2 Kyetsinyinga 22 - KITABU KITAKATIFU

Mwami Ahazia wi Ivuyuda

¹ Avandu va vingilira ahokososa, ha Vandu va Isiraeli ma niviita avayaayi vosi vu mwami Jehoramu; nitali Ahazia, muyaayi mukogoti. Kunangwa avandu va Jerusalemi vaakora Ahazia, kuva mwami mu vogono vwa baba weve mwami Jehoramu.

² Ahazia yaali ni mihiga 22 lwa yagwa mwami wi Ivuyuda. Yamiha mu Jerusalemi ku muhiga mulala. Mama weve yaali Azalia, mukaana wa Ahabuna mwisukulu wu mwami Omuri wa Isiraeli.

³ Ahazia yalonda liiva lia vinyumba ya Ahabu, kigira mama weve yamuha zing'anagani iziamwimilira kuduuka mu likora uvudamanu.

⁴ Yakola uvwoni imbiri wa Yahova, kuli avinyumba ya Ahabu vaali nivakoli, kigira inyima wi likuza lia baba weve, vahaana zing'anagani ziavula kumukonya, na ya duuka mu liigwa.

⁵ Yalonda kandi zing'anagani ziavo zia vamuha lwa yazia kuhambana harara na Joramu muyaayi wu mwami Ahabu wa Isiraeli kuzia kulwaana mwami Hazaeli wa Aramu ha Ramozi mu kivala cha Gileadi. Vandu va Siria vaatoza Joramu ligali.

⁶ Yirana mu lidaala linene, lia Jezireeli kulwalizirwa yo zing'oma zizie zia vamwata ha Ramozi. Maku Ahazia muyaayi wa Jehoramu mwami wa Ivuyuda yazia kolola Joramu muyaayi wa Ahabu kigira yaali niyatiywi zing'oma.

⁷ Nyasaye yatumikira liluuta yili ku Joramu okolomba Ahazia. Lwa Ahazia yaali naveeye yo, Jehu muyaayi wa Nimushi, uwa Yahova yaali natovoye ukudiviza uvwami vwa avinyumba ya Ahabu yagana navo.

⁸ Lwa Jehu yaali naadukizaa lilago lia Nyasaye ku vwami vwa vinyumba ya Ahabu, yanyoora avanene vi Ivuyuda kandi avayaayi va vamwavo Ahazia avaari nivamuheleki, na yaviita vosi.

⁹ Jehu yenyeleriza Ahazia mbitilira, na vandu veve vagumira Ahazia lwa yaali niyivisi mu Samaria. Vamuleeta ku Jehu ma naamwita. Vaamuta vuzwa kigira vavoola, “Yaali mwisukulu wa Jehoshafati, uwahulira Yahova nu mwoyo gwigwe gwosi.” Kunangwa sihali ho nu mulala munyumba ya Ahazia uwaali nizinguru kuzizagiliriza uvwami mba.

Mwami wikikali Azalia wi Ivuyuda

¹⁰ Nonoho lwa mama wu mwami Ahazia yahulira iliitwa liu muyaayi weve, yahaana malago ndi avinyumba yu vwami vwi Ivuyuda vosi viitwi.

¹¹ Ahazia yaali na mbozo weve Jehosheba, uwaali niyaazia lukali ku musaalisi Jehoyada. Yahonyia mu vuvisi Joashi mulala ku vayaayi va Ahazia naamuhira ihale kutura ku vana vumwami vosi avaari himbi kwitwa. Yamuvisa harara numuleri kandi naamulelera mu keng'oze kilala chi Litembeli. Ku limuvisa, Jehosheba yamuhonyia kutura ku liitwa na Azalia.

¹² Yamuvisa mu Litembeli lia Nyasaye ku mihiga sita lwa Azalia yaamiihaa kivala chi Ivuyuda kuli mwami wikikali.