2 Kyetsinyinga 17 - KITABU KITAKATIFU

Jehoshafati yagwiza mwami

¹ Jehoshafati yavugula ovogono vwa baba weve Asa kuli mwami kandi yadinyiriza ovogono vwivwe nukwivika zinguru ukwikinga ku vasigu veve - Isiraeli.

² Yavika amahi mu madaala manene gi zimbinga goosi gi Ivuyuda, mu kivala choosi chi Ivuyuda kandi niyumbaka zimbinga mu kivala choosi chi Ivuyuda kandi mu madaala aga Asa baba weve yanyaga Isiraeli mu kivala cha Efuraimu.

³ Yahova yagasiza Jehoshafati, kigira yalonda liiva liu kutanga lia baba weve kandi si yasigamira Baali mba.

⁴ Yatumikira Nyasaye wa baba weve, naahulira amalago ga Nyasaye, na si yakola kuli vikolwa via vami vosi va Isiraeli vaakora mba.

⁵ Kunangwa Yahova yadinyiriza uvwami vwi Ivuyuda mu zinguru zizie, na vandu vosi vi Ivuyuda valetera Jehoshafati vihaanwa, na yagwa mutugi ligali.

⁶ Mwoyo gwigwe gwaali nu vuluviliri mu litumikira Yahova kandi yononyia havundu hoosi hukusigamira avanyasaye kandi yononyia vifananyi viosi viu munyasaye wikikali Ashera mu Ivuyuda.

⁷ Mu muhiga gwa kavaga gwi liamiiha lilie, yatuma avanene veve yava kuzia kwigiza mu madaala manene goosi gi Ivuyuda: Benihaili, Obadia, Zakaria, Nezaneli na Mikaya.

⁸ Vazia harara na vandu va Levi kandi na vasaalisi 2: vandu va Levi vaali Shemaya na Nezania, Zebadia, Asaheli, Shemiri Amozi, Jehonazani, Adonija, Tobija na Tobadonija; na avasaalisi vaali Elishama na Jehoramu.

⁹ Vaavugura kitabu chi Lilaga lia Yahova kandi nivavodong'ana mu madaala goosi gi Ivuyuda, nivigiza avandu vosi.

Ovonene vwa Jehoshafati

¹⁰ Yahova yalomba uvwami vwakumbiriza Ivuyuda vwosi ukutia kulwaana nu mwami Jehoshafati.

¹¹ Valala ku Vandu va Filisitia valeta ifeza inyingi ligali ni vihaanwa vindi ku Jehoshafati, kandi vandu va Arabu valala vamuleetera amagondi 7,700 kandi izimbuli 7,700.

¹² Kunangwa Jehoshafati yaazizagilira kuviruka, naava ni zinguru ligali. Yumbaka madaala manene gi zimbinga mu Ivuyuda mwosi;

¹³ wi viukulia viavikwa mu vunyingi ligali. Mu Jerusalemi, yavika mu avanene vizingulu nu vuluviliri vwokogenyia,

¹⁴ kolondekana ni viliango viavo. Adina yaali munene wa mahi kutura mu viliango vie Ivuyuda, na yaali na vasikari vi liihi 300,000 hasi hehe.

¹⁵ Wakaviri mu vonene yivu yaali Jehohanani, na yaali na vasikari vi liihi 280,000.

¹⁶ Uwakavaga yaali Amasia muyaayi wa Zikiri yaali na avasikari vi liihi 200,000. Amasia yaali niyihaana kutumikira Yahova.

¹⁷ Munene wa amahi kutura mu viliango vie ihiiri ya Benjamini yaali Eliada, musikari wuvuluviri vwokogenyia, mulindi wa vasikari vi liihi 200,000 niviviiki viuma viezingavo nuvuta.

¹⁸ Mulondi weve mu vonene yaali Jehozabadi yaali navasaza vi liihi 180,000, avaari nivetegeki vulahi ku vulwani.

¹⁹ Avasaza yava vatumikira mwami mu Jerusalemi, kandi komeeda ku aveene yava, yavika avasikari vi liihi vandi mu madaala manene gi zimbinga gandi gi Ivuyuda.