2 Kyetsinyinga 19 - KITABU KITAKATIFU

Muporofeti, Jehu agayaa Jehoshafati

¹ Mwami Jehoshafati wi Ivuyuda yirana mu mirembe munyumba yeeye yu vwami mu Jerusalemi.

² Muporofeti Jehu muyaayi wa Hanani, yazia kwaganira mwami Jehoshafati namuvolera, “Sivoveeye uvulungi okokoonya yavo avaveeye avadamanu nokolomba vulina nayavo avadunyiranga Yahovamba? Agokoli gamali koleta uvutima vwa Yahova ku ivi.

³ Navuzwa kali nindio, gaveeye ho amalahi malala mu ivi. Watuliza ho ivifananyi viosi viu munyasaye wi kikali - Ashera, ma kandi umali kogeriza kolonda vulaliri vwa Nyasaye.”

Mwami Jehoshafati atovoraa vakalagi vasuuvirifu

⁴ Mwami Jehoshafati yamenya ha Jerusalemi, na vuli ing'inga yaazizaa hagati ha vandu, kutura Beerisheba kuzia Isavaalu ku kiguru cha Efuraimu mu Ivaale, naaviranyia ku Yahova, Nyasaye wa vaguuga wavo.

⁵ Yatovola avakalagi mu vuli madaala manene gumbakwa nizimbinga gi Ivuyuda,

⁶ kandi navavoolera, “Muhenze vogeri kuli mukalaga; si mukoraa ku vunyali vwu mundu, navuzwa ku vunyali vwa Yahova, kandi aveeye harara na mwinye lwa muhaana ligalaga.

⁷ Kunangwa kalunu, muhaane ku Yahova luyali, mwilindi ku goosi aga mukoraa, kigira Yahova Nyasaye wiitu sialiikuzira ku lichaminya uvulungi, anoho liyanzilira magondo mu likalaga, anoho livugula vikukula.”

⁸ Mu Jerusalemi, mwami Jehoshafati yatovola vandu va Levi, Avasaalisi, kandi valala ku aviimiliri vi zinyumba zia Isiraeli, kuli vakalagi mu viina hagati ha avamenya mu lidaala linene lia Jerusalemi kolondekana nilivunaga malago ga Yahova anoho volembani hagati ha vandu vamenyaa mu lidaala linene lia Jerusalemi.

⁹ Yavalaga: “Mukore miyinzi jinyu mu liitia Yahova, nu vusuuvirifu nu mwoyo gwosi.

¹⁰ Lwi viina viza ku munyi kutura ku avamwavo vinyu avamenyi mu madaala manene gaavo, kigira litahiza masahi, anoho kuvunaga amalago, Ni mukalaga, hene yaho, mu viganihizi vavule kokora mahiolo imbiri wa Yahova, nandio uvutima vwa Yahova vuvuli kuduuka ku munyi na vamwavo vinyu.

¹¹ Amaria musaalisi munene alava nilikalaga liu kumaliriza mu viina viosi vie idini na Zebadia muyaayi wa Ishimaeli mwamihi wi Ivuyuda, alava ni likalaga liu kumaliriza mu viina viosi kolondekana na malago gi kivala. Muve avaluviriri na mulonde malago yaga. Yahova alava harara na valungi veve!”