2 Kyetsinyinga 20 - KITABU KITAKATIFU

Vulwani ku kivala cha Edomu

¹ Ing'inga yaduuka lwa mahi ga Moabu na valina va Amoni, harara na vandu va Ameuni vingilira Mwami Jehoshafati wi kivala chi Ivuyuda.

² Vasaza valala vazia ni vavoolera mwami Jehoshafati ndi, “Kiduma kenene chi i liihi kutura Edomu kimali kuduuka kutura ku lovega lundi lwi inyanza yi ijumbi kuza ku mulwaana. Vamali kugumira kivala cha Hazazoni Tamara.” Lieta lindi lie kivala yiki ni Engedi.

³ Hene yaho mwami Jehoshafati yaali nu vuti ma niyenya uvulariri vwa Yahova. Mwami Jehoshafati yalandiza lilaga lio kohonga lilia mu Ivuyuda mwosi.

⁴ Kutura mu madaala manene goosi gi Ivuyuda, avandu vosi vazia vwangu ku Yahova mu Jerusalemi kwenya ovokonyi.

⁵ Mwami Jehoshafati yasingira hagati hi livugana liosi lie Ivuyuda na Jerusalemi, imbiri wu mugizi gwi Litembeli lia Yahova, naasaala vudinyu,

⁶ “O, Yahova Nyasaye wa vaguuga viitu, ivi wamihaa ku vandu vosi vu mulirova. Kutura mwigulu ivi oveeye wi zinguru nu vunyali, na mundu sianyala kuhing'ana naivi mba.

⁷ Ivi oveeye Nyasaye wiitu. Lwa vandu vovo Isiraeli vaduuka mu kivala yiki, waakunga avandu vamenya mucho, ma nukihaana ku visukululwi via Aburahamu, mulina woovo, komenya mu mihiga ni mihiga.

⁸ Vamenya mu kivala yiki, ma nikwumbakira Litembeli kuhaana luyali ku ivi, vavoola,

⁹ ‘Niiva ikivi choosi kiladuuka ku kunyi nu kuhaana amageri; vulwani, vulwaye vudamanu anoho inzara, hene yaho, kulaaza kusingira imbiri wi Litembeli yili ha ivi usigamirangwa. Kulasaala ku Ivi mu vudinyu vwitu, na ivi ulakuhulira nu kokohonya.’

¹⁰ “Na kalunu, avandu va Amoni, Moabu na Edomu vamali kukwingilira. Lwa vaguuga viitu vaza kutura mu Egebeti, si wavavugilira kwingira muvivala yivio, na ndio, avaguuga viitu vavavodong'ana zimbega ziosi na sivavadiviza mba.

¹¹ Yaga nigo gavakokolera; vazaa kukunga kunyi kutura mu kivala cha ivi wakuha.

¹² Ivi oveeye Nyasaye wiitu! Haana amageri kuvo, kigira sikoveeye kindu imbiri wi liihi linene yili ilikulwanaa. Sikumanyi cha kunyala kokora, navuzwa kusuuviraa ndi ivi ulakokonya.”

¹³ Avasaza vosi vi Ivuyuda harara na vakali vaavo, na avana vaavo vasingira imbiri wa Yahova ha Litembeli.

¹⁴ Roho wa Yahova yaduuka ku mundu wa Levi mulala uwaali hagati hi livugana. Lieta lilie liali Jahazieli muyaayi wa Zakaria. Yaali kisukururwi cha Asafu kuvitira mu Matania Jaieli na Benaya.

¹⁵ Jahazieli yavolera mwami Jehoshafati na vandu vosi avamenya mu Jerusalemi ni Ivuyuda, “Muhuliri! Yaga nigo ga Yahova avoora, ‘Mutatia, kandi mutakuza mioyo jinyu mba; kinga mutatia liihi linene yili, kigira uvulwani sivoveeye vwinyu, navuzwa vwa Yahova Nyasaye!

¹⁶ Lidiku lia mugamba mutule muzie kuvingilira lwa vava ni vanigira ku kiguru cha Zizu. Mulavanyoola ha keheri chi livona, ahimbi nu mwigendanyama lia Jerueli.

¹⁷ Munyi si mulalwaana mu vulwani yivu mba, navuzwa musingiri mu vogono vwinyu, musingiri vudinyu, na mulalora liguuta lia Yahova ahaanaa. O, munyi avandu vi Ivuyuda na Jerusalemi, mutakuza mioyo jenyu mba, anoho mutatia, mugamba mutule kuzia ku valwaana, na Yahova alava harara na mwinye!’ ”

¹⁸ Maku, mwami Jehoshafati yinama vwe ni vwivwe nivudira hasi, kandi harara na vandu vosi viinama harara naye, nivasigamira Yahova.

¹⁹ Vandu va Levi valala kutura ku inyumba ya vandu va kohazu na vandu va kora vasingira ni vizominya Yahova, Nyasaye wa Isiraeli, ni mioyo minene ligali.

²⁰ Mugambazuri lidiku lialonda ku, avandu vatura kuzia mwigendanyama lia Tekoa. Lwa vaali nivaziizaa, mwami Jehoshafati yasingira navavoolera, “Avasaza vi Ivuyuda na Jerusalemi; musuuviri Yahova Nyasaye winyu, kandi musingiri vudinyu. Musuuviri aga vaporofeti veve vamuvolera, na mulaguuta.”

²¹ Lwu mwami Jehoshafati yaali niyakamara komoloma na vandu, yatovola avasaza aviimbira Yahova nukwizominya uvukumi vwu vutakatifu vwivwe lwa vatura kuzia imbiri wi hiiri, ni vavoola, “Mwizominye Yahova! Vuyanzi vwivwe vuhindiraa mihiga ni mihiga.”

²² Lwa vatanga kwimba nu kwizominya Yahova, Yahova yingilira avasaza vi liihi lia Amoni, Moabu kandi vi kiguru cha Edomu avaari nivaazi kulwaana Ivuyuda, na vaguutwa.

²³ Liihi lia Amoni na Moabu viikiruka kutulira iliihi lia Edomu kandi nivavadiviza vosi ligali. Lwa vaali ni vakaviita, avasaza va Amoni na Moabu viirana kwikirukana aveene ku vene, na viitana aveene ku vene.

²⁴ Lwi liihi lia vandu Vayuda vazia ku munara mu changalangwe, vahenza ni valora miviri mikuzu nijigoni ku marova, kali si haali ho nu mulala uwahona mba.

²⁵ Lwu mwami Jehoshafati harara ni liihi lilie vazia kuvugura ivilanye kutura kuvo, vanyoola zing'ombe vinyingi ligali, viukulia, zinguvu ni viju vindi viny'ingu viu vuguli vudinyu. Vavugura ni vaviginga ku madiku 3, kigira viali vilaanye vinyingi ligali.

²⁶ Ku lidiku lia 4, vavugana mu livona lia Beraka, ma nivasandiza Yahova ku gayaali navakoleeye. Kulwayago, havundu yaaha hamanya ni halangwa - “Livona lia Beraka” kuduuka kalunu ndi.

²⁷ Mwami Jehoshafati yimilira liihi lilie kwirana Jerusalemi nu vuyanzi vonene, kigira Yahova yaali naguuti avasigu vaavo.

²⁸ Lwa vaduuka mu lidaala linene, vazia mu Litembeli ni viimba nu vukana vwemigoye, visira, na mang'alala ni vasangala mu vuyanzi vonene.

²⁹ Lwu vwami vwi vivala viosi vahulira Yahova umali kulwaana nu kuguuta avasigu va Isiraeli, vosi vaatia Nyasaye ligali.

³⁰ Kunangwa, mwami Jehoshafati yamiha mu mirembe, kigira Nyasaye weve yamuha ovososi ku zimbega ziosi.

Keheri chi liamiiha lio mwami Jehoshafati

³¹ Mwami Jehoshafati yaatanga kwamiiha kivala chi Ivuyuda naveeye ni mihiga 35. Yamiha mu Jerusalemi ku mihiga 25. Mama weve yaali Azuba, mukaana wa Shilihi.

³² Mwami Jehoshafati yagenda mu zinzira zia Yahova kuli baba weve Asa yagenda mu, na siyazia ha lovega kutura ku yo mba. Yakola agaali malungi imbiri wa Yahova,

³³ navuzwa havundu hu kusigamira misambwa sihononywa mba. Avandu si vagirung'ana kusigamira Nyasaye wa vaguuga vaavo ni mioyo jaavo josi.

³⁴ Vindu vindi viosi viu mwami Jehoshafati yakola, kutura mu litanga lie liamiiha lilie kuduuka ku keheri, via ng'odwa mu vitabu via makuva ga kale ga Jehu mwana muyaayi wa Hanani, kandi gang'odwa nu vitabu via makuva ka kale ga vami va Isiraeli.

³⁵ Ing'inga indala mwami Jehoshafati wi Ivuyuda yalomba lihambana harara mu mwami Ahazia wa Isiraeli, uwakola vindu vinyingi vidamanu.

³⁶ Vombi vaviri, valomba zimeri ha Ezionigeberi ziokuzia Tarishishi.

³⁷ Navuzwa, Elieza mwana muyaayi wa Dodavahu, kutura mu lidaala lia Maresha, yiganihiza mwami Jehoshafati navoora, “Kigira umali kahambana harara na Ahazia, Yahova aladiviza chumali kwumbaka.” Na zimeri ziavaali nivalombi ziononywa kandi si ziazia kuduuka Tarishishi mba.