2 Kyetsinyinga 21 - KITABU KITAKATIFU

¹ Mwami Jehoshafati yakuza ma nivamuta mu vilindwa viuvwami mu lidaala linene lia Daudi, na mwana muyaayi weve Jehoramu yavugula ovogono vwivwe kuli mwami.

Mwami Jehoramu wi Ivuyuda

² Jehoramu mwana muyaayi wu mwami Jehoshafati wi Ivuyuda yaali na vamwavo sita: Azaria, Jehieli, Zakaria, Azariahu, Mikaeli na Shefatia.

³ Baba wavo yavaha mu vunyingi izahabu, ifeza kandi ni miandu jindi juvuguli vudinyu. Yatovola vuli mulala ukwaamiiha ku madaala manene gi zimbinga gi Ivuyuda. Navuzwa kigira Jehoramu yaali muyaayi mukulundu, Jehoshafati yamuvika kwamiiha mu vogono vwivwe.

⁴ Lwa Jehoramu yaali ni yakasingira vudinyu mu vwami vwa baba weve yamanya ni, yita avamwavo veve vosi kandi valala ku vanene va Isiraeli.

⁵ Jehoramu yaatanga kwamiiha naveeye ni mihiga 32; yamiha mu Jerusalemi ku mihiga 8.

⁶ Yalonda liiva lidamanu kuli mwami Ahabu na vami vandi va Isiraeli kigira yaleeta mukaana mulala ku vakana va Ahabu kuli mukali weve. Yakola uvwoni imbiri wa Yahova,

⁷ navuzwa Yahova siyenya kudiviza uvwami vwi inyumba ya Daudi, kigira yaali niyalomba lilagana na Daudi, kandi namusuuviriza ndi visukululwi veve valazizagilira kwamiiha mihiga ni mihiga.

⁸ Mu ing'inga yu vwamihi vwa Jehoramu, avandu va Edomu vibaara ku vandu vi Ivuyuda ma nivatovola mwami wavo aveene.

⁹ Maku mwami Jehoramu harara na vanene veve vaatura kuzia na magare gu vulwani kuzia kwingilira kivala cha Edomu. Hene yaho, liihi lia vandu va Edomu liavakumberiza, navuzwa mu ing'inga yu vudiku, vatura ichova ma niviruka.

¹⁰ Kutura lwene yilwo, kivala cha Edomu chi yamiha ichene. Mu ing'inga yene yeyo, lidaala linene lia Libuna liebaala, kigira Jehoramu yaali naleki Yahova, Nyasaye wa vaguuga veve.

¹¹ Kuvita yaga, yumbaka havundu hukusigamira misambwa mu vigulu vie Ivuyuda, kandi niyimilira avandu vi Ivuyuda na Jerusalemi kokora uvwoni imbiri wa Yahova.

¹² Muporofeti Elija yatuma ibarwa ku mwami Jehoramu kovora, “Yahova, Nyasaye wa guuga woovo Daudi, aduraa ivi kigira si walonda liiva lia baba woovo, mwami Jehoshafati, anoho lia guuga woovo, mwami Asa mba.

¹³ Muvogono yivwo, umali kolonda zinzira zia vami va Isiraeli kandi umali kolomba avandu vi Ivuyuda na Jerusalemi kuvula kuva avasuuvirifu ku Nyasaye, kuli Ahabu na Jehoramu valomba avandu va Isiraeli kuvula kuva avasuuvirifu ku Nyasaye. Kali ivi wita avamwavo vovo, avaari vasaza valahi kuvita ivi mwene.

¹⁴ Kulwayago, Yahova alahaana amageri ku vandu vovo, avana vovo, na vakali vovo, kandi aladiviza uvutugi vuvwo vwosi.

¹⁵ Na ivi mwene ulalwaala vulwaye vukuzuuna vululu vwamala, uvumanya vukuzuni ligali munda vuli kazozo.”

¹⁶ Vaali ho na vandu va Filisitia kandi na vandu va Arabu avaveeye himbi na avandu va Ezopia, Yahova yavazuva kuzia kulwaana Jehoramu.

¹⁷ Vingilira Avayuda ma, na nivavugura imiandu jaavo josi ja vaganagana jali je inyumba yu vwami, kandi nivavugura avakali vu mwami na vana veve avayaayi, na si yaali ho kali muyaayi mulala watigala, nitali Ahazia muyaayi weve mukogoti.

¹⁸ Maku inyima wa yaga goosi, Yahova yaleeta ku mwami Jehoramu uvulwaye vwu kuzuna vwa mala.

¹⁹ Ahimbi ing'inga yi mihiga 2 uvulwaye vwamuzuna ligali, kali kuduuka amala geege nigagaduka nigaturaa kigira vuzunu vonene, na mwami yakuza. Avandu veve si valomba muliru kuhaana luyali kuye mba, kuli muliru gwa valomba kuhaana luyali ku vaguuga veve.

²⁰ Mwami Jehoramu yaali ni mihiga 32 lwa yaatanga kwamiiha kuli mwami. Yamiha mu Jerusalemi ku mihiga 8. Si yaali ho mundu kali mulala uwaali ni liverera lwa yakuza. Vaamuta mu lidaala linene lia Daudi, navuzwa si vaamuta mu vilindwa viu vwami mba.