2 Kyetsinyinga 18 - KITABU KITAKATIFU

Muporofeti Mikaya yiganihizaa Ahabu wa Isiraeli

¹ Kunangwa Jehoshafati mwami wi Ivuyuda yaali nuvutugi vonene kandi ni lizominywa linyingi ligali. Yalomba uvuhambani vwi lileetana hagati ha avinyumba yeeye na avinyumba yu mwami Ahabu wa Isiraeli.

² Inyima wi mihiga minyingi Jehoshafati yazia mu lidaala linene lia Samaria kogeniha Ahabu. Ahabu yalombera Jehoshafati na yavo avaari harara naye lisavo kandi navitira magondi manyingi kandi zing'ombe zinyingi. Yaageriza kogoonya Jehoshafati kuhambana naye mu lingilira lidaala liene lia Ramozi mu kivala cha Gileadi.

³ Mwami Ahabu wa Isiraeli yateeva mwami Jehoshafati wi Ivuyuda, “Ulazia niinzi kwingilira lidaala lia Ramozi mu Gileadi?” Jehoshafati yativura, “Inzi mbeeye kuli ivi oveeye, na vandu vange vaveeye kuli avandu vovo. Kunyi kulazia naivi mu vulwani.”

⁴ Maku yameda kovora, “Navuzwa leka kutange koteeva Yahova.”

⁵ Kunangwa mwami Ahabu wa Isiraeli yalanga avaporofeti vaze kuye. Ahimbi avasaza 400, na yavateva, “Nyara kuzia kulwaana Ramozi, mu kivala cha Gileadi, anoho mba?” Vosi vaativura, “Zia, ulingiliri! Nyasaye alakuha iliguuta kulio!”

⁶ Navuzwa mwami Jehoshafati wa Ivuyuda yateeva, “Sihaveeye ho nu muporofeti wundi uwa kunyala koteeva ku uvulariri vwa Yahova?”

⁷ Mwami Ahabu yativura, “Haveeye ho nu mulala utigaye, naye ni Mikaya, muyaayi wa Imula. Navuzwa mudunyiraa kigira si aporofetaa ku kindu kilahi ku inzi mba; navuzwa kidamanu vuli kazozo.” Jehoshafati yamutivulira, “Utavoola ndio mba!”

⁸ Kunangwa mwami Ahabu yalanga munene mulala wu vwami namuvolera azie koleta Mikaya muyaayi wa Imula vwangu.

⁹ Avami yavo, niviviiki zinguvu ziavo ziu vwami, vaali nivikaye ku zindeve ziavo ziu vwami ichova wi kirivwa cha Samaria, na avaporofeti vosi vaali ni vaporofeta imbiri wavo.

¹⁰ Mulala kuvo, Zedekia muyaayi wa Chenana, yalomba zinziga zie kivia kandi navolera Ahabu, “ Yaga nigo ga Yahova avoora, ‘Ulazitumikira ukulwaana avandu va Avasiria nukuvaguuta ligali.’ ”

¹¹ Avaporofeti vandi vosi vavoola kindu kilala chere. Vavoola, “Zia ulwaane Ramozi na ulaguuta. Yahova alakokola uguuti.”

¹² Mutumwa uwaali naziiyi kulanga Mikaya yamuvolera, “Henza, avaporofeti vandi vosi vamali kuporofeta uvuguuti ku mwami. Leka likuva liilio livugilirizane ni liavo, na omolome vulahi ku mwami.”

¹³ Navuzwa Mikaya yativura, “Imbiri wa Yahova oveeye mwoyo, ndavoora vuzwa icha Nyasaye wange yambolera mbore!”

¹⁴ Lwa yaduuka imbiri wu mwami Ahabu, mwami yamuteeva, “Mikaya, kunyala kuzia kulwaana Ramozi, anoho kuvuli kuzia?” Mikaya yativura, “Zii mulingiliri! Yee, mulaguuta! Yahova alakokola uguuti!”

¹⁵ Navuzwa Ahabu yativura, “Lwa omoloma niinzi mu lieta lia Yahova, vola agiligali! Ni haali kanga ningovolera okole ndio?”

¹⁶ Maku Mikaya yativura, “Ndolaa liihi liosi lia Isiraeli nilisalani ku vigulu kuli magondi gataveeye nu mwayi. Na Yahova yavoola, ‘Avandu yava si vaveeye nu mwimiliri mba; leka vazie sa mulala, yengo mu mirembe.’ ”

¹⁷ Maku mwami Ahabu yavolera Jehoshafati, “Singovoleye ndi mwene uyu si aporofetaa kindu kilahi ku inzimba, navuzwa amadamanu geng'ine!”

¹⁸ Mikaya yaazizagilira, “Kalunu hulira cha Yahova avoora! Ndoli Yahova niyikaye ku endeve yeeye yu vwami mwigulu, ni zingelosi veve vosi nivasingiyi ku zimbega zizie ziombi.

¹⁹ Yahova yateeva, ‘Nivwaha uzia kugaada Ahabu kunangwa aduuki kuzia na yiitirwi ha Ramozi?’ Valala ku zingelosi vavoola malala naavandi vavoola gandi,

²⁰ Kuduuka lwa roho gwasingira imbiri, nigwisunda ku Yahova, kandi nigovoora, ‘Inzi ndazia kumugada.’ Yahova yateeva, ‘Kuli ndi?’

²¹ Roho zana gwativula, ‘Ndazia kokora avaporofeti vosi va Ahabu vavoole ovovehi.’ Yahova yavoola, ‘Zia na umugaade. Ivi ulanyala.’ ”

²² Mikaya yamaliriza, “Yaga nigo angakoleki. Yahova umali kokora avaporofeti vovo yava vakugade. Navuzwa oyo mwene umali kulaga ndi ivi ulagana ni kivi!”

²³ Maku muporofeti Zedekia yazia ku Mikaya, namukuya uluhi mumoni mwimwe kandi nateeva, “Kutura ng'inga ki lwa Roho wa Yahova gondeki, no komoloma niivi?”

²⁴ Mikaya yativura, “Ivi ulamanya yaga lwa uzia kwivisa mu keng'oze kilala inyima wi inyumba.”

²⁵ Maku mwami Ahabu yalaga mulala ku vanene veve, “Gumiri Mikaya na mumuhile ku Amoni, munene wi lidaala linene kandi ku Joashi muyaayi wu mwami.

²⁶ Muvavoolere vaviiki Mikaya muvuhambe na vamulihize mugadi vuzwa na mazi kuduuka lwa nzirana mu mirembe.”

²⁷ Mikaya yavoola, “Niiva ulirana mu mirembe, na ndamanya ndi, Yahova si amolomi ni inzi mba!” Na yameda kovora, “Muhulirize sa mulala aga inzi mali kovora.”

Likuza lia Ahabu

²⁸ Maku mwami Ahabu wa Isiraeli nu mwami Jehoshafati wi Ivuyuda vazia kwingilira lidaala linene lia Ramozi mu kivala cha Gileadi.

²⁹ Ahabu yavolera Jehoshafati, “Lwa kuzia mu vulwani, inzi ndigirung'anyia kuva mundu wundi vuzwa, navuzwa ivi wiviki zinguvu zizio ziu vwami.” Kunangwa mwami wa Isiraeli yingira mu vulwani mu liegirung'anya.

³⁰ Mwami wa Siria yaali nalagi avanene veve va magare gu vulwani ndi vatingilira mundu wundi woosi natali mwami wa Isiraeli mba.

³¹ Kunangwa lwa valora mwami Jehoshafati, vaganagana ndi niyie mwami wa Isiraeli na vagirung'ana kuzia kumwingilira. Navuzwa Jehoshafati yahanzuka, na Yahova Nyasaye yamuhonyia ma naagirung'anyia lingilira yilio kutura kuye.

³² Lwa vanene vukuhila magare gu vulwani valora ndi siaveeye mwami wa Isiraeli mba, valekera limulondelera.

³³ Ku ingavi imbi, musikari Musiria yalasa umbano gwuvuta ugwaatoza mwami Ahabu hagati huvwavukaniru vwi ikuuti yeeye. Yahanzukira muhiri wi ligare lilie liuvulwani, “Ndozeeywi vuvi ligali. Girung'ana na undulize ichova wuvulwaani!”

³⁴ Lwu uvulwani vwazizagilira kutivira, mwami Ahabu yeesedeminya mu ligare lilie liuvulwani nahenzi avandu va Siria kuduuka hamugorova. Maku lwa liuva liayera, yakuza.