2 Kyetsinyinga 14 - KITABU KITAKATIFU

Liamiiha liu Mwami Asa wi Ivuyuda

¹ Mwami Abija yakuza naateevwa mu vilindwa viu vwami mu Lidaala linene lia Daudi. Muyaayi weve Asa yavugula ovogono vwivwe kuli mwami. Mu madiku gi liamiiha lilie, kivala chi Ivuyuda chaali ni mirembe ku mihiga 10.

² Mwami Asa yakola vindu vinyingi vilahi viuvulungi imbiri wa Yahova Nyasaye weve.

³ Yaatuliza ho uvwali vogeni havundu haali hu kusigamira misambwa, ma kandi nasambura zitiru zia magina ma naatema vifananyi via nyasaye wi kikali Ashera.

⁴ Yalaga avandu vi Ivuyuda kolonda malago ga Yahova, Nyasaye wa vaguuga vaavo, nu kuhulira amigizu na malago geege.

⁵ Mu liamiiha lilie, uvwami vwali ne lie hozelizamu mirembe kigira yatulizaho havundu hukusigamira misambwa ma kandi yatuliza ho uvwali vwu kusamba vimuli kutura mu madaala manene goosi gi Ivuyuda.

⁶ Yumbaka zimbinga ku madaala manene gi Ivuyuda ing'inga yi liamiiha lilie. Maku mihiga minyingi, vulwani sivwaaliho mba, kigira Yahova yamuha mirembe.

⁷ Yavolera avandu vi Ivuyuda, “Gendi kwumbake madaala manene yaga, kugakumberize ni zingaga zia madigi makandi minaara, virivwa kandi miruguyu. Kivala yiki kikikiri chiitu, kigira kwenyaa Yahova Nyasaye wiitu, kwamwenya, kandi yakuha mirembe ku lovega lwosi.” Kunangwa vumbaka ma nivagasizwa ligali.

⁸ Mwami Asa yaali ni liihi lia avasaza 300,000 kutura Ivuyuda, vaali niviyavaye zinguva na matimu, ma kandi vasaza 280,000 kutura mu kivala cha Benjamini niviyavaye zinguva nu vuta. Vosi vaali avasaza vo vogeri, avizingulu kandi avasuuvirifu.

Mwami Asa yaguuta liihi lia Ezopia

⁹ Mundu mulala walangwa Zera kutura mu kivala cha Ezopia yaza kwingilira Ivuyuda ni liihi lia vasaza 1,000,000 harara na magare 300 ha Maresha.

¹⁰ Hene yaho, mwami Asa yazia kulwaana Zera, vombi vavugura vogono vwavo mulivona lia Zefaza mu kivala cha Maresha.

¹¹ Mwami Asa yanira Yahova Nyasaye weve na saala navoora, “O, Yahova, siaveeye ho nu mundu wundi unyala kokonya kunyi nataveeye ivi mba, hagati ha uyu oveeye ni zinguru kandi hagati ha uyu utaveeye ni zinguru. Okokonye O, Yahova Nyasaye wiitu, kigira ni ivi wakwiidiraa ku, na mu lieta liilio kulalwana na kulaguuta muganda gwa vasigu yava. O, Yahova, niivi Nyasaye wiitu, mundu atakuguuta mba!”

¹² Maku, Yahova yaguuta liihi lia Ezopia imbiri wa Asa na imbiri wi liihi lia vandu vi Ivuyuda. Liihi lia Ezopia vamanya ni viruka.

¹³ Ma Asa harara ni liihi lilie vavakunga ni vavalondelera kali kuduuka Gerari. Liihi lia Zera vaaguutwa, na Yahova yavadiviza ligali na sihali ho nu mulala watigala mba. Avasaza vi liihi lia Asa vaginga vilaanye vinyingi ligali kutura ku vandu va Ezopia.

¹⁴ Maku, vadiviza amadara manene gakumberiza Gerari, kigira avandu havundu hene yaho vatihizwa na Yahova ligali. Liihi lia Asa lialanga amadara goosi ma ni vavugura vilaanye vinene ligali.

¹⁵ Kandi lingilira mahema ga avayi vi mitugu, nivavugura amagondi manyingi harara ni zing'amia ni vazia nago mu Jerusalemi.