vasaalisi na vandu va Levi vaza ku miyinzi ku Lisabato, (Mundu mulala mu vuli vavaga) valalinda virivwa vie Litembeli,

⁵ kedonye kindi (kilala ku vivaga) valalinda inyumba yu vwami, na vandu vandi avatigaye valaviikwa kulinda ha kirivwa chu Muse Avandu vosi valavunga mu mugizi gwi Litembeli.

⁶ Mundu ku vosi atingira mu Litembeli nivatali Avasaalisi na vandu va Levi avaveeye ku miyinzi. Yavo vanyara kwingira kigira vaveeye avatakase, na vandu vaadi vatigaye vosi kuduuka vahuliri malago ga Yahova, na vave ichova.

⁷ Vandu va Levi valakumbiriza mwami zimbega ziosi kumulinda, nivetegeki ni vivavi viavo, kandi valava nu mwami havundu hoosi aha zia. Ku vosi ogeriza kwingira mu Litembeli kuduuka yiitwi.”

⁸ Vandu va Levi na avandu vosi vi Ivuyuda valonda malago ga Jehoyada. Avasaza sivaalakulwa vazie yengo lwa vazia ku miyinzi ku Lisabato. Kunangwa avanene vi liihi vaali navasaza avaari nivaturaa ku miyinzi na yavo avaari nivaaza ku miyinzi.

⁹ Jehoyada yahaana ku vanene matimu nizinguva ni zikuuti, ziali ziu mwami Daudi na iziali niziaviikwa mu Litembeli.

¹⁰ Yavika avasaza vaari nivetegeki niviugi viavo viu vulwani, kukinga mwami.

¹¹ Maku Jehoyada yaatuliza Joashi ichova, naviika itaji ku mutwi gwigwe, ma naamuha malago galindaa uvwami. Nandio yakolwa umwami. Musaalisi Jehoyada navayayi veve vaavaka Joashi maguta kugwa mwami, na vandu vandi vosi vahaanzuka, “Mwami ahindiri!”

¹² Lwa Azalia yahulira muliviti gwi liyoga lia vandu vanyagulaa nivizominya mwami, yazia vwangu vwangu kuvo ha Litembeli lia Yahova aha avandu vaali nivavungi.

¹³ Hene yaho yalora mwami muhia ha vwingiliru vwi Litembeli, nasingiyi ha itiiru yaalomberwa avami, kandi nakumbiriziywi na vanene vi liihi harara na vakubi vi visiriva. Avandu vosi vaali nivahanzuka nuvusangali vonene ligali kandi nivakubaa visiriva na vimbi vumu litembeli niviju viavo viu kwimba nivimiriyi zinyimbu zielizominya. Yatandula zinguvu zizie mu linyang'ana nilivihilirwa kandi nahanzuka, “Uvwibaali! Uvwibaali!”

¹⁴ Jehoyada siyenya Azalia yiitirwi imbiri wi Litembeli mba, kunangwa yalanga avanene vi liihi na vavoolera, “Mu mutulizi hagati hi zimbaso zia vasikari vi liihi, na mwiti mundu woosi ogeriza kumusoola.”

¹⁵ Vamugumira, nivamuhila hi inyumba yu vwami, na aheene yaho, ha Kirivwa chi zibarasi, vamwita

Miyinzi ja Jehoyada

¹⁶ Musaalisi Jehoyada yalomba lilagana ndi Oyo, avandu, kandi umwami, valava avasuuvirifu ku Yahova Nyasaye.

¹⁷ Avandu vosi vazia kuduuka ku Litembeli lia Baali ma nivalisambula; vaaduya uvwali vwosi ni Vifananyi viosi kandi niviita Matani musaalisi wa Baali imbiri wu vwali vwosi.

¹⁸ Maku Jehoyada yavika uvulindi vwi Litembeli lia Yahova mu vusingiliri vwa Vasaalisi, avaari vandu va Levi, ava Daudi yaali niyagavulira miyinzi mu Litembeli, ukuhaana vihaanwa viukusambwa, via Yahova, kuli gang'odwa mu Lilaga lia Musa, nilisangala kandi liemba zinyimbu, kuli Daudi yaali nalagi.

¹⁹ Yatovola kandi avalindi vi viliango mu vwiyangu vwavo ha virivwa vie Litembeli lia Yahova kwigalira vosi utaveeye mutakase avuli kwingira.

²⁰ Avanene va mahi, avanene vuvwamiili, aviimiliri va vandu, na vandi vosi harara Jehoyada valondekana mu luvaso koleta mwami kutura mu Litembeli kuduuka hi inyumba yu vwami. Vingira mu kirivwa kenene, na umwami yaangula ovogono vwivwe ku endeve yu vwami.

²¹ Avandu vosi vaali nu vuyanzi ligali, na lidaala linene liehozeliza ligali kigira Azalia yitiywi.