2 Kyetsinyinga 15 - KITABU KITAKATIFU

Liononyia lie vifananyi nu Mwami Asa mu Ivuyuda

¹ Roho wa Nyasaye yaza ku Muporofeti Azaria muyaayi wa Obedi,

² ma yazia kwagana nu mwami Asa. Yamuvolera, “Mbulirizaa, mwami Asa harara na vandu vosi vi Ivuyuda na Benjamini! Yahova aveeye harara na munyi lwa mukikiri harara naye. Niiva mulenya Yahova mulamunyoola, navuzwa niiva mulatula kuye, naye alamuleka.

³ Ku ing'inga indambi avandu va Isiraeli vamenya vugira Nyasaye wagiligali, kandi vugira avasaalisi kuvigiza kandi vugira amalago.

⁴ Navuzwa lwu vudinyu vwaduuka, virana ku Yahova, Nyasaye wa Isiraeli. Venya Yahova nivamunyola.

⁵ Mu madiku yago, mundu kali mulala siyali unyala kuza makandi azie ni mirembe mba, kigira vwaliho uvudinyu ni kivihiri mu vuli kivala.

⁶ Ihiiri ndala yadambiza ihiiri yindi, kandi lidaala linene lidambiza lidaala linene lindi, kigira Nyasaye yaali naleti uvudinyu ni kivi kuvo.

⁷ Navuzwa muve avaluviriri na mutava avadedekere mba. Mulanyola amadanyi ku miyinzi jia mukora.”

⁸ Lwa Asa yahulira makuva yago ovoporofeti vwa Azaria muyaayi wa Obedi, yavugula liluvirira. Yononyia vifananyi viosi mu kivala choosi chi Ivuyuda na Benjamini, kandi mu madaala goosi aga yaali ni yagumira mu vigulu via Efuraimu. Kandi yalomba vwali uvwali nivwoneki uvwalange imbiri wi Litembeli lia Yahova.

⁹ Mwami Asa yavuganyia avandu vosi kutura Ivuyuda na Benjamini, kandi avaari nivatuli Efuraimu, Manase na Simioni Avamenya hasi ha Asa. Avandu yava vazia ku Asa kutura Isiraeli kigira valora ndi Yahova Nyasaye yaali harara naye.

¹⁰ Vavugana mu Jerusalemi mweli gwa 3 ku muhiga gwa 15 mu liamiiha liu mwami Asa.

¹¹ Lidiku liene yilio, vahaana visiuviliru ku Yahova kutura ku vilaanye via valeta: zing'ombe 700, na magondi 7,000.

¹² Maku, valomba lilagana liu kusigamira Yahova, Nyasaye wa vaguuga vaavo, ni mioyo jaavo josi na Roho jaavo josi.

¹³ Ku vosi, muyaayi anoho muhindira, musaza anoho mukali, uwavula kusigamira Yahova Nyasaye wa Isiraeli, yitwa.

¹⁴ Vosi visuuha ku lieta lia Yahova nu mwoyo munene ndi, valalinda Lilagana lia Yahova, Nyasaye wa Isiraeli. Vosi vakuba uluku na mang'alala ni visiriva.

¹⁵ Avandu vi Ivuyuda vosi vasangala kigira vaali nivalombi lilagana liukwisuha ku Yahova Nyasaye wa Isiraeli mu mioyo jaavo josi. Vaavugura liiva liu kusigamira Yahova, na Yahova yavavugilira kandi navaha mirembe ku zimbega ziosi.

¹⁶ Mwami Asa yaatuliza guuku weve Maaka kutura mu vwiyangu vwivwe kuli vwami vwi kikali, kigira yaali naalombi kifananyi chu kuvihiliriza chu munyasaye Ashera. Mwami Asa yononyia kifananyi yicho ligali ma nasambira vidonye viacho mu livona lia Kidironi.

¹⁷ Kali niiva mwami Asa si yononyia havundu hoosi hu kusigamira misambwa mu kivala, navuzwa yaali musuuvirifu ku Yahova mu livamwoyo lilie.

¹⁸ Yavika mu Litembeli iviju viosi via baba weve Abija yaali ni yatakasa ku litumika lia Nyasaye, harara ni zahabu, ifeza, kandi iviju viu mwene yatakasa.

¹⁹ Na si haali ho nuvulwani kandi kuduuka ku muhiga gwa 35 mu liamiiha lio mwami Asa.