2 Kyetsinyinga 16 - KITABU KITAKATIFU

Mwami Baasha wa Isiraeli atulira Ivuyuda

¹ Mu muhiga gwa 36 mu liamiiha liu mwami Asa wi ivuyuda, mwami Baasha wa Isiraeli yingilira Ivuyuda kandi natanga kwumbaka imbinga ha Rama kuduuka kwigalira zinzira ziosi ziukwingira nukutura Ivuyuda.

² Kunangwa mwami Asa yavugula ifeza ni izahabu yoosi yaatigala mu mavikiru gi Litembeli, kandi munyumba yu vwami, navituma Damasiko ku mwami Benihadadi wa Siria na makuva yaga,

³ “Leka kove avalina kulilagana kuli avababa viitu vaali. Ifeza yiyi ni izahabu, viveeye vihaanwa vivio. Kalunu vunanyia vulina vwililagana liilio nu mwami Baasha wa Isiraeli kunangwa aduuki kutuliza amahi geege mu kivala change.”

⁴ Mwami Benihadadi yavugilira zing'anagani ziu mwami Asa yaali nahaani, kandi natuma avanene veve vi liihi harara na mahi gaavo kwingilira amadara manene ga Isiraeli. Vagumira Ijoni, Dani, Abeli Bezi Maaka, kandi madaala goosi ga Nafutali agatumikaa kuli amaviikiru.

⁵ Lwu mwami Baasha yahulira agaali nigekoleka, yasingiriza kwumbaka imbinga ya Rama kandi nalekela miyinzi.

⁶ Maku mwami Asa yavungiza avasaza vosi mu kivala choosi chi Ivuyuda, naavatuma kuzia kuginga amagina ni zimbaho ziu mwami Baasha yaali natumikira kwumbaka mu Rama. Asa yatumikira vindu yivi kwumbaka imbinga ya madaala manene ga Geba na Mizipa.

Muporofeti Hanani

⁷ Ing'inga yene yeyo, muporofeti Hanani yazia ku mwami Asa navoora, “Kigira wesedemaa ku mwami wa Siria na nuvula kwesedema ku Yahova Nyasaye woovo, iliihi liu mwami wa Isiraeli liahononoka kutura ku ivi.

⁸ Avandu va Ezopia na Libia vaali na mahi amanene harara na magare na vasaza vi zibarasi navuzwa kigira wasedema ku Yahova yakokola nuvaguuta.

⁹ Zimoni zia Yahova zihenzaa havundu hoosi mu lirova liosi. Yahova ahaanaa lidinyiriza ku yavo avaveeye vasuuvirifu kuye. Kuyaga goosi, wakola uvudamanu, na kutura kalunu ulamenya mu, vulwani.”

¹⁰ Yaga galoomba mwami Asa kuva nu vutima nu muporofeti Hanani, na yalaga muporofeti avofwe ni aviikwi ku minyororo na avikwi munyumba ya vahambe. Yaali ing'inga yiyi lwu mwami Asa yaatanga kudambiza avandu valala mu Ivuyuda.

Keheri chi Liamiiha lia Asa

¹¹ Vindu viosi via koleka mu liamiiha lia Asa kutura mu litanga kuduuka mu limala, viang'odwa mu makuva ga kale ga vami vi Ivuyuda na Isiraeli.

¹² Mu muhiga gwa 39 lwa Asa yaali mwami, uvulwaye vululu mukerenge vwa mukora mulema. Navuzwa, kali niiva Asa yaali nu vulwaye vwivwe, si yenyeleriza Yahova mba, navuzwa yenya ovokonyi kutura ku avaahi vi zinyasi.

¹³ Mu muhiga gwa 41 gwi liamiiha lilie, Asa yakuza.

¹⁴ Vaamuta mu kivindwa cha yaali nayavi umwene mu lidaala linene lia Daudi. Vaviika muviri gwigwe mu sandugu ya vavakamu zinyasi zie zing'ano ziosi ziafunyaa mwayu, zialombwa na vasiza. Valomba muliru munene ligali kuhaana luyali, kuye.