2 Kyetsinyinga 2 - KITABU KITAKATIFU

Lietegekera kwumbaka Litembeli

¹ Mwami Solomoni yasavira ukwumbakira Yahova Litembeli havundu hu kumusigamira, ma kandi kwiyumbakira inyumba yeye yu vwami.

² Yavika avasaza 70,000 ku miyinzi ju kuginga ivindu viu kwumbakira, kandi 80,000 ku miyinzi ju kuvaaza amagina mu kivala chi vigulu. Vaali ho avasaza 3,600 kusingilira miyinzi ju vwumbaki.

³ Solomoni yatuma makuva ku Mwami Huramu wa Tiro: “Yaanza kola likiranyia nainzi kuli wakola na baba wange mwami Daudi, lwa wamugulizira misaala ji Midaragwa ju kwumbakira inyumba yeeye yu vwami.

⁴ Inzi nyumbakaa Litembeli ukuhaana luyali ku Yahova Nyasaye wange. Lilava havundu Hatakatifu aha avandu vange harara ni inzi kulamusigamira ho ni lisaamba kimuli chu kufunya mwayu mulahi, aha nakuhaanirange vihaanwa viu mugadi Mutakatifu gwu kumanyira ku kazozo, kandi aha nakuhaanirange vihaanwa viu kusambwa vuli mugamba na mugolova; kandi ku Masabato, masavo gi Mieli Mihia kandi na madiku gandi Matakatifu gukuhaana luyali ku Yahova Nyasaye wiitu. Yahova umali kulaga Isiraeli kokora ndio mihiga ni mihiga.

⁵ Saaviraa kwumbaka Litembeli linene ligali, Kigira Nyasaye wiitu aveeye munene ligali kuvita munyasaye wundi woosi.

⁶ Navuzwa nivwaha unyala ligali kumwumbakira Litembeli, kigira ligulu, kali niiva igulu ligali wu mwigulu sivanyala kumuduuka? Kunangwa mbeeye vwaha nduuki kumwumbakira Litembeli, niilitali vuzwa havundu hukusamba kimuli imbiri weve?

⁷ Kunangwa kalunu undumiri mundu musaza, musiza wi limanya linyingi kuyinzira mu izahabu, ifeza, mugasa kandi vivia; kandi mu zinguvu ziu muzambarao, zinzakanyu kandi zie bulu. Alayinzira na vasiza vi Ivuyuda kandi va Jerusalemi ava baba wange Daudi yatovola.

⁸ Inzi ndamanya vusiza vwo kotema misaala vwa vasaza vovo vokotema misaala vaveeye navwo, kunangwa, ndetera midaragwa, imierezi ni misaala jimisandali kutura Lebanoni. Nzetegeki kutuma avandu vasaza vange vaze kokonya avandu vovo;

⁹ mu lietegekiza zimbaho zinyingi kigira Litembeli lia nyenya kwumbaka liveeye linene ligali kandi liokogenyia.

¹⁰ Ndahaana viukulia zitani 2,000 zie ingano, zitani 2,000 zie Shairi, na iziliita 400,000 zie iwaini kandi 400,000 zia maguta ga muzeituni. Ku vasaza vovo vokotema nokokenga misaala.”

¹¹ Mwami Huramu wa Tiro yatumira Solomoni amativuli mu ibarwa. Yang'odwa ndi: “Kigira Nyasaye ayaanzaa avandu veve, amali kokora ivi kuva mwami wavo.

¹² Yahova Nyasaye wa Isiraeli, mulombi wi ligulu ni lirova yizominywi! Umali kuhaana ku mwami Daudi muyaayi mugeri, uwiizuyi limanyiriza nuvusiza, olohizaa kalunu ukwumbakira Yahova Litembeli kandi ukwiyumbakira inyumba yu vwami.

¹³ Ngutumiraa kalunu musaza musiza wi limanya litambi ligali ulangangwa Hurambi.

¹⁴ Mama weve yaali mulala ku avi ihiiri ya Dani, na baba weve yiivulwa mu Tiro. Yamanya uvusiza vwo kolomba vindu kutura kuizahabu, ifeza, mugasa, vivia kandi Zimbaho; kandi ku zinguvu zie Irangi yu muzambarao, inzakanyu, bulu kandi ikatani indahi. Anyala kokora miyinzi jokong'ora mangirinya ku magina zing'ano ziosi kandi anyala kolonda livangula ku liosi lie zing'anagani zia anyala koheevwa. Leka ayinziri harara na vasiza vovo kandi harara na yavo avayinziraa na baba woovo, mwami Daudi.

¹⁵ Kunangwa kalunu, kutumiri ingano, ishairi, iwaini kandi maguta ga muzeituni ga walaga.

¹⁶ Mu vigulu via Lebanoni, kulatema misaala ji midaragwa ja wenyaa, na kujivohe harara kuli ivielemelo na kujeeleminye ku inyanza kuduuka Jopa. Kutura uwene yeyo unyala kujihila Jerusalemi.”

Liumbaka lie Litembeli litanganga

¹⁷ Mwami Solomoni yavaliza avageni vosi avamenya mu kivala cha Isiraeli, kuli livaliza lia baba weve Daudi yaali navuguyi. Vaali yo avageni vamenyaa mu Isiraeli 153,600.

¹⁸ Yavika 70,000 kuvo ku miyinzi jukuginga ivindu viu kwumbakira, 80,000 kuvaaza amagina mu vigulu, na 3,600 avasingiliri vokoheenza nokolola ndi miyinzi jikoleywe vulahi.